Леви 19 - Пак Калам

Жуьреба-жуьре къанунар

¹ Реббиди Мусадиз лагьана:

² «Исраилдин рухвайрин вири элдиз хабар це: „Пак хьухь, гьикӀ лагьайтӀа Зунни, Ребби, куь Аллагь, пак я.

³ Бубадизни дидедиз гьуьрмет ая, Зи Киш йикъар кьиле твах. Зун, Ребби, куь Аллагь я.

⁴ Бутрихъ галаз рафтарвал ийимир, куьн патал цӀурурна кӀалубда цайи аллагьар рас ийимир. Зун, Ребби, куь Аллагь я.

⁵ Куьне Реббидиз суварин къурбанд ийизватӀа, ам Адан рикӀив кьадайвал ая:

⁶ ам садакьа ийизвай ва я къведай юкъуз неъ, пуд лагьай юкъуз амукьайди лагьайтӀа, кана кӀанда.

⁷ Ам пуд лагьай юкъуз тӀуьртӀа, къурбанд турусди жедач, ам – чӀур хьанвай як я.

⁸ Ам ни тӀуьртӀа, гьам тахсиркар жеда, идалди ада Реббидин къурбанд кьацӀурзава эхир. Ихьтин кас вичин халкьдикай хкудна гадарда.

⁹ Куьне куь чилел гвенар гуьдай чӀавуз никӀин лап къерехдив кьван къвемир ва гвенар алатайдалай кьулухъ чилелай кьилер кӀватӀ хъийимир.

¹⁰ Жуван ципицӀ багъда сад амай кьван вири ципицӀар кӀватӀ хъийимир ва чилел аватнавайбур къахчумир. Абур кесибар ва масанай атана ацукьнавайбур патал тур. Зун, Ребби, куь Аллагь я.

¹¹ Чуьнуьхмир, таб ийимир, жуванди алцурмир.

¹² Зи тӀварцӀелди тестикь авуна тапан кьинер кьамир – жуван Аллагьдин тӀвар кьацӀурмир. Зун Ребби я.

¹³ Мукьув гвайдаз азият гумир, ам тараш ийимир. Пулунихъ кьунвайдан мажиб пакамалди энгел ийимир.

¹⁴ Бишидаз лянет ийимир ва буьркьуьдахъ кӀвач галкӀурмир. Жуван Аллагьдихъай кичӀе хьухь. Зун Ребби я.

¹⁵ Дуванханада гьахъвал хуьх. Гьахъ гвачиз кесибдин терефдар жемир, девлет авайди артух яз кьамир; жувандан дуван гьахъвилелди ая.

¹⁶ Жуван халкьдикай тирбурун арада фитнеяр чукӀурмир, иви экъичунра иштиракзавайбурукай сад жемир. Зун Ребби я.

¹⁷ Жуван стхадин патахъай рикӀе такӀанвал твамир. Жувандан чӀуру крар, адан гунагьрин патахъай жаваб гун тийидайвал, ачухдиз дуьздал акъуд.

¹⁸ Жуван халкьдикай тир касдилай кьисас вахчумир, адан хъел рикӀе хуьмир. Жув хьиз жуван мукьув гвайдини кӀан хьухь. Зун Ребби я.

¹⁹ За къалурнавай къайдаяр кьиле твах. Гьар жуьредин кьве жинсинин гьайванар сад садаз ямир, никӀе кьве жуьредин тумар цамир, кьве жуьредин гъаларикай хранвай парталар алукӀмир.

²⁰ Итим масадаз тайин авунвай къаравушдихъ галаз къатканатӀа, амма я пул гана къахчунвачир, я азаднавачир, адаз жаза гун герек я. Абур кьиникь лазим туш, а паб азад тушир эхир.

²¹ А итимди Реббидиз эвез яз, Гьалтунин Алачухдин сивел тахсир хиве кьунин къурбанд патал са гьер гъурай.

²² Ва хахамди и касди авур гунагьдай, гьер тахсир хиве кьунин къурбанд авуналди, Реббидин вилик гъил къахчунин серенжем кьиле тухурай. И чӀавуз адан и гунагьдилай гъил къахчуда.

²³ Куьн а уьлкведиз атана ва майвадин тарар акӀурдай чӀавуз, абурун емишар пуд йисан вахтуналди гьарам яз гьисаба. Пуд йисуз куь тарар бегьер кӀватӀ тахвуна амукьрай: абурун майваяр немир.

²⁴ Кьуд лагьай йисуз вири и бегьер пакди жеда – Реббидин тарифдиз ийизвай садакьа.

²⁵ Вад лагьай йисуз лагьайтӀа, а бегьер неъ. ИкӀ хьайитӀа, квез бул бегьерар жеда. Зун Ребби, куь Аллагь я.

²⁶ Иви квай як немир. ИцитӀунар, фал вегьинар кьиле тухумир.

^27-28 Кьейибур себеб яз кьилин чӀарар элкъвена атӀумир. Жуван чурудин къерехар атӀумир, жувал кьацӀар ийимир, жуван бедендал лишанар чӀугвамир. Зун Ребби я.

²⁹ Жуван руш мажусийриз хас тир небгетвал ийиз, кьагьбевал авуниз, мажбур ийимир. ТахьайтӀа чил небгетвилелди кьацӀуда ва алчахвиливди ацӀуда.

³⁰ Зи Киш йикъар кьиле твах ва Зи ибадатханадиз гьуьрмет ая. Зун Ребби я.

³¹ Куьн чиркин тахьун патал, кьияривай, жавабар гудай руьгьеривай хабарар кьамир. Зун Ребби, куь Аллагь я.

³² Рехи чӀарариз гьуьрмет ая, кьуьзек атайла къарагъ. Жуван Аллагьдихъай кичӀе хьухь. Зун Ребби я.

³³ Куь чилел масанай атана ацукьнавайбуруз азабар гумир.

³⁴ Абуруз чкадин эгьлидиз хьиз рафтарвал ая. Абур лап гьа жув хьиз кӀан хьухь. Бес куьнни Мисрида масанай атана ацукьнавайбур тир эхир. Зун Ребби, куь Аллагь я.

³⁵ Гьахъ дуван ая ва крара гьахъ хуьх: алцумдайла, чӀугвадайла ва я къене гьахьзавай кьадарар акъуддайла.

³⁶ Квев дуьз терез ва дуьз къванер, дуьз эфа ва дуьз гьин гваз хьурай. Зун Ребби, куьн Мисридай ахкъудай куь Аллагь я.

³⁷ За къалурнавай вири къайдаяр ва къайдаяр кьиле твах, абур кьилиз акъуд. Зун Ребби я“».