Леви 18 - Пак Калам

Реббидин пак тир халкь патал къанунар ( 18–20 кьилер) Къадагъа тир эркек-дишивилин алакъаяр

¹ Реббиди Мусадиз лагьана:

² «Исраилдин рухвайриз хабар це: „Зун Ребби, куь Аллагь я.

³ Куьне уьмуьр тухвай Мисридин, ва За куьн тухузвай Къенандин адетар чешне ийимир. Абурун адетрин рекье аваз фимир.

⁴ Зи къайдаяр кьиле твах, Зи къалурнавай къайда кьилиз акъуд ва абурун геле аваз алад: Зун, Ребби, куь Аллагь я.

⁵ Зи къалурнавай къайдаяр ва такькимар кьилиз акъуд: Абуру чпел амал ийизвайбуруз уьмуьр гузва. Зун Ребби я.

⁶ Квекай садни мукьвади тир папан патавни татурай, адахъ галаз къаткин тавурай: Зун Ребби я.

⁷ Бубадихъни дидедихъ галаз къаткимир – дидедихъ галаз къаткимир, ам ви диде я.

⁸ Жуван бубадин папахъ галаз къаткимир – им ви бубадихъ галаз къаткай чӀал я.

⁹ Жуван вахахъ галаз къаткимир, кӀандатӀа ам ви бубадин руш ва я ви дидедин руш хьуй, я ам куь хизанда ханваз хьуй ва я адалай къерехда.

¹⁰ Ви хцин рушахъ ва я ви рушан рушахъ галаз къаткимир – им вуна вун русвагьна лагьай чӀал я.

¹¹ Ви бубадилай хьанвай ви бубадин папан рушахъ галаз къаткимир: ам – ви вах я.

¹² Ви бубадин вахахъ галаз къаткимир: ам ви бубадин як я.

¹³ Ви дидедин вахахъ галаз къаткимир, гьикӀ лагьайтӀа ам ви дидедин як я.

¹⁴ Ви бубадин стхадихъ галаз къаткимир: адан папаз мукьва жемир, ам – ви имидин свас я.

¹⁵ Жуван хцин сусахъ галаз къаткимир: ам – ви хцин паб я, адахъ галаз къаткимир.

¹⁶ Ви стхадин папахъ галаз къаткимир – им ви стхадихъ галаз къаткидай чӀал я.

¹⁷ Чара папахъ ва адан рушахъ галаз къаткимир. Ви папан хцин руш ва я ви папан рушан руш паб яз къачумир, им папахъ галаз къаткай чӀал я. Абур вири са як я эхир; икӀ авун – чиркинвал я.

¹⁸ Ви папал чан аламаз адан вах къахчумир, адахъ галаз къаткана, адакай ви папан кьев ийимир.

¹⁹ Папахъ вацран кьилер аваз ам чиркин тирла, адан патав къвемир, – адахъ галаз къаткимир.

²⁰ Жувандан папахъ галаз къаткимир, адаз мая авадармир, адахъ галаз чиркин жемир.

²¹ Жуван веледар Малехдин гъиле вугумир – жуван Аллагьдин тӀвар кьацӀурмир. Зун Ребби я.

²² Итимдихъ галаз, папахъ галаз хьиз, къаткимир: им мурдарвал я.

²³ Жув чиркин ийиз, гьайванрихъ галаз лап мукьва жемир, ва папани гьайвандикай ашна кьун тавурай: им мурдарвал я.

²⁴ Куьне куьн ихьтин краралди чиркин ийимир. Вири и краралди за квез чка авун патал чукурзавай халкьари чеб чиркин авуна.

²⁵ Абур себеб яз и чил чиркин хьанва. За ам гунагьрай жавабдарвилиз чӀугуна ва адани вичел уьмуьр тухузвайбур гадарна.

²⁶ Куьне лагьайтӀа, За къалурнавай къайдаяр ва Зи тагькимар кьилиз акъудун лазим я; я чкадин эгьлиди, я куь арада масанай атана ацукьнавайда, ихьтин мурдарвилер тавурай.

²⁷ Квелай вилик и чилел уьмуьр тухузвайбуру вири и мурдарвилер авунай – ва чилни чиркин хьана.

²⁸ Куьн себеб яз и чил чиркин жедай хьтин кӀвалахар тахьурай, тахьайтӀа квелай вилик ина хьайи халкьар ада гьикӀ гадарнайтӀа, куьнни гьакӀ гадарда!

²⁹ Ихьтин мурдарвилериз рехъ гудай гьар вуж хьайитӀани, ам вичин халкьдин жергейрикай хкудна гадарда.

³⁰ Зи къараррал амал ая: квелай вилик ина амал ийизвай мурдар адетрин геле аваз фимир – абуралди куьне куьн чиркин ийимир. Зун Ребби, куь Аллагь я“».