Леви 16 - Пак Калам

Гьар йисан кьилин сувар ( 16–17 кьилер) Гунагьрилай гъил къахчудай йикъан къурбандар

¹ Чеб Реббидин мукьув атана телеф хьайи Гьарунан кьве хва кьейидалай кьулухъ Ребби Мусадихъ галаз рахана.

² Реббиди Мусадиз лагьана: «Жуван стха Гьаруназ лагь хьи, адавай гьар гьи вахтунда хьайитӀани Паквилерин Пак чкадиз, пердедихъ, „Гунагьар алудзавай чка“ лугьудай сандухдин къапсахдин патав къвез жедач, тахьайтӀа ам рекьида, вучиз лагьайтӀа Зун анал, сандухдин къапсахдал, цифеда аваз пайда жеда.

³ Паквилерин Пак чкадиз гьахьиз гьазур хьайила, гунагьдай авун яз, ада са жунгав ва кунуг патал са гьер къурбанд авуна кӀанда.

⁴ Жендек кӀевдай кушдин пак тир перем ва кушдин шалвар алукӀрай, юкьва кушдин чӀул турай, кьилихъни кушдин сирих ягърай. Ибур пак парталар я; ада абур гъилер чуьхуьн къачурдалай кьулухъ алукӀун лазим я.

⁵ Ада Исраилдин элдивай гунагьдай къурбанд яз кьве кьун ва кунуг патал са гьер къачуна кӀанда.

⁶ Вичин патай лагьайтӀа Гьаруна, вичихъ ва вичин кӀвалихъ гъил къахчунин серенжем кьиле тухун патал, гунагьдай къурбанд яз жунгав гъана кӀанда.

⁷ Ада ахпа кьве кьунни къачурай, абур Реббидин вилик, Гьалтунин Алачухдин сивел эциграй,

⁸ ва квел гьихьтин чип аватнатӀа къалуррай: сад Реббидиз тайин авунва, муькуьдини – Азазелаз.

⁹ Гьаруна чипинай Реббидиз тайин хьанвай кьун гунагьдай къурбанд патал къачурай.

¹⁰ Азазелаз тайин хьайи кьун лагьайтӀа, Реббидин вилик чан алаз, гъил къахчунин серенжем кьиле тухун патал – ам Азазелаз кьурумдиз рекье тун патал, – акъвазрай.

¹¹ Гьаруна вичин гунагьдай къурбанд тир жунгав гъурай ва вичихъ ва вичин кӀвалихъ гъил къахчунин серенжем кьиле тухурай. И жунгав тукӀурай,

¹² ахпани Реббидин вилик квай къурбангандилай къачунвай кузвай цӀивинар авай гум гудай хекендаз ва гьакӀни хуш атирдин ни галай куьлуь авунвай затӀарин ацӀай кьве гъаб къачуна, пердедин кьулухъ тухурай.

¹³ Ада Реббидин вилик а атир квай хуш ни галай затӀар цӀивинрал эциграй, кудай затӀари гудай гумадин цифеди „Гунагьар алудзавай чка“ лугьудай Икьрардин сандухдин къапсах кӀевдайвал – тахьайтӀа ам рекьида.

¹⁴ Идалай кьулухъ ада жунгавдин ивидикай къачуна, адак тӀуб кягъиз, адалди сандухдин къапсахдин рагъэкъечӀдай пад хъичинрай ва гьакӀни иридра Икьрардин сандухдин къапсахдин вилик пад хъичинрай.

¹⁵ Гьаруна кьун, халкьдин патай тир гунагьдай къурбанд, тукӀурай, адан иви пердедин кьулухъ тухурай ва гьа жунгавдин ивидал хьиз, Икьрардин сандухдин къапсах ва вилик пад хъичинрай.

¹⁶ ИкӀ ада Паквилерин Пак чкадин винел, гъил къахчунин серенжем кьиле тухудалди ада Исраилдин рухваяр чиркинвилерикай, абурун тахсиркарвилерикай, абурун вири гунагьрикай михьи ийида. Гьа икӀ ада Исраилдин рухвайрин, абурун чиркинвилин арада авай Гьалтунин Алачухдани авурай.

¹⁷ Гьарун гъил къахчунин серенжем кьиле тухун патал Паквилерин Пак чкадиз гьахьай чӀавуз ва анай экъечӀдалди Гьалтунин Алачухда са касни хьана виже къведач. ИкӀ ада вичихъ, вичин кӀвалихъ ва вири Исраилдин жемятдихъ гъил къахчунин серенжем кьиле тухуда.

¹⁸ Реббидин вилик квай къурбангандин патав фена, ада адалай гъил къахчунин серенжем кьиле тухурай. Жунгавдин иви ва кьунан иви къачуна къурбангандин вири крчарал алтадрай.

¹⁹ Ва ирид гъилера къурбанган тупӀалай ивидалди хъичинрай. ИкӀ ада къурбанган Исраилдин рухвайрин чиркинвилерикай михьда ва ам паквилиз акъудда.

²⁰ Паквилерин Пак чкадин, Гьалтунин Алачухдин ва къурбангандин винел гъил къахчунин серенжем кьиле тухвана куьтягьайдалай кьулухъ, Гьаруна чан алай кьун гъана,

²¹ адан кьилел кьве гъилни эцигна, адан винел Исраилдин рухвайрин чӀуру крар ва тахсиркарвилер ва абурун вири гунагьар хиве кьуна, абур кьунан кьилел ракъурна кӀанда. Ва ада тайинарнавай са касдин гъилик кваз кьун кьурум галайвал ракъуррай.

²² И чӀавуз кьуна Исраилдин рухвайрин вири гунагьар инсандин кӀвач хкӀун тийидай чкадиз хутахда. Кьун кьурумдиз рекье туна,

²³ Гьаруна Гьалтунин Алачухдик фена, вичи Паквилерин Пак чкадиз гьахьдалди вилик алукӀай кушдин парталар хутӀунна, абур Алачухда туна кӀанда.

²⁴ Ада пак чкадал гъилер чуьхуьн къачурай ва вичин адетдин парталар ахлукӀрай. Ахпа экъечӀна, идалди гьам вичелай, гьамни халкьдилай гъил къахчунин серенжем кьилиз акъудун яз, вичин патай кунуг, халкьдин патай кунуг авурай.

²⁵ Ва къурбангандал гунагьдай къурбандрин пини курай.

²⁶ Азазелан кьилив кьун тухвай касди вичин парталар ва вич чуьхвена кӀанда; идалай кьулухъ адавай кундал хквез жеда.

²⁷ Чеб гунагьдай къурбанд авур ва чпин иви ана гъил къахчунин серенжем кьиле тухун патал Паквилерин Пак чкадиз гъайи жунгавни кьун кундин сергьятрилай анихъ акъудна кӀанда; абурукай амукьай хамар, як ва нежесар кана кӀанда.

²⁸ ЦӀай ягъайда вичин парталар ва вич чуьхвена кӀанда; идалай кьулухъ адавай кундал хквез жеда.

²⁹ Ингье квез даиман къалурнавай къайда: ирид лагьай вацран цӀуд лагьай юкъуз сив хуьх ва квекай садани кӀвалах тавурай – я чкадин агьалиди, я масанай атана куь арада уьмуьр тухуз ацукьнавайда.

³⁰ ГьикӀ лагьайтӀа и юкъуз куь винел, куьн куь гунагьрикай михьи авун патал, гъил къахчунин серенжем кьиле тухуда; и чӀавуз куьн Реббидин вилик михьибур жеда.

³¹ Им куьн патал тамам, Кишдин ял ягъунин югъ жеда; сивер хуьх. Им даиман къалурнавай къайда я.

³² Гъил къахчунин серенжем, бубадин ирс давамаруналди, вичивай чӀем гуьцӀна хахамвилиз акъуднавай чӀехи хахамди кьиле тухун лазим я. Ада кушдин парталар, пак парталар, алукӀрай,

³³ ва Паквилерин Пак чка, Гьалтунин Алачух ва къурбанган патал гъил къахчунин серенжем кьиле тухурай, хахамар патал ва жемятдик квай вири халкь патал гъил къахчунин серенжем кьиле тухурай.

³⁴ И къалурнавай къайда куьн патал даимди я: йиса садра абур чпин вири гунагьрикай азад ийиз, Исраилдин рухвайрилай гъил къахчунин серенжем кьиле твах». Гьарунани Реббиди Мусадиз эмир гайивал кьилиз акъудна.