Леви 15 - Пак Калам

Бедендин чиркинвиликай

¹ Реббиди Мусадизни Гьаруназ лагьана:

² «Исраилдин рухвайрив хабар агакьара: „Вичин эркеквилин лишандай чара жедай затӀар хкатзавай итим чиркин я.

³ Гьар гьихьтин хьайитӀани хкатзавай затӀуни – ам эркеквилин лишандай ара датӀана кӀвахьзаватӀани, ва я ара атӀуз кӀвахьайтӀани, итим чиркин ийизва.

⁴ Хкатзавай затӀар кӀвахьзавай итим къаткай мес чиркин я; ам ацукьай затӀарни чиркин я.

⁵ Адан месик хкӀур касди вичин парталар ва вич чуьхвена кӀанда – ва няналди чиркин яз амукьда.

⁶ Вичиз хкатунар авай итим ацукьай чкадал ацукьай гьар сада вичин парталар ва вич чуьхвена кӀанда – ва няналди чиркин яз амукьда.

⁷ Ихьтин итимдик хкӀур гьар сада вичин парталар ва вич чуьхвена кӀанда – ва няналди чиркин яз амукьда.

⁸ Ихьтин итимди вич михьи тир касдал тфу вегьейтӀа ада вичин парталар ва вич чуьхвена кӀанда – ва няналди чиркин яз амукьда.

⁹ Ихьтин итим акьахай пурар чиркин я.

¹⁰ Са гьихьтин ятӀани затӀ адан кӀаник хьанатӀа, адак хкӀур гьар сад няналди чиркин яз амукьда, ни ам хкажайтӀа, вичин парталар ва вичи-вич чуьхвена кӀанда – ва няналди чиркин яз амукьда.

¹¹ Вичикай хкатзавай затӀар авай итимди, гъилер чуьхуьн тавуна, маса касдик кягъайтӀа, а касди вичин парталар ва вич чуьхвена кӀанда – ва няналди чиркин яз амукьда.

¹² Ихьтин итимди хъенчӀин къапуник кягъайтӀа, къаб хана кӀанда, амма а къаб кӀарасдинди ятӀа, ам чуьхвена кӀанда.

¹³ Вичин эркеквилин лишандикай затӀар хкатзавай итим сагъ хъхьай чӀавуз, ада, адалай кьулухъ ирид югъ гьисабна, парталар чуьхуьрай, авахьна физвай це эхъуьрай – ва михьи жеда.

¹⁴ Муьжуьд лагьай юкъуз лагьайтӀа ам, кьве тӀапӀас ва я кьве лиф къачуна, Реббидин вилик, Гьалтунин Алачухдин сивел атурай ва къушар хахамдив вахкурай.

¹⁵ Хахамди къушар къурбанд авуна кӀанда: сад – гунагьдай къурбанд яз, муькуьдини – кунуг. ИкӀ хахамди Реббидин вилик ам хкатзавай затӀарин чиркеривай михьи авуналди, адан винел гъил къахчунин серенжем кьиле тухуда.

¹⁶ Ахвара аваз мая авадарай итимди вичин вири беден чуьхуьн лазим я – ва няналди чиркин яз амукьда.

¹⁷ Вичел мая кӀвахьай парча ва я тумаждин гьар гьихьтин затӀ хьайитӀани чуьхвена кӀанда – ва няналди чиркин яз амукьда.

¹⁸ Гьа им вичихъ галаз итим къаткай ва мая авадарай папазни талукь я, – кьведни эхъуьн лазим я ва няналди чиркин яз амукьда.

¹⁹ Вичихъ вацран кьилер авай паб, абур себеб яз, ирид йикъан вахтуналди чиркин жеда. Адак хкӀур гьар вуж хьайитӀани няналди чиркин яз амукьда.

²⁰ Вацран кьилер авайла, ам къаткай затӀ чиркин я; ам винел ацукьай затӀни чиркин я.

²¹ Адан месик ни кягъайтӀа, гьада вичин парталар ва вич чуьхвена кӀанда – ва няналди чиркин яз амукьда.

²² Ам ацукьай затӀарик кягъайдани вичин парталар ва вич чуьхвена кӀанда – ва няналди чиркин яз амукьда.

²³ Са гьихьтин ятӀани затӀ ихьтин папан месерал ва я ам ацукьай затӀунал алаз хьайитӀа, а затӀуник кягъайди няналди чиркин жеда.

²⁴ Итим чин тийиз ихьтин папахъ галаз къаткайтӀа, вацран кьилери арадал гъанвай адан чиркинвал гьадални аватда; ам ирид юкъуз чиркин жеда ва къаткай месерни чиркин жеда.

²⁵ Папакай вацран кьилер тушиз иви кӀвахьзаватӀа ва я иви вацран кьилер давам жедайдалай гзаф кӀвахьзаватӀа, иви кӀвахьзавай вири вахтунда ам, вацран кьилер авайла хьиз, чиркин жеда.

²⁶ Иви кӀвахьзавай кьван ам къатканвай вири месерни, вацран кьилер авайла адан месер хьиз, чиркин я; ам ацукьнавай затӀни, адаз вацран кьилер авай хьиз, чиркин я.

²⁷ Ихьтин затӀуник кягъайди чиркин я; ада вичин парталар ва вич чуьхвена кӀанда – ва няналди чиркин яз амукьда.

²⁸ Иви кӀвахьун акъвазайла, папа ирид югъ гьисабна кӀанда – идалай кьулухъ ам михьи я.

²⁹ Муьжуьд лагьай юкъуз лагьайтӀа, ам кьве тӀапӀас ва я кьве лиф къачуна, хахамдин кьилив, Гьалтунин Алачухдин сивел атурай.

³⁰ Хахамди къушар къурбанд авун лазим я: сад – гунагьдай къурбанд яз, муькуьди – кунуг. ИкӀ хахамди Реббидин вилик ам хкатзавай затӀарин чиркерикай михьна и папалай гъил къахчунин серенжем кьиле тухуда.

³¹ Исраилдин рухваяр чиркинвиликай хуьх. Абуру чиркинвилелди чпин арада авай Зи Алачух чиркин авуртӀа, абур рекьида.

³² И къанун хкатдай затӀар кӀвахьзавайбур патал я: ахвара аваз вичин мая экъичуникди чиркин хьайи итим патал,

³³ вацран кьилер авай паб патал, хкатдай затӀар кӀвахьзавай вири итимарни папар патал ва гьакӀни чиркин тир папахъ галаз къаткай итим патал“».