Леви 13 - Пак Калам

Жузамдин гьакъиндай къайдаяр

¹ Реббиди Мусадизни Гьаруназ лагьана:

² «Инсандин хамунал жузамдин лишанар дакӀунвай чкаяр, рувар ва я лацу лекеяр пайда хьайитӀа, и кас хахам Гьарунан ва я адан эвледрикай садан, яни хахамдин кьилив тухвана кӀанда.

³ Хахам зарар хьанвай хамуниз килиграй; и чкадал алай чӀарар лацу хьанватӀа ва анал легъв хьанватӀа, им жузам я. Хахамдиз ихьтин гьал жагъайтӀа, ада начагъди чиркин тирди малумарун лазим я.

⁴ Амма хамунал лацу лекеяр алаз, легъв алачиз хьайитӀа, ва и чкадал экъечӀнавай чӀарар лацу хьанвачтӀа, хахамди начагъди ирид йикъан вахтуналди масабурукай чара авурай.

⁵ Ирид лагьай юкъуз хахам адаз кихлиграй. Хахамдиз зарар хьанвай чка дегиш хьанвачирди ва азар хам тирвал чкӀун тавунвайди жагъайтӀа, ада начагъди мад са ирид юкъуз масабурукай чара авурай,

⁶ ирид лагьай юкъузни адаз мад кихлиграй. Зарар хьанвай чка алахьнаватӀа ва азар хам тирвал чкӀанвачтӀа, хахамди начагъзавайди михьи тирди малумарун лазим я: ибур гьакӀан рувар я. А касди вичин парталар чуьхуьрай, ам михьи хъжеда.

⁷ Амма ада вич хахамдиз къалурайдалай ва ам михьи тирди малумарайдалай кьулухъ рувар хам тирвал чкӀайтӀа, ада вич мад гъилера хахамдиз къахлурун лазим я.

⁸ Хахамдиз рувар хам тирвал чкӀанваз жагъайтӀа, ада начагъди чиркин тирди малумарна кӀанда: им жузам я.

⁹ Вичик жузам квайдан шак алай кас хахамдин кьилив тухвана кӀанда.

¹⁰ Хахамдиз хамунал дакӀунвай лацу чкаяр алаз ва а чкайрал алай чӀарар лацу хьанвайди, якни дуьздал алайди жагъайтӀа,

¹¹ им азар квайдак хкат тийидай жузам ква лагьай чӀал я. Хахамди и кас чиркин тирди малумарна кӀанда; ам чара авун герек туш, – ам чиркин я.

¹² Амма жузам хьиз хам тирвал чкӀана ва начагъди кьилелай кӀвачелди кьунватӀа, хахамдин вилери кьатӀудай кьван,

¹³ хахамдиз жузамди азар квайдан вири беден кьунваз акуртӀа, ада и кас михьи тирди малумарун лазим я. Вири санлай лацу хьанвайди михьи я.

¹⁴ Амма инсандин чан алай як дуьздал акьалтай йикъалай ам чиркин я.

¹⁵ Хахамдиз чан алай як акурла, ада азар квайди чиркин тирди малумарна кӀанда. Чан алай як дуьздал акьалтун чиркинвал я; им жузам я.

¹⁶ Амма чан алай як мад лацу хъхьайтӀа, а кас мад хахамдин кьилив хтурай.

¹⁷ Хахам адаз кихлиграй; зарар хьанвай чкайриз лацувал янаватӀа, хахамди азар квайди михьи тирди малумарун лазим я – ам михьи я.

¹⁸ Инсандин хамунал, вич ахпа квахьай буьвел экъечӀна,

¹⁹ адан чкадални лацу дакӀунвай чка ва я яруни-лацу леке пайда хьанватӀа, азар акатнавайди хахамдин кьилив фирай.

²⁰ Хахамдиз а чкадал легъв алаз ва анал алай чӀарарни лацу хьанвайди акуртӀа, ада азар квайди чиркин тирди малумарна кӀанда. Им буьвелдин чкадал арадал атанвай жузам я.

²¹ Амма хахамдиз анал лацу чӀарар ва легъв жагъун тавуртӀа ва лекени алахьнавайди малум хьайитӀа, азарди кьунвайди ирид юкъуз масабурукай чара авурай.

²² Леке хам тирвал чкайтӀа, хахамди и кас чиркин тирди малумарун лазим я: им азар я.

²³ Амма лацу леке дегиш тежез чкӀизвачтӀа, им гьакӀан буьвелди тунвай кьацӀ я, ва и чӀавуз хахамди азар квайди михьи тирди малумарун лазим я.

²⁴ Са кас са куь ятӀани канватӀа ва канвай чкадал алай чан алай якӀу яруни лацу ва я лацу ранг кьабулайтӀа,

²⁵ хахам а касдиз килиграй. Леке алай чкадин чӀарар лацу хьанватӀа ва легъв арадал атанватӀа – им канвай чкадал жузам арадал атанва лагьай чӀал я. И чӀавуз хахамди азар квайди чиркин тирди малумарун лазим я: им жузам я.

²⁶ Амма хахамдиз анал лацу чӀарар ва легъв жагъун тавуртӀа ва лекени алахьнаваз хьайитӀа, ада азар акатнавайди ирид йикъалди масабурукай чара авурай.

²⁷ Ирид лагьай юкъуз хахам адаз кихлиграй. Леке хам тирвал чкӀанватӀа, хахамди азар квайди чиркин тирди малумарна кӀанда: им жузам я.

²⁸ Амма лацу леке дегиш тежез, хам тирвал чукӀун тавуртӀа, ам алахьайтӀа, им куникди ганвай дакӀурвал я. Хахамди азар квайди михьи тирди малумарна кӀанда: им анжах куникди хьанвай кьацӀ я.

²⁹ Итимдин ва я папан кьилин, я тушни ченедин хам ярувал алаз дакӀун кваз тӀазватӀа,

³⁰ хахам и чкадиз килиграй. Хахамдиз легъв хьанвайди ва а чкадал алай чӀарарни кьери ва хъипибур тирди акуртӀа, ада азар квайди чиркин тирди малумарун лазим я: им кьилик ва я ченедик акатнавай гачал ва жузам я.

³¹ Амма хахамдиз гачал акатнавай чкадал легъв алачирди ва анал чӀулав чӀарар алачирди акуртӀа, ада начагъди ирид юкъуз масабурукай чара авурай.

³² Ирид лагьай юкъуз хахам азар акатнавай чкадиз кихлигун лазим я. Гачал чкӀанвачтӀа, ва и чкадал хъипи чӀарарни легъв пайда хьанвачтӀа,

³³ азар квайда, зарар хьанвай чкадик хкӀун тийидайвал, чӀарар турай ва хахамди ам мад са ирид юкъуз масабурукай чара авурай.

³⁴ Ирид лагьай юкъузни хахам азарди кьунвайдаз кихлиграй. Гачал хам тирвал чкӀанвачтӀа, ва легъвни арадал атанвачтӀа, хахамди азар квайди михьи тирди малумарна кӀанда. А касди вичин парталар чуьхуьрай – ам михьи жеда.

³⁵ Амма, начагъди михьи тирди малумарайдалай кьулухъ, гачал хам тирвал чкӀанватӀа,

³⁶ хахам адаз мад кихлиграй, хахамдивай, ам чкӀанвайди акуна, хъипи чӀарар жагъур тавуртӀани жеда: азар квайди михьи туш.

³⁷ Амма зарар хьанвай чкадин акунар дегиш хьанвачтӀа ва анай чӀулав чӀарар экъечӀнаватӀа, им гачал алатнава ва азарди кьунвайди михьи я лагьай чӀал я. Хахамди ам михьи тирди малумарун лазим я.

³⁸ Итимдин ва я папан хамунал лацу лекеяр пайда хьайитӀа,

³⁹ хахам азар квайдаз килиграй. Хахамдиз и лекейрин лацувал алахьнавайди акуртӀа, им хамунал гьакӀан лацу тӀехвер пайда хьанва лагьай чӀал я. Азарди кьунвайди михьи я.

⁴⁰ Садан кьилин кукӀвалай чӀар фенватӀа, им анал алай чӀар фейи кьецӀил чка я, ам михьи я.

⁴¹ Садан пелен кьилелай виликай чӀар фенватӀа, им анлай чӀар фенвай кьецӀил чка я, ам михьи я.

⁴² Амма кьилин кукӀвал алай кьецӀил чкадал ва я пелев гвай кьецӀил чкадал яруни лацу рангунин леке пайда хьайитӀа, им а чкадал жузам арадал атанва лагьай чӀал я.

⁴³ Хахамдиз а касдиз килигайла, адан кьилин кукӀвал алай кӀецӀил чкадал ва я пелев гвай кьецӀил чкадал яруни лацу дакӀур, вич бедендал жедай жузамдиз ухшар тир чка алаз акуртӀа,

⁴⁴ им а касдик жузам ква ва ам чиркин я лагьай чӀал я. Хахамди ам чиркин тирди малумарун лазим я: адан кьилик жузам ква.

⁴⁵ Жузам азар квайдал кукӀвар хьанвай парталар хьана кӀанда адан чӀарарни авадарун лазим я; ада вичин чин спелрилай ва гьабурулай агъуз кӀевна кӀанда. Ва ада гьарай авурай: „Чиркин я, чиркин я!“

⁴⁶ Азар куьтягь жедалди ам чиркин яз амукьда. Ам чиркин я ва гьавиляй текдиз уьмуьр тухвана кӀанда: адан кӀвал кундилай къерехда хьуй».

ЗатӀарал жедай мурсуникай

⁴⁷ Ребби давамарна: «Мурс парталрал, сун ва я кушдин,

⁴⁸ кушдин ва я сун парчадин яргъивилихъди тир я тушни гьяркьуьвилихъди тир гъаларал, тумаждал, тумаждикай тир гьар гьихьтин хьайитӀани затӀарал, парталрал пайда хьайитӀа,

⁴⁹ парталрал ва я тумаждал, парчадин яргъивилихъди, я тушни гьяркьуьвилихъди тир гъаларал, тумаждикай тир са затӀунал и леке къацувал квай ва я ярувал квай рангунинди ятӀа, им мурс я лагьай чӀал я; и затӀ хахамдиз къалурна кӀанда.

⁵⁰ Хахам и шейиниз килиграй ва ирид юкъузни йифиз ам гъилик тийидайвал авурай.

⁵¹ Ирид лагьай юкъуз хахамдиз леке партал тирвал чкӀанвайди акуртӀа, парчадин яргъивилихъди ва я гьяркьуьвилихъди тир гъаларай, я тушни тумаждин затӀунайтӀуз, ам вуч патал тайинарнавайди яз хьайитӀани, им зиян квай мурс я лагьай чӀал я, и затӀ чиркин я.

⁵² И чӀавуз и партал, и яргъивилихъди тир ва я гьяркьуьвилихъди тир гъалар, сун ва я кушдин и парча, я тушни тумаждин и затӀ, и леке акатнавай гьар вуч хьайитӀани, кана кӀанда. Им зиян квай мурс я; адаз цӀай ягъун лазим я.

⁵³ Амма хахамдиз леке парча, яргъивилихъди ва я гьяркьуьвилихъди тир гъалар, тумаждин шей тирвал чкӀун тавунвайди акуртӀа,

⁵⁴ ада леке алай и шей чуьхуьн эмир авурай, ва мад ирид юкъуз ам гъилик тийидайвал авурай.

⁵⁵ Чуьхвейдалай кьулухъ хахамдиз лекеди, ам чкӀанвачтӀани, ранг дегиш тавунвайди акуртӀа, и затӀ чиркин я. Вуна ам кана кӀанда: леке астӀар патал алаз хьайитӀани, винел патал алатӀани – и затӀ чӀур хьанва.

⁵⁶ Амма хахамдиз чуьхвейдалай кьулухъ леке алахьнавайди акуртӀа, ада парчадин ва я тумаждин, яргъивилихъди тир ва я гьяркьуьвилихъди тир гъаларин и чӀук атӀурай.

⁵⁷ Леке парчадал, яргъивилихъди тир ва я гьяркьуьвилихъди тир гъаларал, тумаждин затӀунал мадни пайда хьайитӀа – им ам мад чкӀизва лагьай чӀал я; и чӀавуз вуна леке алай затӀ кана кӀанда.

⁵⁸ Амма чуьхвейдалай кьулухъ парчадилай, яргъивилихъди ва я гьяркьуьвилихъди тир гъаларилай, тумаждин гьар гьихьтин хьайитӀани затӀунилай и леке алатайтӀа, затӀ мад гъилера чуьхуьрай ва ам михьи жеда.

⁵⁹ Сун ва я кушдин парчадал, яргъивилихъди ва я гьяркьуьвилихъди тир гъаларал ва тумаждин вири шейэрал мурс пайда хьайила авай къанун гьа ихьтинди я – гьа и къайдада шей михьи яни, я тушни чиркин яни малумарда».