Леви 11 - Пак Калам

Михьивал хуьнин къайдаяр ( 11–15 кьилер) Гьалал ва гьарам недай затӀар

¹ Реббиди Мусадизни Гьаруназ лагьана:

² «Исраилдин рухвайрив хабар агакьара: „Ингье, квевай нез жедай гьайванар. Чилел алай кьван ири гьайванрикай

³ квевай кьвечхел кикер алай ва гирнагъдай вири гьайванар нез жеда.

⁴ Гирнагъдай ва кьвечхел кикер алай гьайванрикай деве немир, ам гирнагъдайди ятӀани, амма адал кьвечхел кикер алач, ва ам куьн патал гьарам я,

⁵ япатӀ-къуьр, ам гирнагъдайди ятӀани, амма адал кьвечхел кикер алач, ва ам куьн патал гьарам я,

⁶ къуьр, ам гирнагъдайди ятӀани, амма кьвечхел кикер адаз авач, ва ам куьн патал гьарам я

⁷ ва вак, ам кек алай гьайван ятӀани, адан кикер кьвечхел ятӀани, амма ада гирнагъ ийизвач, ва ам куьн патал гьарам я.

⁸ Як абурун немир, лешерик абурун хкӀамир; абур куьн патал гьарам я.

⁹ Цин чан алай затӀарикай – гьуьлерин ва вацӀарин це чка кьунвайбурукай, – чпиз лувар ва хъуьруьшар авайбур неъ.

¹⁰ Амма чпел цин гъетрен лувар ва хъуьруьшар алачирбур, – гьуьле ва вацӀа жедай чан алайбур, це гьарнихъ къекъведай чан алай куьлуь затӀар, цин амай чан алай затӀар – абур куьн патал гьарам я.

¹¹ Абур куьн патал чиркин я: абурун як немир, гиликьнавай чан алай затӀариз нифрет ая.

¹² Це уьмуьр тухузвай, чпел цин гъетрен лувар ва хъуьруьшар алачир вири гьайванар, – абур куьн патал гьарам я.

^13-19 Ингье куьн патал гьарам къушар, абур тӀуьна жедач: гьуьлуьн нуькӀ, маллакуткутӀ, кьаркьулув ва гьар жуьредин лекьер, къузгъунар, гьар жуьредин чинеругар, картар, лачинар, кӀвагъар, типӀер ва леглегар.

²⁰ Кьуд тапас квай лув гудай вири гьашаратар куьн патал гьарам я.

²¹ Амма квевай лув гудай кьуд тапасдин чан алай гьашаратарикай чпихъ и тапасрилай гъейри чилелай хкадарун патал акӀаж жедай кӀвачер квайбур ва гьабуруз ухшар лув галай ва галчӀур жедай гьашаратар нез жеда.

²² Гьа икӀ, квевай гьар жуьредин цицӀер нез жеда.

²³ Амма амай вири лув гудай кьуд кӀвач квай чан алай куьлуь затӀар куьн патал гьарам я.

^24-25 Ингье чеб себеб яз куьн чиркин хьун мумкин тир гьайванрин лешерикай ни хкӀуртӀа ва ни ахьтин леш хкажайтӀа, ам няналди чиркин яз жеда ва ада вичин парталар чуьхвена кӀанда ва няналди чиркин яз амукьда.

²⁶ Чпин кикер кьвечхел тушир ва я чпи гирнагъ тийидай кек алай вири гьайванар куьн патал гьарам я; абурун жендекдик ни хкӀуртӀа, гьам чиркин жеда.

²⁷ Чеб тапасрал къекъведай кьуд кӀвач квай вири гьайванар куьн патал гьарам я. Абурукай садан лешиник ни хкӀуртӀа, гьам няналди чиркин жеда,

²⁸ ва ни ихьтин леш хкажайтӀа, ада вичин парталар чуьхуьн лазим я, ва ам няналди чиркин яз амукьда. Абур куьн патал гьарам я.

^29-30 Чилелай гьарнихъ къекъведай чан алай куьлуь затӀарикай куьн патал муьнуьгъ, кьиф, цимил кьиф, гьар жуьредин чурчулар ва хамелун гьарам я.

³¹ Ибур чан алай куьлуь затӀарикай куьн патал чиркин я. Ни ихьтин гиликьнавай затӀуник хкуртӀа, ам няналди чиркин жеда.

³² Чан алачир ихьтин затӀ квел аватайтӀа, кӀандатӀа ам кӀарасдикай, парчадикай, хамуникай ва я шешелдин шихиникай хьурай, ам чиркин жеда. Ихьтин шей са кар патал герек ятӀа, ам цик кутуна кӀанда; ам няналди чиркин жеда, ахпа михьи хъжеда.

³³ Ихьтин чиркинрикай сад чепин къапуниз аватайтӀа, ана авай затӀ гьарамдиз элкъведа, къаб вични хана кӀанда.

³⁴ Чеб нез ихтияр авай затӀарал ихьтин къапуна авай яд авахьайтӀа, абур гьарамдиз элкъведа; гьакӀни вич хъвадай ихтияр авай хъвадай шейни, ам гьихьтин къапуна аваз хьайитӀани, гьарамдиз элкъведа.

³⁵ Ихьтин чан алай затӀ гиликьна гьи затӀунал аватайтӀани, гьа чка чиркин жеда: къул ва я пич чукӀурна кӀанда – абур чиркин я; абур куьн патал чиркинбур жеда.

³⁶ Чешме ва я виче яд кӀватӀнавай фур михьи яз амукьда – амма ни а це авай гиликьнавай лешиник хкӀурайтӀа, ам чиркин жеда.

³⁷ Гиликьнавай леш чеб цана кӀанзавай тумарал аватайтӀа, абур михьи яз амукьда.

³⁸ Амма ам це авай тумарал аватайтӀа, абур куьн патал гьарам жеда.

³⁹ Недай ихтияр авай гьайван гиликьайтӀа, адан лешиник хкӀур гьар вуж хьайитӀани няналди чиркин яз амукьда.

⁴⁰ Ни и як туьртӀа, гьада вичин парталар чуьхвена кӀанда ва няналди чиркин яз амукьда. Ни ихьтин леш хкажайтӀа, гьада вичин парталар чуьхуьн лазим я ва няналди чиркин яз амукьда.

⁴¹ Чилин гьарнихъ къекъведай чан алай вири куьлуь шейэр гьарам я; абур тӀуьна виже къведач.

⁴² Абурун гьич са жуьрени немир: гьам галчӀур жез фидайбур, гьам кьуд тапасдал къекъведайбур ва я гзаф кӀвачер квайбур; абур вири гьарам я.

⁴³ Куьне куьн чан алай са жуьрединни куьлуь затӀаралди мурдар ийимир, – куьне абур себеб яз куьн чиркин ийимир.

⁴⁴ ГьикӀ лагьайтӀа, Зун Ребби, куь Аллагь я. Пак хьухь, жуван паквал хуьх, гьикӀ лагьайтӀа Зун пак я. Чилелай гьарнихъ зверзавай чан алай куьлуь затӀар себеб яз чиркинбуруз элкъвемир.

⁴⁵ ГьикӀ лагьайтӀа Зун – куь Аллагь хьун патал, куьн Мисридай ахкъудай Ребби я. Гьавиляй пак хьухь, гьикӀ лагьайтӀа Зун пак я.

⁴⁶ Им гьайванрин, къушарин, це гьерекатзавай чан алай гьар са затӀунин, ва чилин гьарнихъ къекъвезвай чан алай затӀарин гьакъиндай къанун я, –

⁴⁷ михьиди чиркиндакай ва чеб недай ихтияр авай гьайванар недай ихтияр авачир гьайванрикай чара авун патал“».