Леви 10 - Пак Калам

Надабанни Абигьудан кьиникь

¹ Гьарунан рухваяр тир Надабани Абигьуда гум гудай чпин алатар къачуна ва абура жуьгьенар ва хуш ни галай затӀар эцигна ва, Реббиди чпиз икӀ авун эмир авунвачиртӀани, Адан вилик ихтияр таганвай цӀай гъана.

² Реббидин патай тир цӀай атана ва абур кана – абур Реббидин вилик кьена.

³ И чӀавуз Мусади Гьаруназ лагьана: «Ингье гьа идакай тир Реббиди лагьайди: „За Жуван мукьув авунвайбуруз Жуван паквал къалурда, вири халкьдин вилик Жуван Баркалла малумарда“». Гьарун кисна.

⁴ Мусади Гьарунан ими Узиялан рухваяр тир Мишаилазни Элцафаназ эверна ва абуруз лагьана: «Инал ша. Куь мукьвайрин беденар пак чкадилай къачуна, кундилай анихъ алуд».

⁵ Абурни атана, абурун парталрилай кьуна, Мусади лагьайвал, кундилай анихъ алудна.

⁶ И чӀавуз Мусади Гьаруназ ва адан рухваяр тир Элазараз ва Итамараз лагьана: «ЧӀарар чукӀурмир, квел алай парталар къазунмир, тахьайтӀа куьн рекьида ва вири эл Аллагьдин хъилек акатда. Амма куь стхаяр, яни Исраилдин вири рухваяр, Реббиди кьиле тухвай и кунихъ шехьрай.

⁷ Амма, куьн текьин патал, куьн Гьалтунин Алачухдин сивелай яргъал элячӀмир, квел алайди Реббидин патай агакьнавай гуьцӀдай чӀем я эхир». Абурни Мусадин чӀалаз килигна.

Хахамрин везифаяр

⁸ Реббиди Гьаруназ лагьана:

⁹ «Я вуна, я ви эвледри Гьалтунин Алачухдик къведай чӀавуз чехирни буза хъвана жедач, тахьайтӀа куьн рекьида. Им квез даиман къалурнавай къайда я, вири несилар патал.

¹⁰ Куьн пакди напакдакай ва чиркиндакай михьиди чара авуниз

¹¹ ва Исраилдин рухвайриз Реббиди абуруз Мусадин мецелай ганвай къайдаяр чируниз мажбур я эхир».

¹² Мусади Гьаруназ ва адан амай рухваяр тир Элазараз ва Итамараз лагьана: «Реббидиз кудай къурбанддикай амай фан къурбанддикай къачу ва адакай тӀили фу гьазурна ам къурбангандин патав неъ. И къурбанд паквилерин паквал я.

¹³ Ам пак тир чкадал неъ. Реббидиз кудай къурбандрин и пай ваз ва ви эвледриз талукь я. Заз гьа ихьтин эмир авунва.

¹⁴ Къурбанд ийизвай гьайвандин зурзурзавай хур ва хкажзавай ятур вавай ва ви рухвайривайни рушаривай са михьи чкадал туьртӀа жеда. Исраилдин рухвайри ийизвай суварин вири къурбандрин и пай ваз ва ви эвледриз талукь я.

¹⁵ Абуру Реббидиз кудай къурбанддин пидихъ галаз санал хкажай ятур ва зурзурай хур, вуна абур Реббидин вилик зурзун-къурбанд яз зурзурун патал, вахкун лазим я. Им, Реббиди эмир гайивал, асирдилай асирдалди ваз ва ви эвледриз акъуднавай пай я».

¹⁶ Мусади гунагьдай къурбанд тир кьун гьиниз фена лугьуз хабарар кьуна. КилигайтӀа, адаз цӀай яна канвай. Мусадиз Гьарунан амай рухваяр тир Элазаракай ва Итамаракай хъел атана ва абуруз лагьана:

¹⁷ «Куьне гунагьдай къурбанддин як са пак чкадал вучиз тӀуьнач? Ам паквилерин паквал я эхир; ам куьне Реббидин вилик гъил къахчунин серенжем кьиле тухун ва идакди элдилай тахсирар алудун патал квез ганвайди я!

¹⁸ Нагагь и къурбанддин иви пак чкадиз гъанвачиртӀа, куьне, гьа за квез эмир авурвал, къурбанд пак тир чкадал тӀуьна кӀандай».

¹⁹ Гьаруна Мусадиз лагьана: «Къе зи рухвайри Реббидиз гунагьдай къурбанд ва кунуг авуна, ахпани чав гьа чи кьилел атайди агакьна. Чна къе гунагьдай къурбанддин як тӀуьнайтӀа, Реббиди и кӀвалах хъсан яз гьисабдайни?»

²⁰ Мусади и гафариз яб гана ва рази хьана.