Леви 1 - Пак Калам

Къурбанд авунин къанунар ( 1–7 кьилер) Кунуг

¹ Реббиди Мусадиз Гьалтунин Алачухдай эверна ва Мусадиз лагьана:

² «Исраилдин рухваяр хабардар ая: „Квекай сада Реббидиз къурбанд ийизватӀа, къурбанд гьам карч алай ири гьайванрикай, гьамни карч алай куьлуь гьайванрикай ийиз жеда.

³ Ада карч алай ири гьайвандин кунуг ийизватӀа, и кар патал са рехнени квачир жунгав хкяна кӀанда. Ада, Ребби къурбанддилай рази жедайвал, жунгав Гьалтунин Алачухдин сивел акъвазаррай.

⁴ Ада жунгавдин кьилел вичин гъилер эциграй. Гьа чӀавуз, къурбанд ийизвай касдин гунагьрилай гъил къахчудайвал, и къурбанддилай рази жеда.

⁵ Жунгав Реббидин вилик тукӀурай, Гьарунан эвледрикай тир хахамри, къурбанддин иви къачуна, Гьалтунин Алачухдин вилик квай къурбанган – вири патарихъай адалди хъичинрай.

⁶ Къурбанддилай хам алажна, жендекни пайи-паяр авуна кӀанда.

⁷ Хахам Гьарунан эвледри къурбангандал цӀай авуна, аниз кӀарасар вегьирай.

⁸ Абуру къурбанддин кӀусар, ва гьам пи, гьамни кьил галаз, къурбангандал кузвай кӀарасрин винел эциграй.

⁹ Жунгавдин къенер ва кӀвачер чуьхвена кӀанда. Хахамди абур вири къурбангандал курай – гьа им Реббидиз кудай къурбанд, Адаз хуш тир, хуш ни галай гум, кунуг жеда.

¹⁰ Са ни ятӀани кунуг карч алай куьлуь гьайванрикай гьерерикай ва кьунарикай, ийиз хьайитӀа, ада гьер ва я кьун са рехнени квачирди къачуна кӀанда.

¹¹ Ва ам Реббидин вилик къурбангандин кефер патахъ тукӀурай, хахамрини къурбанган къурбанддин ивидалди вири патарихъай хъичинрай.

¹² Жендек, кьил атӀана ва пидикай михьна, пайи-паяр авуна кӀанда, ва хахамри абур вири къурбангандал кузвай кӀарасрин винел эциграй.

¹³ Къурбанддин къенер ва кӀвачер це чуьхвена кӀанда. Ва хахамди къурбанд авун кьиле тухурай – вири ибур къурбангандал курай. Гьа им Реббидиз кудай къурбанд, Адаз хуш тир, хуш ни галай гум, кунуг жеда.

¹⁴ Са ни ятӀани Реббидиз кунуг къушракай ийизватӀа, ада къурбанд авун патал лиф ва я тӀапӀас къачун лазим я.

¹⁵ Хахамди къуш къурбангандин патав гъана, адан гардан атӀана ва къурбангандал кун лазим я, иви лагьайтӀа къурбангандин цлал кужумна кӀанда.

¹⁶ Жендекдикай шункӀ ана авай кьван тӀуьнни галаз галудрай ва ам вири къурбангандин рагъэкъечӀдай патахъ галай руьхъ ичӀирдай чкадал гадаррай.

¹⁷ Лувар кьуна, къушран жендек винелай тӀимил къазунрай, амма ам кукӀвар тавурай. Ва хахамди ам къурбангандал, кузвай кӀарасрал курай. Гьа им Реббидиз кудай къурбанд, Адаз хуш тир, хуш ни галай гум, кунуг жеда.