Кьурумда 8 - Пак Калам

Чирагъар эцигнавай къайда

¹ Реббиди Мусадиз лагьана:

² «Гьарунахъ галаз рахух ва адаз лагь: „Вуна ирид чирагъ эцигдайла, абуру чирагъгандин вилик пад экуь авурай“».

³ Гьарунани гьа икӀ авуна. Ада, Реббиди Мусадиз гьикӀ эмир ганайтӀа, чирагъар абуру чирагъгандин вилик патаз экв гудайвал эцигна.

⁴ Ингье чирагъган гьикӀ тӀуькӀуьр хьанвайтӀа: ам гатанвай къизилдикай раснавай – дибдилай цуькверал кьван. Чирагъган Реббиди Мусадиз къалурай чешнедиз килигна туькӀуьрнавай.

Левияр михьивилизни паквилиз акъудун

⁵ Реббиди Мусадиз лагьана:

⁶ «Левияр амай Исраилдин рухвайрикай чара ая ва абур михьивилиз акъуд.

⁷ Абур михьивилиз акъудун патал икӀ ая: абур михьивилиз акъуддай целди хъичина, ва абуру вири беден турай ва парталар чуьхуьрай. ИкӀ абур михьи жеда.

⁸ Абуру лап хъсан гъуьруькай къачунвай ва чӀем какадарнавай лазим тир фан къурбандни галаз кунуг патал таза жунгав къачурай, вуна лагьайтӀа гунагьдай къурбанд яз кьвед лагьай таза жунгав къачу.

⁹ Левияр Гьалтунин Алачухдин вилик гъваш ва Исраилдин вири эл кӀватӀа.

¹⁰ Левияр Реббидин вилик акъвазара, ва исраилвийри абурал гъилер эциграй.

¹¹ Гьаруна левияр, абурувай Реббидиз къуллугъ ийиз жедайвал, зурзун-къурбанд яз Реббидиз акъудрай.

¹² Левийри жунгаврин кьилерал гъилер эцигайла, левийрин гунагьрилай гъил къахчун патал са жунгав Реббидиз гунагьдай къурбанд ая, муькуьдини – кунуг.

¹³ Левияр Гьарунанни адан рухвайрин вилик акъвазара, ва абур, зурзун-къурбанд яз, Реббидиз акъуд.

¹⁴ ИкӀ вуна левияр амай Исраилдин рухвайрикай чара ийида, ва левияр Зибур жеда.

¹⁵ Вуна левияр михьивилиз акъудайла ва абур зурзун-къурбанд яз акъудайла, абур, къуллугъун патал, Гьалтунин Алачухдиз гьахьрай.

¹⁶ Абур, чеб михьиз Зав вахкун лазим тир Исраилдин рухваяр я. За абур Жуваз Исраилдин рухвайри гьар гьим хьайитӀани сифте веледдин, сифте ругулдин чкадал къачузва.

¹⁷ Исраилдин рухвайрин сифте ругул – инсандин ва я гьайвандин – Заз талукь я. За абур, Мисрида авай сифте ругулар рекьидайла, Жуваз чара авунай.

¹⁸ За левияр Исраилдин сифте рухвайрин чкадал къачуна.

¹⁹ За левияр, абуру исраилвийрин чкадал Гьалтунин Алачухда къуллугъ авун ва абур патал гунагьрилай гъил къахчун патал, Гьаруназ ва адан рухвайриз Исраилдин рухвайрин патай садакьа яз тайин авунва. И чӀавуз Исраилдин рухваяр лагьайтӀа ибадатханадиз мукьва жедач ва абурук са балани акатдач».

²⁰ Мусади, Гьаруна ва Исраилдин вири элди левийриз Реббиди Мусадиз лагьайвал дуьм-дуьз гьакӀ авуна.

²¹ Левийри чеб михьивилиз акъудна ва парталар чуьхвена. Гьаруна абур зурзун-къурбанд хьиз Реббидиз акъудна, ва абур михьивилиз акъудун патал гунагьрилай гъил къахчунин серенжем кьиле тухвана.

²² Идалай кьулухъ левияр Гьарунан ва адан рухвайрин гъилик кваз къуллугъ авун патал Гьалтунин Алачухдиз гьахьна ва левийриз Реббиди Мусадиз гьикӀ эмирнайтӀа, гьакӀ авуна.

²³ Реббиди Мусадиз лагьана:

²⁴ «Им левийриз талукь я: къанни вад ва гьадалай гзаф йисар хьанвай итимар Гьалтунин Алачухда чпи тамамарна кӀанзавай, чпин хиве тунвай крарив эгечӀрай,

²⁵ амма яхцӀурни цӀуд йис тамам хьайила, датӀана къуллугъ авуникай къерех хьурай ва мад къуллугъ хъувун тавурай.

²⁶ Абурувай чпин стхайриз Гьалтунин Алачухда чпин везифаяр кьилиз акъудунин карда куьмекар гуз жеда, амма чпи къуллугъ тавурай. Идакди вуна левийриз чпин везифаяр виле акьадайвал ийида».