Кьурумда 6 - Пак Калам

Незуьрар патал къайдаяр

¹ Реббиди Мусадиз лагьана:

² «Исраилдин рухвайрихъ галаз рахух ва абуруз лагь: „Итимди ва я папа вич Реббидиз бахш авунва лагьана кьетӀен незуьрвилин вяд хиве кьуртӀа,

³ абуру чехирдикай ва бузадикай гъил хуьрай ва чехирдикай ва я бузадикай гьазурнавай сирке гъилик тавурай. Абуру ципицӀрин миже хъвана ва ципицӀарни кишмишар тӀуьна виже къведач.

⁴ Незуьрвилин вядеда авайла, абуру ципицӀдин чӀередилай тир гьич са затӀни тӀуьна жедач – гьатта ципицӀрин цилер ва хамарни.

⁵ Незуьрвал гвай вири вахтунда абурун кьилик уьлгуьч хкӀун тавурай. Абуру Реббидиз акъуднавай вахт куьтягь жедалди, абур пак яз хьурай, абуру кьилел алай чӀарар туна яргъи авурай.

⁶ Чеб Реббидиз акъуднавай вири вахтунда абуруз мейитдиз мукьва жез ихтияр авач.

⁷ Гьатта абурун буба, диде, стха ва я вах кьейитӀани, абур себеб язни абуруз чеб чиркин ийидай ихтияр авач, вучиз лагьайтӀа абуру чеб Аллагьдиз акъудунин лишан абурун кьилел ала.

⁸ Чеб незуьрар тир вири вахтунда абур Ребби патал паквилиз акъуднава.

⁹ Абур алай чкадал са вуж ятӀани садлагьана кьейитӀа, ва абуру бахш авунвай чӀарар чиркин хьайитӀа, абуру чеб михьивилиз акъуддай юкъуз – ирид лагьай юкъуз – кьил турай.

¹⁰ Муьжуьд лагьай юкъуз абуру Гьалтунин Алачухдин сивел хахамдиз кьве тӀапӀас ва я кьве лиф гъурай.

¹¹ Хахамди къушарикай сад гунагьдай ийизвай, муькуьдини кунуг яз къурбанд авурай. Им абур патал гъил къахчунин серенжем кьиле тухун жеда, вучиз лагьайтӀа мейитдин патав хьуникди абур чиркин хьанвай. Лап гьа юкъуз абуру кьил мад паквилиз акъудрай.

¹² Абуру незуьрвилин девирда чеб Реббидиз акъудрай ва са йис хьанвай кьар тахсир хиве кьунин къурбанд авурай. Вилик квай йикъар гьисаба кьадач, вучиз лагьайтӀа абуру чпин незуьрвал чиркин авунай.

¹³ Ам акъудунин вахт акьалтӀайла, ингье незуьрдин гьакъиндай къанун: ам Гьалтунин Алачухдин сивел гъана акъвазарна кӀанда.

¹⁴ Ада анал Реббидиз къурбанд авурай: йис хьанвай са рехнени квачир эркек кьар – кунуг яз, са йис хьанвай рехне квачир шек – гунагьдай къурбанд яз, ва рехне квачир гьер – суварин къурбанд яз

¹⁵ ва абуруз лазим тир фанни чехирдин къурбандарни ва са зинбилда авай чӀемеда какадарнавай ва лап хъсан гъуьруькай гьазурнавай тӀили фар, чӀем алтаднавай тӀили лавашар.

¹⁶ Хахамди и затӀар Реббидин вилик эцигда ва гунагьдай къурбандар ва кунугар ийида.

¹⁷ Ахпа ада Реббидиз зинбилда авай тӀили фарни галаз суварин къурбанд яз гьер бахш ийида, гьакӀни лазим тир фан ва чехирдин къурбанд кьиле тухуда.

¹⁸ Гьалтунин Алачухдин вилик незуьрди вич талукь авунин чӀарар турай. Ада абур къачурай ва ада абур суварин къурбанддин кӀаник кузвай цӀуз вегьирай.

¹⁹ Незуьрди вич талукьарунин чӀарар турдалай кьулухъ, хахамди адав гьерен рганвай кӀулни ва зинбилдай къачунвай тӀили фуни лаваш гъилерал эциграй.

²⁰ Хахамди абур Реббидин вилик зурзуррай: абур пак я ва юзурдай хурун кӀарабни хкаждай ятур хьиз, хахамдиз хьунухь лазим я. Идалай кьулухъ незуьрдивай чехир хъваз жеда.

²¹ Вяд авурвал, незуьрвиляй Реббидиз вичин агьвалди мумкинвал гузвайдалай гъейри, садакьа акъудзавай незуьрдин гьакъиндай къанун гьа ихьтинди я. Ада вичи хиве кьунвай вяд незуьрвилин гьакъиндай къанунда къалурнавайвал кьиле тухурай“».

Хахамдин хийир-дуьа

²² Реббиди Мусадиз лагьана:

²³ «Гьаруназ ва адан рухвайриз лагь: „Исраилдин рухвайриз икӀ лугьуналди, хийир-дуьа ая:

²⁴ ‹Ваз Реббиди хийир-дуьа авурай ва вун хуьрай;

²⁵ Реббиди Вичин нур авай чинавди вун экуь авурай, ва ваз регьим авурай;

²⁶ Реббиди вахъ Вичин чин элкъуьр авурай ва ваз саламатвал гурай›“.

²⁷ ИкӀ абуру Зи тӀвар Исраилдин рухвайрин винел хуьниз эверда, ва За абуруз хийир-дуьа ийида».