Кьурумда 4 - Пак КаламИсраилвияр рекье гьатайла левийрин къуллугъ 1 Реббиди Мусадизни Гьаруназ лагьана: 2 «Левийрин къегьатийрин хилек акатзавай тухумрин ва сихилрин кьадар тайинара. 3 Чпивай Гьалтунин Алачухда къуллугъ ийиз жедай къанни цӀудалай яхцӀурни цӀуд йисал къведалди йисариз акъатнавай итимрин кьадар гьисаба. 4 Ингье Гьалтунин Алачухда къегьатийрин къуллугъ: абуру паквилерин пак тир къаб-къажахдин къайгъу чӀугурай. 5 Кундиз рекье гьатун герек хьайила, Гьарунни адан рухваяр Алачухдиз гьахьна, Паквилерин Пак чка кӀевзавай перде алудрай ва ам Икьрардин сандухдин винелай вегьирай. 6 Абуру пердедин винел гьуьлуьн кицӀин хамар эциграй, винелай ачухнавай вили перде экӀя авурай ва паяяр турай. 7 Абуру Реббидин вилик жедай фан экӀягъандин винел вили перде экӀя авурай ва адал къапар, хуш атирдин ни галай шейэр кудай еке бушкъапар, чехирдин къурбандар ийидай сукӀраяр ва гичинар эциграй. Анал датӀана алай фу гьа гьанал аламукьрай. 8 Адан винелай абуру икьи яру перде экӀяй авурай, адал гьуьлуьн кицӀин хамар эциграй, хамар вегьирай ва паяяр турай. 9 Абуру вили перде къачуна адалди чирагъган ва адахъ галай чирагъар, багъар патал хехер ва хекендазар ва чпелди ам чӀемедалди ацӀурдай вири къапар винелай кӀеврай. 10 Абуру ам вири къаб-къажахни галаз адал гьуьлуьн кицӀин хамарик кутурай ва занбурандал эциграй. 11 Къизилдин къурбангандин винелай абуру вили перде экӀя авурай, ам гьуьлуьн кицӀин хамаралди кӀеврай ва паяяр кутурай. 12 Абуру ибадатханада къуллугъ авун патал гъилик ийидай вири къаб-къажах къачуна, ам вили пердедик кутурай, гьуьлуьн кицӀин хамаралди кӀеврай ва занбурандал эциграй. 13 Абуру буьруьнждин къурбангандал алай руьхъ шткана михьи авурай, къурбангандал мичӀи яру перде экӀя авурай ва 14 адал къурбангандал къуллугъ ийидайла гъилик ийидай вири къаб-къажах эциграй: цӀивинар патал хекендазар, як патал шишер, гъвечӀи перер ва иви хъичирдай бадияр. Абуру адан винел гьуьлуьн кицӀин хамарин къат экӀя авурай ва паяяр кутурай. 15 Кун алай чкадилай юзун герек хьайила, Гьарунани адан рухвайри ибадатхана ва адан къаб-къажах кӀевун куьтягьайла, къегьатияр абур вири ялун патал къведа. Абуру пак тир затӀарик гъил кяна жедач, тахьайтӀа абур рекьида. Им – Гьалтунин Алачухдин къегьатийри ялдай къаб-къажах я. 16 Элазара, хахам Гьарунан хци, чирагъра цадай гъеридин, хуш атирдин ни галай кудай затӀунин, гьар йикъан фан къурбанддин ва гуьцӀдай чӀемин патахъай къайгъу чӀугурай. Ада вири Алачухдин ва ана авай вири затӀарин, ибадатханадин ва адан къаб-къажахдин патахъай къайгъударвал авурай». 17 Реббиди Мусадизни Гьаруназ лагьана: 18 «Килиг гьа, Къегьатан несилар тир тухумар рекьиниз рехъ гумир. 19 Абур, Паквилерин Пак тир чкайрив агатайла, ва рекьин тийидайвал, чан аламаз жедайвал абур патал ингье вуч ийидатӀа: Гьарунни адан рухваяр ибадатханадиз гьахьрай ва гьар садаз адан къуллугъ ва ада вуч тухун лазим ятӀа тайинаррай. 20 Амма абур чеб гьатта са легьзеда кьванни пак тир шейэриз килигун патал аниз татурай, тахьайтӀа абур рекьида». 21 Реббиди Мусадиз лагьана: 22 «Мадни гьакӀ сихилар ва тухумар тирвал гершанийрин кьадар тайинара. 23 Чпивай Гьалтунин Алачухда къуллугъ ийиз жедай, къанни цӀуд йисалай яхцӀурни цӀуд йисал кьван йисариз акъатнавай вири итимар къелемдиз къачу. 24 Ингье гершанийрин тухумри зегьмет чӀугвадайла ва затӀар ялдайла, абурун къуллугъ: 25 Гьалтунин Алачухдин пердеяр тухурай – ам кӀевзавай ва гьуьлуьн кицӀин хамарикай раснавай винелай чӀугунвай къатар, Гьалтунин Алачухдин сивел алай перде, 26 алачух ва къурбанган элкъвена кьунвай гъенин пердеяр, гьахьдай чкадин перде, епер ва абурухъ вирибурухъ галай кьван затӀар. Идахъ галаз алакъада авай вири кӀвалахар абуру кьиле тухурай. 27 Абурун вири къуллугъ, ялун ва я маса кӀвалахар, Гьарунанни адан рухвайрин гъилик кваз кьиле фирай. Абуру ялна кӀанзавай вири затӀар гьабурун къайгъудик кутур. 28 Гьалтунин Алачухдин патарив гершанийрин тухумдин къуллугъ гьа ихьтинди я. Абуру чпин везифаяр хахам Гьарунан хва Итамаран гъилик тамамаррай. 29 Мерарияр тухумар ва сихилар тирвал къелемдиз къачу. 30 Гьалтунин Алачухда къуллугъ жедай, чеб къанни цӀудалай яхцӀурни цӀуд йисав кьван агакьнавай вири итимар къелемдиз къачу. 31 Гьалтунин Алачухдин патарив къуллугъ ийидайла, ингье абурун везифа: алачухдин кьулар, адан арадай вегьенвай турвакьар, гулар ва пунар, 32 ва гьакӀни элкъвена кьунвай гъенихъ янавай чпихъ пунар галай гулар, алачухдин хкар, вири тадаракар ва герек тир затӀарни галай епер ялрай. Гьар садаз анжах вичиз талукь яз вуч тухун лазим ятӀа тайинара. 33 Мерарийрин тухумри Гьалтунин Алачухда хахам Гьарунан хва Итамаран гъилик кваз тамамарун герек тир къуллугъ гьа им я». Левийрин тухумар гьисабун 34 Мусади, Гьаруна ва элдин регьберрив тухумар ва сихилар тирвал къегьатияр къелемдиз къачунай. 35-36 Чеб тухумар тирвал къелемдиз къачурла, къанни цӀудалай яхцӀурни цӀудав кьван йисарив агакьнавай, Гьалтунин Алачухда къуллугъ авуниз виже къведай вири итимрин кьадар кьве агъзурни ирид вишни яхцӀурни цӀуд тир. 37 Им къегьатийрин тухумра Гьалтунин Алачухда къуллугъ авур вирибурун кьадар я. Мусадини Гьаруна абур Реббиди Мусадилай агакьарай эмирдалди къелемдиз къачунай. 38 Тухумар ва сихилар тирвал гершанияр къелемдиз къачунай. 39-40 Чеб тухумар ва сихилар тирвал къелемдиз къачурла, къанни цӀудалай яхцӀурни цӀудав кьван йисарив агакьнавай, Гьалтунин Алачухда къуллугъ авуниз виже къведай вири итимрин кьадар 2630 кас тир. 41 Им гершанийрин тухумра Гьалтунин Алачухда къуллугъ авур вирибурун умуми кьадар я. Мусадини Гьаруна абур Реббидин эмирдалди къелемдиз къачунай. 42 Тухумар ва сихилар тирвал мерарияр къелемдиз къачунай. 43-44 Чеб сихилар ва тухумар тирвал къелемдиз къачурла, къанни цӀудалай яхцӀурни цӀудав кьван йисарив агакьнавай, Гьалтунин Алачухда къуллугъ авуниз виже къведай вири итимрин кьадар 3200 кас тир. 45 Им мерарийрин тухумра авайбурун умуми кьадар я. Мусадини Гьаруна абур Реббиди Мусадилай агакьарай эмирдалди къелемдиз къачунай. 46 Мусади, Гьаруна ва Исраилдин регьберри вири левияр тухумар ва сихилар тирвал къелемдиз къачунай. 47-48 Къанни цӀудалай яхцӀурни цӀудав кьван йисарив агакьнавай, Гьалтунин Алачухда къуллугъ авуниз ва ам ялиз виже къведай вири итимрин кьадар 8580 кас тир. 49 Реббидин эмирдалди Мусадилай гьар садаз вичин къуллугъ тайинарна ва вуч тухвана кӀандатӀа лагьана. Реббиди Мусадиз эмир гайивал, абур къелемдиз къачунай. |
© Институт перевода Библии, 2010-2024
Institute for Bible Translation, Russia