Кьурумда 31 - Пак Калам

Чилер пай авунин эвел ( 31–36 кьилер) Мидиянвийриз жаза гун

¹ Реббиди Мусадиз лагьана:

² «Мидиянвийрилай Исраилдин рухваяр патахъай кьисас къахчу. Ахпа вун рекьида ва ви халкьдин патав хъфида».

³ Мусади исраилвийриз лагьана: «Мидиянвийрихъ галаз дяве авун патал ва мидиянвийрилай Реббидин кьисас къахчун патал куь итимрин арадай аскерар тирбурув яракь гице.

⁴ Исраилдин гьар са тайифадай са агъзур итим дяведиз ракъура».

⁵ Исраилдини женг патал яракьар гвай цӀикьвед агъзур аскер, гьар са тайифадай са агъзур кас, вилик чӀугуна.

⁶ Мусади абур дяве авун патал, гьар са тайифадай са агъзур кас, вичихъ галаз ибадатханадин къаб-къажах ва хабар гудай къаргъуярни къачур Пингьасахъ, хахам Элазаран хцихъ галаз ракъурна.

⁷ Абуру, Реббиди Мусадиз эмир гайивал, мидиянвийрихъ галаз женг чӀугуна ва вири итимар тергна.

⁸ Масабурун жергедай яз абуру Эви, Рекъем, Цур, Гьур ва Реба – Мидияндин вад пачагь, – яна кьена. ГьакӀни абуру Бегъаран хва Билъам туруналди яна кьена.

⁹ Исраилдин рухвайри мидиянвийрин вири папар ва аялар есирда кьуна ва мидиянвийрин вири нехирар, суьруьяр ва абурун мал-девлет кван яз къачуна.

¹⁰ Абуру мидиянвийри уьмуьр тухвай вири шегьерар ва абурун вири кунар цӀай яна кана.

¹¹ Абуру гъиле гьатай вири эменни ва кван – гьам инсанар, гьамни малар,

¹² Мусадин, хахам Элазаран ва Исраилдин элдин патав Магьабдин дуьзенра, Ярдандин патарив, Еригьандин къаншарда авай чпин кундал хкана.

¹³ Муса, хахам Элазар ва элдин регьберар кундилай элячӀна, абурун вилик экъечӀна.

¹⁴ Мусадиз женг чӀугуна хтай кьушундин чӀехибурун – агъзур ва виш касдиз эмир гузвайбурун, гзаф хъел атана.

¹⁵ «Куьне папар вири чан алаз тунани? – жузуна ада абурувай. –

¹⁶ Им гьабур тир, Билъаман меслятдалди, Пегар себеб яз Исраилдин рухвайрив Реббидиз хаинвал ийиз турбур, ва Реббидин эл тӀегъуьнди тергнай.

¹⁷ Гьа икӀ, вири гадаяр яна йикь. Итимрихъ галаз къаткай вири папар яна йикь,

¹⁸ амма чеб гьеле итимрихъ галаз къаткун тавунвай вири рушар квез тур.

¹⁹ Квекай ни яна кьенватӀа ва я кьенвайдак хкӀунватӀа, ирид йикъан вахтуналди кундилай къерехда акъвазрай. Пуд ва ирид лагьай йикъара куьне куьн ва куь есирар михьивилиз акъуд.

²⁰ Вири парталар ва хамуникай, цӀегьрен сарикай ва кӀарасдикай авунвай вири затӀар михьа».

²¹ Хахам Элазара женгина хьайи аскерриз лагьана: «Ингье Реббиди Мусадиз къалурнавай къанундин къайда:

²² къизил, гимиш, буьруьнж, ракь, къеле, кьуркьушум

²³ – цӀа кун тийидай вири затӀар, цӀун винелай чӀугуна кӀанда. Идалай кьулухъ абур михьи жеда, амма, идалайни гъейри, а затӀар михьивилиз акъуддай цяй яна кӀанда. ЦӀа кудай вири затӀар цяй чӀугуна кӀанда.

²⁴ Ирид лагьай юкъуз парталар чуьхуьх ва куьн михьи хъижеда. Идалай кьулухъ квевай кундал хквез жеда».

Кван паюн

²⁵ Реббиди Мусадиз лагьана:

²⁶ «Хахам Элазарахъ ва элдин сихилрин регьберрихъ галаз есирар ва кван тир малар вири гьисаба.

²⁷ Кван женгина хьайи аскеррин ва амай элдин арада пая.

²⁸ Женгина хьайи аскеррин паюникай гьар вад виш есирдикай, малдикай, ламракай, хпекай ва цӀегьрекай сад Реббидиз пай яз чара ая.

²⁹ И чӀук абурун паюникай хкуда ва, Реббидин пай яз, Хахам Элазарав вахце.

³⁰ Исраилдин рухвайрин паюникай лагьайтӀа, гьар яхцӀурни цӀуд есирдикай, малдикай, ламракай, хпекай ва цӀегьрекай са-сад къачу, ва чпел Реббидин Алачух ихтибар авунвай левийрив вахце».

³¹ Мусадини хахам Элазара Реббиди Мусадиз эмир гайивал авуна.

³² Вири санлай аскерри дяведа хьайибуру кьунвайдакай амукьай ихьтин кван къачуна: 675000 лапаг,

³³ 72000 мал,

³⁴ 61000 лам

³⁵ ва 32000 чеб садрани итимдихъ галаз къаткун тавунвай руш.

³⁶ Женгина иштирак авурбурун паюниз акъатна: 337500 хебни цӀегь,

³⁷ абурукай Реббидин пай 675 хьана;

³⁸ 36000 мал, абурукай Реббидин пай 72 хьана;

³⁹ 30500 лам, абурукай Реббидин пай 61 хьана;

⁴⁰ 16000 есир, абурукай Реббидин пай 32 кас хьана.

⁴¹ Мусади и пай хахам Элазарав, Реббиди Мусадиз эмир гайивал, Реббидин пай яз вахгана.

^42-43 Мусади аскеррин паюникай чара авур Исраилдин рухваяр патал пай, эл патал пай яз 337500 хебни цӀегь,

⁴⁴ 36000 мал,

⁴⁵ 30500 лам

⁴⁶ ва 16000 есир хьана.

⁴⁷ Исраилдин рухвайрин паюникай Мусади, Реббиди вичиз эмир гайивал, гьар яхцӀурни цӀуд есирдикайни гьайвандикай сад къачуна, чпел Реббидин Алачух ихтибар авунвай левийрив вахгана.

⁴⁸ Кьушундин паярин кьиле акъвазнавай чӀехибур ва гьар са агъзур ва виш аскердиз эмир гузвайбур Мусадин патав атана

⁴⁹ ва адаз лагьана: «Ви лукӀари чи гъилик квай аскерар гьисабна, ва абурукай садни телеф хьанвач.

⁵⁰ Ингье чнани, чун патал Реббидин вилик чи гунагьрилай гъил къахчун патал, Реббидиз пай яз чакай гьар сада кван яз кьур къизилар гъанва: гьар жуьредин цамар, тупӀалар, япагьанар ва яхаяр».

⁵¹ Мусадини хахам Элазара абурувай безекар тир и къизилар кьабулна.

⁵² Мусадини Элазара Реббидиз пай авур къушунрин агъзуррини вишерин чӀехибурувай тир и къизилдин заланвал цӀуругуд агъзурни ирид вишни яхцӀурни цӀуд шекъел тир.

⁵³ Аскеррикай гьар сада вич патал кван къачузвай.

⁵⁴ Мусадини хахам Элазара, ам Исраилдин рухвайрикай Реббидин вилик рикӀел хкун хьун патал, кьушунрин агъзуррин ва вишерин чӀехибурувай къизил кьабулна ва ам Гьалтунин Алачухдик тухвана.