Кьурумда 3 - Пак Калам

Левийри Алачухда къуллугъ авун

¹ Ингье, Ребби Синай дагъда Мусадихъ галаз рахай вядеда, Мусадинни Гьарунан несилар.

² Гьарунан рухвайрин тӀварар: Надаб, адан сифте хва, Абигьу, Элазар ва Итамар.

³ Ибур чӀем гуьцӀнавай хахамар тир, чеб хахамвилиз акъуднавай, Гьарунан рухвайрин тӀварар я.

⁴ Амма Надабни Абигьу, абуру Синай кьурумда Реббидиз талукьвал авачир къурбанд авурла, Реббидин вилик кьенай. Абурухъ рухваяр авачир, ва анжах Элазарани Итамара, чпин бубадал чан аламаз, хахамар яз къуллугъзавай.

⁵ Реббиди Мусадиз лагьана:

⁶ «Левидин тайифа гъваш ва хахам тир Гьаруназ, абуру адаз кумекар гун патал, абур къалура.

⁷ Абуру, Алачухда къуллугъ кьиле тухуналди, Гьалтунин Алачухда Гьарунан паталай ва вири элдин паталай везифаяр тамамаррай.

⁸ Абуру Гьалтунин Алачухда авай кьван вири затӀарин патахъай къайгъударвал авурай ва, Алачухда къуллугъ авуналди, Исраилдин рухвайрин паталай везифаяр тамамаррай.

⁹ Левияр Гьарунанни адан рухвайрин ихтиярда тур – абур Исраилдин рухвайрин вири тайифайрай михьиз гьадав вахкун лазим я.

¹⁰ Гьарунни адан рухваяр, абуру хахамар яз къуллугъ авун патал, тайинара. Вич Алачухдиз мукьув хьайи чара маса гьар гьи кас хьайитӀани, ам ажалдин хура туна кӀанда».

¹¹ Реббиди Мусадиз мадни икӀ лагьана:

¹² «За левияр Исраилдин рухвайрин вири тухумра авай сифте ругул аялрин эвездай къачунвайди я. Левияр – Зибур я,

¹³ вучиз лагьайтӀа вири сифте ругул аялар – Зибур я. За Мисрида авай вири сифте ругулар кьейи чӀавуз, За Исраилда авай вири сад лагьайбур тир эркек балаяр – гьам инсанрин, гьам гьайванрин – Жув патал чара авуна. Абур Зибур хьунухь лазим я. Зун Ребби я».

¹⁴ Синай кьурумда Реббиди Мусадиз лагьана:

¹⁵ «Левияр, са варз ва гьадалай виниз йисариз акъатнавай вири эркекар, абурун сихилар ва тухумар тирвал къелемдиз къачу».

¹⁶ Мусадини, вичиз лагьайвал, Реббидин эмирдалди абур къелемдиз къачуна.

¹⁷ Ингье Левидин рухвайрин тӀварар: Гершан, Къегьат ва Мерари.

¹⁸ Ингье гершанийрик акатзавай тухумар: Ливни ва Шимигь.

¹⁹ Къегьатрин тухумар: Амрам, Йицгьар, Хевран ва Узиял.

²⁰ Мерарийрин тухумар: Магьли ва Муши. Ингье левийрин сихилриз.

²¹ Гершаналай ливнийринни шимигьийрин тухумар арадал атана; ибур гершанийрин тухумар я.

²² Варз ва гьадалай виниз йисариз акъатнавай эркекрин кьадар 7500 кас тир.

²³ Гершанийрин тухумри кун рагъакӀидай пата, Алачухдин кьулухъ эцигна кӀанда.

²⁴ Абурун регьбер Лаэлан хва Элиасаф тир.

²⁵ Гьалтунин Алачухдикай гершанийрин къайгъударвилик алачух ва адан винел пад кӀевнавай шейэр, Гьалтунин Алачухдин сивел алай перде,

²⁶ гъенин пердеяр, Алачухни къурбанган элкъвена кьунвай гъенез экъечӀдай сивел алай перде ва епер кутунвай. Абуру и чӀавуз герек тир вири кӀвалахар кьиле тухвана кӀанда.

²⁷ Къегьаталай амрамийрин, ицгьарийрин, хевранийрин, узиялийрин тухумар арадал атана; ибур къегьатийрин тухумар я.

²⁸ Варз ва гьадалай виниз йисариз акъатнавай эркекрин кьадар 8600 кас тир. Къегьатийрал ибадатхана ихтибар авунвай.

²⁹ Къегьатийрин тухумри кун Алачухдин кьибле патахъай туькӀуьрун лазим тир.

³⁰ Абурун регьбер Узиялан хва Элицафан тир.

³¹ Абурал Икьрардин сандух, экӀягъан, чирагъган, къурбанганар, къуллугъ кьиле тухудайла ибадатханадин гъилик ийидай къаб-къажах ва перде ихтибар авунвай. Абуру и чӀавуз герек тир вири кӀвалахар кьиле тухвана кӀанда.

³² Левийрин кьилин регьбер хахам Гьарунан хва Элазар тир. Ам чпел ибадатхана ихтибар авунвайбурун кьилел акъвазнавай.

³³ Мераридилай магьлийрин ва мушийрин тухумар арадал атана; ибур мерарийрин тухумар я.

³⁴ Варз ва гьадалай виниз йисариз акъатнавай къелемдиз къачунвай эркекрин кьадар 6200 кас тир.

³⁵ Абурун регьбер Абихаилан хва Цуриял тир. Абуру кун Алачухдин кефер патахъай кутун герек тир.

³⁶ Мерарийриз Алачухдин кьуларин, адан арадай вегьенвай турвакь, гуларин, пунарин, герек тир вири кӀвалахар кьиле тухуз

³⁷ ва элкъвена кьунвай гъенин чпихъ пунар галай, алачухдин хкар ва еперни кваз гуларин къайгъударвал авун эмир авунвай.

³⁸ Мусади, Гьаруна ва адан рухвайри Алачухдин рагъэкъечӀдай, ам хкаж жедай пата, Гьалтунин Алачухдин вилик кун кутурай. Абуру Исраилдин рухвайрин паталай ибадатханадин патахъай къайгъударвал чӀугун лазим тир. Чпиз ихтияр авачиз ибадатханадиз мукьув хьайи гьар гьим хьайитӀани ажалдин хура тун герек тир.

³⁹ Реббидин эмирдалди Мусадини Гьаруна абурун тухумар тирвал къелемдиз къачунай, варз ва гьадалай виниз йисариз акъатнавай эркекрал атайла, вири левийрин кьадар 22000 кас тир.

Исраилдин сифте ругулар левийралди эвез авун

⁴⁰ Реббиди Мусадиз лагьана: «Исраилдин рухвайрин варз ва гьадалай виниз йисариз акъатнавай вири сифте гадаяр къелемдиз къачу ва абурун кьадар тайинара.

⁴¹ Заз вири Исраилдин рухвайрин сифте гадайрин чкадал левияр чара ая, – Зун Ребби я ва гьакӀни Исраилдин рухвайрин маларин сад лагьай эркек балайрин чкадал левийрин вири малар чара ая».

⁴² Мусади, вичиз Реббиди эмир гайивал, Исраилдин рухвайрин вири сифте ругулар къелемдиз къачуна.

⁴³ Варз ва гьадалай виниз йисариз акъатнавай сифте ругулар, тӀварба-тӀвар къалурнавай, 22273 авай.

⁴⁴ Реббиди Мусадиз мадни икӀ лагьана:

⁴⁵ «Исраилдин рухвайрин вири сифте ругулрин чкадал тек са левияр ва абурун маларин чкадал тек са левийрин малар къачу. Левияр Зибур хьун лазим я. Зун Ребби я.

⁴⁶ Чпин кьадар левийрин кьадардилай гзаф тир Исраилдин рухвайрин 273 сифте ругулар пул гана къахчун патал,

⁴⁷ гьар садалай вичин заланвал къад герагь тир ибадатханадин шекъелдин гьисабдай вад шекъел кӀватӀа.

⁴⁸ Артуханбур тир ругулар пул гана къахчунин гимиш Гьарунавни адан рухвайрив вахце».

⁴⁹ Мусади чпин кьадар левийри пул гана къахчунвайбурулай артух тирбурувай маса къахчунин пул кӀватӀна.

⁵⁰ Исраилдин рухвайрин сифте ругулривай ада ибадатханадин шекъелдин гьисабдай 1365 шекъелдин гимиш кӀватӀна.

⁵¹ Мусади Реббидин гафуниз килигна, вичиз Реббиди эмир гайивал, маса къахчунин пул Гьарунавни адан рухвайрив вахкана.