Кьурумда 28 - Пак Калам

Къурбандар ва суварар

¹ Реббиди Мусадиз лагьана:

² «Исраилдин рухвайриз эмир ая, абуруз лагь: „Килиг гьа, Заз лазим тир вахтунда Заз хуш ни галай гум чукӀурун патал, суьрсет Зи къурбангандал куг“.

³ Абуруз лагь: „Ингье куьне Реббидиз авуна кӀандай, Адаз кудай къурбанд: даиманди тир гьар юкъуз кунуг рехне квачир, йис хьанвай кьве кьар.

^4-5 Са кьар пакамахъ гъваш. Кьвед лагьайди – гьиндин кьудай са пай зейтундин чӀем какадарнавай эфадин цӀудай са пай лап хъсан гъуьруькай авунвай фан къурбандни галаз, – рагъдан вахтунда.

⁶ Им Синай дагъдин патарив кьабулай эбеди тир кунуг, хуш ни галай гум чукӀурдай, Реббидиз кудай къурбанд я.

⁷ Гьар са кьардихъ галаз чехирдин гьиндин кьудай са паюникай ибарат тир чехирдин къурбандни кьиле тухурай. Реббидиз ийизвай ичкидин къурбанд ибадатханадин патав цуз.

⁸ Кьвед лагьай кьар гьа пакаман хьтин фан ва чехирдин къурбандни галаз рагъданрихъ хьиз ая. Им Реббидиз хуш ни галай гум чукӀурдай, Адаз кудай къурбанд я.

⁹ Кишдиз чпихъ чехирдин къурбанд ва эфадин цӀудай кьве пай лап хъсан гъуьруькай гьазурнавай ва чӀемедихъ галаз какадарнавай фан къурбандни галаз са йис хьанвай, рехне квачир кьве кьар гъваш.

¹⁰ Гьар Кишдин кунуг, вичихъ чехирдин къурбандни галай эбеди тир кунуг квачиз, гьа ихьтинди я.

¹¹ Гьар вацран сад лагьай юкъуз Реббидиз таза кьве жунгавдикай, са гьерекай ва рехне квачир са йис хьанвай ирид кьардикай ибарат тир кунуг ая.

¹² Гьар са жунгавдихъ галай фан къурбанд чӀемедихъ галаз какадарнавай лап хъсан, эфадин цӀудай пуд пай гъуьруькай гьазурнавайди хьуй; гьерехъ галайди – чӀемедихъ галаз какадарнавай лап хъсан, эфадин цӀудай кьве пай гъуьруькай хьуй;

¹³ гьар са кьардихъ галайди – чӀемедихъ галаз какадарнавай лап хъсан, эфадин цӀудай са пай гъуьруькай гьазурнавай фан къурбанд хьуй. Им кунуг, Реббидиз хуш ни галай гум чукӀурдай, Адаз кудай къурбанд я.

¹⁴ Гьар са жунгавдихъ галай чехирдин къурбанд гьинадин паюникай; гьерехъ галайди – гьинадин пудай са паюникай; кьардихъ галайдини – гьинадин кьудай са паюникай хьуй. Им гьар са ЦӀийивацра вири вацра кьиле тухвана кӀанзавай гьар вацран кунуг я.

¹⁵ Лазим тир чехирдин къурбандни галай кунугдилай гъейри, Реббидиз гунагьдай са кьун эбеди къурбанд авуна кӀанда.

¹⁶ Сад лагьай вацран цӀукьуд лагьай югъ Реббидиз Песагь я.

¹⁷ И вацран цӀувад лагьай юкъуз сувар хьурай; ирид юкъуз тӀили фу неъ.

¹⁸ Суварин сад лагьай юкъуз кӀватӀ жедай пак тир эверун малумара ва адетдин гьич са кардални алахъмир.

¹⁹ Реббидиз кьве таза жунгавдикай, са гьерекай ва рехне квачир ирид кьардикай ибарат тир Адаз кудай кунуг ая.

²⁰ Гьар са жунгавдихъ галаз чӀемедик какадарнавай эфадин цӀудай пуд пай лап хъсан гъуьруькай гьазурнавай фан къурбанд ая; гьерехъ галаз – цӀудай кьве пай;

²¹ ирид кьардикай гьар садахъ галазни – цӀудай са пай.

²² Квелай гъил къахчун патал, гунагьдай къурбанд яз са кьунни винел эхциг.

²³ Ибур, гьар пакаман кунугрилай алава яз, гъваш.

²⁴ ГьакӀни гьар юкъуз, ирид йикъан вахтуналди, Реббидиз хуш ни галай гум чукӀурдай къурбанддин суьрсет Адан къурбангандал куг. Ам лазим тир чехирдин къурбандни галаз даиманди тир кунуг алава яз гъана кӀанда.

²⁵ Суварин ирид лагьай юкъуз кӀватӀ жедай пак тир эверун малумара ва адетдин гьич са кардални алахъмир.

²⁶ Сифте майвайрин юкъуз, куьне Гьафтейрин суварал Реббидиз цӀийи техилдин фан къурбандар гъизвай чӀавуз, пак тир кӀватӀун малумара ва адетдин гьич са кардални алахъмир.

²⁷ Кьве таза жунгавдикай, са гьерекай ва са йис хьанвай ирид кьардикай Реббидиз хуш ни галай гум чукӀурдай кунуг ая.

²⁸ Гьар жунгавдихъ галай фан къурбанд чӀемедик какадарнавай эфадин цӀудай пуд пай лап хъсан гъуьруькай гьазурнавайди хьурай; гьерехъ галайди – цӀудай кьве паюникай;

²⁹ ирид кьардикай гьар садахъ галайдини – цӀудай са паюникай.

³⁰ Квелай гъил къахчун патал, гунагьдай са кьунни винел эхциг.

³¹ Ибур, лазим тир чехирдин къурбандни галаз, лазим тир фан къурбандни галай даиманди тир кунугдал алава яз гъваш. Куь къурбанддин гьайван рехне квачирди хьуй.