Кьурумда 26 - Пак Калам

Кьвед лагьай гъилера Исраилдин халкьдин кьадар тайинарун

¹ ТӀегъуьндилай кьулухъ Реббиди Мусадиз ва хахам Гьарунан хва Элазараз лагьана:

² «Аскервилин къуллугъдиз виже къведай, къад йис ва адалай гзаф хьанвай Исраилдин рухвайрин вири эл абурун бубайрин сихилар тирвал кьадар тайинара».

³ Магьабдин дуьзенра, Ярдандин патарив, Еригьандин къаншарда Муса ва хахам Элазар абурухъ галаз рахана ва икӀ лагьана:

⁴ «Реббиди Мусадиз эмир гайивал, къад йис ва адалай гзаф йисар хьанвай Исраилдин рухвайрин кьадар тайинара». Ингье, чеб Мисридай экъечӀай исраилвияр:

⁵ Исраилан сифте хва Рувенан эвледар: Гьанахалай – гьенухийрин тухум; Палудилай – палуйрин тухум;

⁶ Гьецраналай – гьецранийрин тухум; Кармидилай – кармийрин тухум;

⁷ Ибур Рувенан тухумар я; вири 43730 итим къелемдиз къачунай.

⁸ Палудин хва Элиаб тир,

⁹ Элиабан рухваярни – Немуил, Датан ва Абирам. И Датанни Абирам элдин патай тайинарнавай ксар тир. Абур Мусадинни Гьарунан аксиниз экъечӀнай ва, абур Реббидин аксиниз экъечӀай чӀавуз, Къарагьан шерикар хьанай.

¹⁰ Чил ахъа хьана ва абур туькьуьнна; Къарагьахъ галаз санал адан вири шерикарни кьена. ЦӀу кьве вишни яхцӀурни цӀуд кас терг авуна. Абур игьтиятвал патал хабардар авун хьанай.

¹¹ Амма Къарагьан рухваяр а юкъуз кьеначир.

¹² Чпин тухумар тирвал Шимунан эвледар: Немуилалай – немуилрин тухум; Яминалай – яминийрин тухум; Яхиналай – яхинийрин тухум;

¹³ Зерагьалай – зерагьрин тухум; Шаулалай – шаулрин тухум;

¹⁴ Ибур шимунийрин тухумар я; 22200 итим.

¹⁵ Чпин тухумар тирвал Гадан эвледар: Цефаналай – цефанрин тухум; Гьагидилай – гьагийрин тухум; Шунидилай – шунийрин тухум;

¹⁶ Азнидилай – азнийрин тухум; Эридилай – эрийрин тухум;

¹⁷ Арадалай – арадрин тухум; Арелиядилай – арелийрин тухум;

¹⁸ Ибур Гадан тухумар я; 40500 итим къелемдиз къачунай.

¹⁹ Ягьудан рухваяр Эр ва Анан тир. Абур Къенанда кьенай.

²⁰ Чпин тухумар тирвал Ягьудан эвледар: Шелагьалай – шелагьийрин тухум; ПерецӀалай – перецӀрин тухум; Зерагьалай – зерагьрин тухум;

²¹ ПерецӀан эвледар: Гьецраналай – гьецранрин тухум; Гьамулалай – гьамулрин тухум;

²² Ибур Ягьудан тухумар я; 76500 итим къелемдиз къачунай.

²³ Чпин тухумар тирвал Исахаран эвледар: Таладилай – талайрин тухум; Пувадилай – пунийрин тухум;

²⁴ Яшубадилай – яшубайрин тухум; Шимраналай – шимранрин тухум;

²⁵ Ибур Исахаран тухумар я; 64300 итим къелемдиз къачунай.

²⁶ Чпин тухумар тирвал Забулунан эвледар: Середалай – середрин тухум; Эланалай – эланрин тухум; Ягьлеилалай – ягьлеилрин тухум;

²⁷ Ибур забулунрин тухумар я; 60500 итим къелемдиз къачунай.

²⁸ Чпин тухумар Манашедилай ва Ифраималай Юсуфан эвледар:

²⁹ Манашедин эвледар: Магьиралай – магьиррин тухум; Магьир Гилеадан буба тир; Гилеадалай – гилеадрин тухум.

³⁰ Ингье Гилеадан эвледар: Язералай – язеррин тухум; Гьелекьалай – гьелекьрин тухум;

³¹ Асриялалай – асриялрин тухум; Шехемалай – шехемрин тухум;

³² Шемидалай – шемидрин тухум; Гьефералай – гьеферрин тухум;

³³ Целафгьадахъ, Гьеферан хцихъ, рухваяр авачир; адахъ анжах рушар авай; абурун тӀварар Магьла, Нуа, Гьагла, Милка ва Тирца тир.

³⁴ Ибур Манашедин тухумар я; вири 52700 итим къелемдиз къачунай.

³⁵ Ингье чпин тухумар тирвал Ифраиман эвледар: Шутелагьалай – шутелагьрин тухум; Бехералай – бехеррин тухум; Таханалай – таханрин тухум;

³⁶ Ингье Шутелагьан эвледар: Эраналай – эранрин тухум;

³⁷ Ибур Ифраиман тухумар я; вири 32500 итим къелемдиз къачунай. Ибур чпин тухумар тирвал Юсуфан эвледар я.

³⁸ Чпин тухумар тирвал Бунъяминан эвледар: Беладилай – белайрин тухум; Ашбелалай – ашбелрин тухум; Ахирамалай – ахирамрин тухум;

³⁹ Шуфамалай – шуфамрин тухум; Хуфамалай – хуфамрин тухум;

⁴⁰ Ардалай ва Наъманалай Беладин эвледар: Ардалай – ардрин тухум; Наъманалай – наъманрин тухум.

⁴¹ Ибур Бунъяминан тухумар я; вири 45600 итим къелемдиз къачунай.

⁴² Ингье чпин тухумар тирвал Данан эвледар: Шугьамалай – шугьамрин тухум; Ибур Данан тухумар я:

⁴³ абур вири шугьамрин тухумар тир; 64400 итим къелемдиз къачунай.

⁴⁴ Чпин тухумар тирвал Ашеран эвледар: Йимнагьалай – йимнагьийрин тухум; Ишвидилай – ишвийрин тухум; Бериядилай – берийрин тухум;

⁴⁵ Бериядин эвледрилай лагьайтӀа: Гьебералай – гьеберрин тухум; Малкиялалай – малкиялрин тухум;

⁴⁶ Ашерахъ вичин тӀвар Серагь тир са руш авай.

⁴⁷ Ибур Ашеран тухумар я; 53400 итим къелемдиз къачунай.

⁴⁸ Чпин тухумар тирвал Нифталидин эвледар: Ягьциялалай – ягьциялрин тухум; Гунидилай – гунийрин тухум;

⁴⁹ Яцералай – яцеррин тухум; Шилемалай – шилемрин тухум.

⁵⁰ Ибур Нифталидин тухумар я; вири 45400 итим къелемдиз къачунай.

⁵¹ Вири санлай Исраилдин рухваяр 601730 итим авай.

⁵² Реббиди Мусадиз лагьана:

⁵³ «Чил тухумрин арада инсанрин кьадардиз килигна ирс яз пайна кӀанда.

⁵⁴ ЧӀехи тухумдиз чӀехи ирс це, гъвечӀидаз лагьайтӀа – гъвечӀи. Гьар са тухумдал къелемдиз къачунвайбурун кьадардиз килигна гьалтрай.

⁵⁵ Чил чип вегьена пай авурай. Абурал белгенар бубайрин тайифайрин тӀварариз килигна гьалтда.

⁵⁶ Гьар са белген кьадардал атайла гзаф ва тӀимилбурун арада чип вегьена ирс яз пай авурай».

⁵⁷ Чпин тухумар тирвал къелемдиз къачунвай левияр: Гершаналай – гершанийрин тухум; Къегьаталай – къегьатрин тухум; Мераридлай – мерарийрин тухум.

⁵⁸ Ингье левийрин тухумар: ливнийрин тухум; хевранрин тухум; магьлийрин тухум; мушийрин тухум; къарагьрин тухум. Къегьат Амраман бан-буба тир.

⁵⁹ Амраман папан тӀвар Яхебет тир, ам Левидин эвледрикай тир ва левийрин арада Мисрида дидедиз хьанай. Ада Амрамаз Гьарун, Муса ва абурун вах Мириам ханай.

⁶⁰ Гьарун Надабан ва Абигьудин, Элазаран ва Итамаран буба тир.

⁶¹ Амма Надабани Абигьуди Реббидиз чара цӀай гъайила, абур кьенай.

⁶² Къелемдиз къачунвай ва чпин са варз ва гьадалай гзаф йисар хьанвай левийрин итимрин кьадар 23000 кас тир. Абур амай Исраилдин рухвайрихъ галаз санал къелемдиз къачунвачир, вучиз лагьайтӀа абурал белген ирс яз гьалтнавачир.

⁶³ Ингье Мусадини хахам Элазара, абуру Исраилдин рухваяр Магьабдин дуьзенра, Ярдандин патарив, Еригьандин къаншарда къелемдиз къачурбур.

⁶⁴ Абурун арада Мусадини хахам Гьаруна, абур Синай кьурумда Исраилдин рухваяр къелемдиз къачур са касни авачир.

⁶⁵ Реббиди абур са рахунни алачиз кьурумда рекьида абуруз лагьанай эхир, ва абурукай са Яфунедин хва Калеб ва Нунан хва Шуай квачиз, гьич са касни амачир.