Кьурумда 24 - Пак Калам

¹ Реббидиз Исраилдиз хийир-дуьа авуна кӀанзавайди Билъамаз акурла, ам виликдай хьиз, чинебан ишараяр жагъуриз фенач, амма кьурумдихъ чин элкъуьрна.

² Билъамаз тайифаяр тирвал акъвазнавай Исраил акурла, адак Аллагьдин руьгь акатна

³ ва ада ван хкажна лагьана: «Им Билъаман, Бегъаран хцин, хабар я, вичин вилиз ачухдиз аквазвайда гузвай хабар я,

⁴ вичиз Аллагьдин гафарин ван жезвайда гузвай хабар я, вичиз вири Алакьдайдан патай тир карагунар аквазвайда, вич метӀерал ярх жез, вилер ачух яз амукьзавайда гузвай хабар я:

⁵ Гьикьван иер я, Якьуб, ви алачухар, ви юрдар, Исраил!

⁶ Абур хумравдин тарарин жуьреда экӀя хьанва, вацӀув гвай багълар хьиз, алоэдин тарар хьиз, акӀурнавай Реббиди, цив гвай муьтквер хьиз.

⁷ Абурун чӀварахрив гвай бедрейрай яд алахьиз фида: яд абурун тумариз бес кьадар жеда. Абурун пачагь Агагалай чӀехи жеда; абурун уьлкведин дережа кьакьанди жеда.

⁸ Мисридай абур Аллагьди ахкъудна, Аллагьдин къуват – чӀурун жунгавдин къуват я. Абуру душман халкьар туькьуьнзава, абурун кӀарабар куьлуь ийизва, абур хьелералди язава.

⁹ Аслан хьиз, илис жезва абур, къаткизва, диши аслан хьиз – нихъ абур къарагъардай жуьрэт жеда? Квез хийир-дуьа ийизвайбур хийир-дуьадик хьуй, лянет ийизвайбур лагьайтӀа – лянетдик!»

¹⁰ Балакьак Билъаман хъел акатна. Ада гъутар чуькьвена ва адаз лагьана: «За ваз зи душманар лянет авун патал эверайди я, амма вуна абуруз галаз-галаз пуд гъилера хийир-дуьа авуна!

¹¹ Гила, квахь инлай! КӀвализ ахлад! За ваз кьадардилай артухни гьуьрмет авун хиве кьунай, амма Реббиди вун ахьтин гьуьрметдикай магьрум авуна».

Билъама гайи эхиримжи хабар

¹² Билъама Балакьаз жаваб гана: «Бес за ви векилриз лагьаначирни:

¹³ „Балакьа заз гьатта вичин гимишривни къизилрив ацӀай имаратар теклиф авуртӀани, завай, жуваз кӀандайвал хъсанвал ва писвал авуналди, Реббидин эмирдилай элячӀиз жедачир; за Реббиди заз вуч лугьузватӀа, гьам лугьун лазим я“?

¹⁴ Вуч ийин, зун элкъвена жуван халкьдин патав хъфизва, амма зав и халкьди гележегда ви халкьдиз вуч ийидатӀа, гьадакай вун хабардар ийиз тур».

¹⁵ Ада кьилел ван хкажна лагьана: «Им хабар я Билъаман, Бегъаран хцинди, я, вичин вилиз ачухдиз аквазвайдан хабар я,

¹⁶ вичиз Аллагьдин гафарин ван жезвайдан хабар я, вичин чирвилер виридалай Виниздан патай тирдан, вичиз вири Алакьдайдан патай тир карагунар аквазвайдан хабар я, вич метӀерал ярх жез, вилер ачух жезвайдан:

¹⁷ аквазва Ам, амма исятда ваъ; Килигзава Адаз, амма гьелелиг мукьувай ваъ. Якьубакай гъед хкаж жезва; Исраилдин патай гьукумдин лаш хкаж жезва ва Магьабдин пелер кукӀварзава ва Шетан вири эвледар язава.

¹⁸ Эдам кьада, Сеир, адан душман, кьада, амма Исраил мягькем жеда.

¹⁹ Якьубакай гьаким жеда ва шегьерда хилас хьайибур тергда».

²⁰ Билъамаз Амалехъ акуна ва ван хкажна хабар гана: «Халкьарин арада Амалехъ сад лагьайди тир, амма гележегда даим яз танкь хьана фида».

²¹ Адаз къабилияр акуна ва ван хкажна хабар гана: «Куь утагъ хата авачирди я, куь муг рагал ала;

²² амма къабилар цӀук кутада куьн Ашурда есирвиле кьадалди вилик».

²³ Ада ван хкажна хабар гана: «Мусибат хьана, Аллагьди икӀ авурла, вуж чан алаз амукьда?

²⁴ Китимдай гимияр къведа; Ашурни Эбер муьтӀуьгъарда, амма чебни даим яз тӀанкь хьана фида».

²⁵ Билъам кӀвачин хьана, элкъвена вичин кӀвализ хъфена, ва Балакьни вичин рекье аваз фена.