Biblia Todo Logo
Bìoball air-loidhne

- Sanasan -

Кьурумда 23 - Пак Калам

1 Билъама Балакьаз лагьана: «Заз инал ирид къурбанган эциг ва ирид жунгавни ирид гьер гьазура».

2 Балакьа Билъама лагьайвал авуна, ва абуру кьведани санал гьар са къурбангандал жунгавни гьер къурбанд авуна.

3 Билъама Балакьаз лагьана: «Инал, жуван кунугрин патав, акъваз, зун лагьайтӀа са патахъ къекъечӀда. Белки Ребби зал гьалтун патал къведа. Ада заз вуч ачухарайтӀани, за ваз ахъайда». Ва ам кьецӀил кукӀушдал хкаж хьана.

4 Аллагь адал гьалтна, ва Билъама лагьана: «За ирид къурбанган туькӀуьрна ва гьар садал са жунгавни са гьер къурбанд авуна».

5 Реббиди Билъаман сиве ихьтин гаф туна: «Элкъвена Балакьан кьилив ахлад ва адав икӀ агакьара».

6 Билъам элкъвена хтана, Балакьни Магьабдин вири чӀехирбурни галаз вичин кунугрин патав гваз жагъана.

7 Билъамани ван хкажна лагьана: «Суьриядай зун гъана Балакьа, Магьабдин пачагьди – рагъэкъечӀдай патан дагъларивай: „Ша, зун патал Якьуб лянетдик кутур; Ша, Исраилдиз телеф хьун кьисмет ая“.

8 За гьикӀ лянет гуда абуруз, Чпиз Аллагьди лянет таганвайбуруз? ГьикӀ телеф хьун кьисмет ийида абуруз, Чпиз Реббиди кьисмет тавурла?

9 Рагарин кукӀушрилай зун абуруз килигзава, кӀунтӀарилай за абурулай вил аладарзава. Аквазва халкь кьилди уьмуьр тухузвай ва вич ахьтин халкьарикай сад яз гьисаб тийизвай.

10 Якьубан эвледар нивай гьисабиз жеда – Абурун кьадар чилел алай руквадин гъвелерин кьадар хьиз я, – Я тушни Исраилдин кьудай са пай? Зун къени касдин ажалдикди кьирай, ва зи кьиникьни гьабурун хьтинди хьурай!»

11 Балакьа Билъамаз лагьана: «Вуна заз вуч авуна? За вун зи душманриз лянет авун патал гъана, вуна лагьайтӀа абуруз хийир-дуьа ийизва!»

12 «Бес за Реббиди заз эмир авурвал лугьун лазим тушни?» – жаваб гана Билъама.


Билъама гайи кьвед лагьай хабар

13 И чӀавуз Балакьа Билъамаз лагьана: «Захъ галаз са маса чкадал ша, анлай ваз абур аквада. Инлай ваз вири ваъ, анжах са бязибур аквада. И чӀавуз вуна абуруз зун патал гьанай лянет ая».

14 Ада ам Фасга кукӀушдал алай Цафим чуьлдал тухвана, анал ирид къурбанган эцигна ва гьар садал са жунгавни са гьер къурбанд авуна.

15 Билъама Балакьаз лагьана: «Зал анал Ам гьалтдалди, инал, жуван кунугрин патав, акъваз».

16 Ребби Билъамал гьалтна, адаз вуч лугьудатӀа чирна ва лагьана: «Элкъвена Балакьан кьилив ахлад ва адав им агакьара».

17 Билъам Балакьан патав хтана ва ам Магьабдин чӀехибурни галаз чпин кунугрин патав акъвазнаваз жагъана. Балакьа адавай жузуна: «Реббиди вуч лагьана?»

18 И чӀавуз Билъама ван хкажна лагьана: «Балакь, къарагъ ва яб це; Ципаран хва, заз дикъет це.

19 Аллагь – инсан туш, таб ийидайвал, ва кьиникь галайдини туш, фикирдилай элкъведайвал. Яраб Ада лагьайвал тавуна, хиве кьурвал кьилиз акъуд тавуна тада жал?

20 Зав хийир-дуьа авунин эмир агакьнава; хийир-дуьа ийизвайди Ам я – завай жедач къуватдай вегьиз.

21 Якьубак бедбахтвал кваз малум туш, Исраилда балаяр аквазвач. Абурухъ Ребби, чпин Аллагь гала, абуру Пачагьдиз хьиз тебрикзава.

22 Мисридай абур Аллагьди ахкъудна; Адан къуват – чӀурун жунгавдин къуват я.

23 Якьубаз ийидай кихлигун авач, Исраилдиз ийидай суьгьуьрчивал авач. Гила Якьубакай лугьуз жеда ва Исраилдикайни: „Ингье Аллагьди вуч арадал гъанатӀа!“

24 Диши аслан хьиз акъваззава халкь; эркек аслан хьиз къарагъзава! Секин жедач ам тӀуьна куьтягьдалди кван ва къурбанддин ивидикай хъвадалди».

25 И чӀавуз Балакьа Билъамаз лагьана: «Абуруз я лянет ийимир, я хийир-дуьа!»

26 Билъама жаваб гана: «Бес за Реббиди вуч лагьайтӀани, вири кьилиз акъудна кӀандайдакай ваз лагьаначирни?»


Билъама гайи пуд лагьай хабар

27 И чӀавуз Балакьа Билъамаз лагьана: «Ша, за вун са маса чкадиз тухуда. Белки Аллагьдиз ваз зун патал абур гьанлай лянет ийиз тун кӀан жеда».

28 Балакьа Билъам кьурумдихъ элкъвенвай Пегар кукӀушдал тухвана.

29 Билъама Балакьаз лагьана: «Заз инал ирид къурбанган эциг ва ирид жунгавни ирид гьер гьазура».

30 Балакьа гьа Билъама лагьайвал авуна, ва гьар са къурбангандал са жунгавни са гьер къурбанд авуна.

© Институт перевода Библии, 2010-2024

Institute for Bible Translation, Russia
Lean sinn:



Sanasan