Кьурумда 21 - Пак Калам

Кьенандин винел сифте гъалибвал

¹ Къенандин кьибле пата авай Араддин пачагьдиз Исраил Атаримдин рекьяй къвезвайди ван хьайила, ада исраилвийрал вегьена ва абукай са бязибур есирвиле кьуна.

² И чӀавуз Исраилди Реббидиз вяд авуна: «Вуна и халкь чи гъиле вугайтӀа, чна адан шегьерар михьиз тергда».

³ Реббидиз исраилвийрин минетдин ван хьана ва къенанвияр абурун ихтиярда туна. Абуруни абур чпин шегьерарни галаз михьиз тергна. Гьа икӀ а чкадал Гьарма тӀвар акьалтна.

Буьруьнждин гъуьлягъ

⁴ Гьур дагъдилай исраилвияр, Эдамдал элкъвена фин патал, НацӀун гьуьл галайвал рекье гьатна. Амма рекье халкь руьгьдай аватна;

⁵ абуру Аллагьдилай ва Мусадилай наразивал малумариз хьана: «Вучиз куьне чун Мисридай акъудна? Чун и кьурумда рекьин патал яни? Фу авач! Яд авач! И усал суьрсетдикайни чаз такӀан къвезва!»

⁶ И чӀавуз Реббиди абурал зегьер квай гъуьлягъар ракъурна; абуру исраилвияр ягъиз хьана ва гзафбур кьена.

⁷ Халкь Мусадин кьилив атана ва лагьана: «Реббидилай ва валай наразивал малумаруникди, чна гунагьдиз рехъ гана. Реббиди чун гъуьлягърикай хилас авун патал дуьа ая». Мусади халкьдихъ дуьа авуна,

⁸ ва Реббиди Мусадиз лагьана: «Са гъуьлягъ раса ва ам юркунал алкӀура: ягъай гьар сад гьадаз килигда ва чан алаз амукьда».

⁹ Мусади буьруьнждин гъуьлягъ расна ва ам юркунал алкӀурна. Ва гъуьлягъди инсан ягъай чӀавуз, ам, буьруьнждин гъуьлягъдиз килигуникди, сагъ саламат яз амукьдай.

Магьабдиз фидай рехъ

¹⁰ Исраилдин рухвайри чпин рехъ виликди давамарна ва Убатда акъваз хьана.

¹¹ Абур Убатдай рекьиз экъечӀна ва Ийе-Аберимда, Магьабдин рагъ экъечӀдай пата авай кьурумда, акъваз хьана.

¹² Анай абуру рехъ давамарна ва Зеред кьере акъваз хьана.

¹³ Анай абур виликди рекье гьатна ва амарийрин сергьятрилай физвай Арнан вацӀун кьибле патан къерехда авай кьурумда акъваз хьана. Арнанни им Магьабдинни амарийрин арада авай Магьабдин сергьят я.

¹⁴ Ингье вучиз «Реббидин дявейрин ктабда» икӀ лагьанватӀа: «Суфада авай Вагьеб ва Арнандин вацӀун хилер,

¹⁵ ва кӀамун хуш квай хур, чеб Аралай чил галайвал экӀя хьанвай ва Магьабдин сергьят кьуна физвай».

¹⁶ Анай абуру чпин рехъ Беэр галайвал, къуйдихъ, анал Реббиди Мусадиз икӀ лагьай чкадал давамарна: «Халкь кӀватӀа, ва За абуруз яд гуда».

¹⁷ А чӀавуз Исраилди и мани лугьузвай: «АцӀуцӀ, къуй! Адакай мани лагь,

¹⁸ регьберри эгъуьннавай къуйдикай, эгъуьнна халкьдин вилик-кьилик квайбуру гьукумдин лишанар тир асайралди ва лашаралди». Абур кьурумдай Матандиз,

¹⁹ Матандай Нагьалиялдиз, Нагьалиялдай Баматдиз,

²⁰ Баматдайни кьурумдай Фасгадин кукӀуш хкаж хьанвай Магьабда авай дередиз рекье гьатна.

Сигьанан винел гъалибвал

²¹ Исраилди амарийрин пачагь Сигьаназ икӀ лугьун патал векилар ракъурна:

²² «Чун ви уьлкведай яна фидайвал ракъура. Чун я ник, я ципицӀ багъ галайвал элкъведач, къуйрай яд хъвадач. Чун ви уьлкведай экъечӀдалди Пачагьдин рехъ кьуна фида».

²³ Амма Сигьана Исраил вичин чилелай ракъурнач. Ада кьушун кӀватӀна ва Исраилдин къаншардиз кьурумдиз гьахьна. Ягьацдив агакьайла, ам Исраилдихъ галаз женгиник экечӀна.

²⁴ Амма Исраилди ам турунин хура туна ва Арнан вацӀалай Яббукь вацӀалди, аманийрив къведалди, вучиз лагьайтӀа аманийрин сергьят сенгерар янавайди тир, – адан чилер кьуна.

²⁵ Исраилди амарийрин вири шегьерар кьуна ва абур, патарив экӀя хьанвай вири хуьрерни кваз, вичин гъилик кутуна. Гьешбан ва адан патарив гвай хуьрерни кваз.

²⁶ Гьешбан шегьер Сигьанан, Магьабдин виликан пачагьдихъ галаз дяве авур ва лап Арнандал къведалди адан вири чилер къакъудай амарийрин пачагьдин, меркез тир.

²⁷ Ингье вучиз ашукьри икӀ мани лугьузватӀа: «Гьешбандиз ша – эхциграй; Сигьанан шегьер руквадикай хкаж хъхьурай!

²⁸ Гьешбандай цӀай акъатзава, Сигьанан шегьердин ялав. Ада Магьабдин Ар туькьуьнна, Арнандин хкажнавай пак чкайрин иесияр тир.

²⁹ Дерт я ваз, Магьаб! Кемашан халкь терг хьана квахьна! Рухваяр катуниз мажбур хьана, Рушар – есирар Амарийрин пачагь Сигьанан.

³⁰ Ви эвледар танкь хьана фена Гьешбандилай Дибандал кьван. Чна Нуфагьдал кьван барбатӀна, Медебадал кьван экӀя хьанвай».

³¹ ИкӀ Исраил амарийрин чилерал ацукьна.

³² Мусади кьил акъудна чирдайбур Яцер шегьердиз ракъурна, ва исраилвийри адан патарив гвай хуьрер, абурай амарияр чукурна, чпиз кьуна.

Аган винел гъалибвал

³³ Ахпа абур элкъвена Башан уьлкве галайвал рекье гьатна, ва Башандин пачагь тир Аг вичин кьушунни галаз, абурухъ галаз Эдреи шегьердин патарив женг чӀугун патал, абурун къаншардиз экъечӀна.

³⁴ Реббиди Мусадиз лагьана: «Адахъай кичӀе жемир. За ам адан вири кьушун ва чилерни галаз ви гъиле вуганва. Адаз вичи Гьешбанда агъавал авур Сигьаназ, амарийрин пачагьдиз, кьур кар яхъ.

³⁵ Абуру ам чан аламаз садни тутуна, адан рухваяр ва аскерарни галаз яна кьена, ва абурун чилер чпиз кьуна».