Кьурумда 18 - Пак Калам

Хахамринни левийрин везифаяр

¹ Реббиди Гьаруназ лагьана: «Вун, ви рухваяр ва ви бубадин кӀвал ибадатхана чиркин хьунин патахъай жавабдар я, амма анжах са вунни ви рухваяр хахамвал чиркин хьунин патахъай жавабдар я.

² Вунани ви рухвайри Шагьидвилин Алачухдин вилик къуллугъ ийидайла, абур вахъ галаз жедайвал ва ваз куьмек ийидайвал, ви бубадин тухумдай тир са тайифадикай тир левияр жуван патав кьабула.

³ Абуру ваз куьмекар авурай ва Алачухда вири везифаяр кьилиз акъудрай, амма ибадатханада авай я къаб-къажахдиз, я къурбангандиз мукьва тахьурай, тахьайтӀа гьабурни рекьида, куьнни.

⁴ Ана лазим тир вири кӀвалахар ийиз, Гьалтунин Алачухдихъ гелкъуьн патал, абур вахъ галаз хьуй, ва маса са касни квехъ галаз тахьурай.

⁵ Инлай кьулухъ Зи хъел мад Исраилдин рухвайрал ават тавун патал, ибадатханадин ва къурбангандин кӀвалахар куьне кьиле твах.

⁶ За лагьайтӀа, Жуван гъилералди куь тайифадикай тир левияр квез садакьа яз хкяна. Абур Гьалтунин Алачухда къуллугъ авун патал Реббидиз акъуднава.

⁷ Амма къурбангандихъ галаз алакъада авай ва пердедилай кьулухъ пата авайдахъ галаз алакъада авай вири везифаяр анжах ваз ва ви рухвайриз кьиле тухудай ихтияр ава. За квез хахамвал савкьват яз гузва. Ибадатханадиз мукьва хьайи чара гьар са кас ажалдин гъиле туна кӀанда».

Хахамар ва левияр патал садакьаяр

⁸ Реббиди Гьаруназ лагьана: «За Жува Заз гъизвай вири садакьайрал вил алаз хьун вал тапшуругънай. Заз Исраилдин рухвайри гъизвай вири пак тир садакьаяр За куь даиман пай яз, ваз ва ви рухвайриз гузва.

⁹ Паквилерин пак тир садакьайрин цӀай яна кун тийизвай а пай вал гьалтда. Заз савкьват яз гъизвай паквилерин пак тир садакьайрин – кӀандатӀа им фан къурбанд хьуй, ва я гунагьдай къурбанд хьуй, я тушни тахсир хиве кьунин къурбанд хьуй, – и пай ваз ва ви рухвайриз жеда.

¹⁰ Ам паквилерин пак затӀ хьиз неъ; ам гьар гьи хьайитӀани итимдивай нез жеда. Адан паквилиз гьуьрмет ая.

¹¹ Ингье мад вуч види ятӀа: Исраилдин рухвайри садакьа ийизвай вири зурзун-къурбандар. За им ваз, ви рухвайриз ва ви рушариз даиман пай яз гузва. Ви кӀвале авай вич михьи тир гьар нивай хьайитӀани им нез жеда.

¹² За ваз Реббидиз гузвай сифте бегьердин нетижа тир виридалайни хъсан зейтундин чӀем, таза чехир ва техил гузва.

¹³ Реббидиз гъизвай чилин сифте бегьердин майваяр вибур жеда. Ви кӀвале авай вич михьи тир гьар нивай хьайитӀани абур нез жеда.

¹⁴ Исраилда Реббидиз акъуддайди яз вуч гъанвайтӀани, види я.

¹⁵ Реббидиз гъизвай хизанда авай сифте ругул ва эркек сифте дулдин гьайван – види я. Амма гьар гьим хьайитӀани эркек сифте аял ва чиркин гьайванрин эркек сифте бала пулунихъ маса къахчу.

¹⁶ Абурун са варз тамам хьайила, ибадатханадин тайин тир кьадардай къимет гана: вичин заланвал къад герагь тир гимишдин вад шекъел, – абур пулунихъ маса къахчу.

¹⁷ Эркек сифте дулдин яцар, хпер ва я цӀегьер пул гана къахчумир; абур пак я. Абурун ивидалди къурбанган хъичина ва абурун пи цӀун къурбанд яз, Реббидиз хуш ни галай гум яз куг.

¹⁸ Абурун як, зурзун-къурбанддикай тир хурун як ва эрчӀи ятур хьиз, вал гьалтда.

¹⁹ Исраилдин рухвайри Реббидиз гъизвай вири пак тир савкьватар За куь даиман пай яз вазни ви рухвайриз ва ви рушариз гузва. Им Реббидинни ви ва ви эвледрин арада авай эбеди икьрар я».

²⁰ Реббиди Гьаруназ лагьана: «Ваз абурун чилел ирс яз я белген, я абурун арада пай жедач; Исраилдин рухвайрин арада ви белгенни, ви пайни Зун я.

²¹ Гьа икӀ Гьалтунин Алачухда къуллугъ авунай За левийриз мулкунин чкадал Исраилда авай кьван вири затӀарин цӀуд паюникай са пай ирс яз гузва.

²² Инлай кьулухъ Исраилдин рухваяр Гьалтунин Алачухдиз мукьва тахьурай, тахьайтӀа абур, чпин кьилел гунагь гъуналди, рекьида.

²³ Анжах са левийри Гьалтунин Алачухдик кӀвалахар кьиле тухурай ва чиркин хьунин патахъай жавабдарвал чӀугурай. Гележегдин несилар патал и къалурнавай къайда даиманди жеда. Абурув Исраилдин рухвайрин арада ирс яз белген агакьдач.

²⁴ Адан чкадал За левийриз Исраилдин рухвайри Реббидиз савкьват яз гъизвайдан цӀуд паюникай са пай ирс яз гузва. Гьавиляй За абурукай икӀ лугьунни авуна: „Абурухъ Исраилдин рухвайрин арада ирс яз белген жедач“».

²⁵ Реббиди Мусадиз лагьана:

²⁶ «Левийрихъ галаз рахух ва абуруз лагь: „Квев Исраилдин рухвайривай За квез ирс яз гузвай цӀуд паюникай са пай агакьай чӀавуз, адан цӀудай са пай Реббидиз савкьват яз гъваш.

²⁷ Куь садакьа куь патай ратӀрал алай техил хьиз ва я шуткьургандай тир миже хьиз кьабулда.

²⁸ Гьа и къайдада дуьм-дуьз квев Исраилдин рухвайривай агакьзавай вири затӀарин цӀудан са паяр Реббидиз савкьват яз чара ая. Ам Реббидиз акъудзавай пай яз хахам Гьарунав вахце.

²⁹ Квез гузвайдан лап хъсан ва пак тир пай Реббидиз садакьа ая“.

³⁰ Левийриз лагь: „Куьне виридалайни хъсан пай садакьа авурла, ам квевай куь ратӀралай ва я куь шуткьургандай къачунвайди хьиз кьабулда.

³¹ Квевай ва куь кӀвалинбурувай амукьай пай гьина кӀандатӀани нез жеда – им Гьалтунин Алачухда къуллугъ авунай куь гьакъи я.

³² Куьне виридалдайни хъсан пай садакьа ийиз хьайитӀа, икӀ авур чӀавуз куьне жавабдарвал чӀугвадач. И чӀавуз куьне Исраилдин рухвайри гузвай пак тир савкьватар чиркин ийидач ва куьн рекьидач“».