Кьурумда 12 - Пак Калам

Мириамани Гьаруна Мусадал пехилвал авун

¹ Мириамани Гьаруна Мусадиз кушви тир папан патахъай ахмур ийизвай, вучиз лагьайтӀа ада кушвийрикай паб къачунвай.

² Абуру лугьудай: «Ребби анжах са Мусадихъ галаз раханайни кьван? Бес ам чахъ галазни раханачирни?» Реббидиз идан ван хьана.

³ Муса лагьайтӀа хъуьтуьл хесетрин, чилел виридалайни хъуьтуьл кас тир.

⁴ Садлагьана Реббиди Мусадиз, Гьаруназ ва Мириамаз лагьана: «Пудни санал Гьалтунин Алачухдал ша», – ва абур пудни экъечӀна фена.

⁵ Ребби цифедин гулуник кваз эвичӀна. Ам Алачухдин сивел акъвазна ва Гьаруназни Мириамаз вичин кьилив эверна, ва абур кьведни вилик экъечӀна.

⁶ И чӀавуз Ада лагьана: «Яб це кван зи гафариз! Куь арада Реббидин пайгъамбар аватӀа, Зун адаз вилерикай карагзавай затӀ хьиз ачух жезва, Адахъ галаз ахварра рахазва.

⁷ Амма Зи лукӀ Мусадихъ галаз икӀ туш; адаз вири Зи халкьдин юкьва вафа ава.

⁸ Адахъ галаз Зун чин-чинал рахазва, Ачухдиз, айгьамралди ваъ; Адаз Реббидин къамат аквазва. Бес квез гьикӀ кичӀе хьанач Зи лукӀ Мусадиз ахмур ийиз?»

⁹ Реббидиз абурукай хъел атана ва яргъаз хьана.

¹⁰ Циф Алачухдал хкаж хьайила, Мириам лацу жив хьтин жузамди кӀевна. Гьарун адахъ элкъвена ва ам жузамди кьунвайди акуна.

¹¹ Ада Мусадиз лагьана: «Минет я ваз, зи агъа, чна чи ахмакьвиляй авур гунагьдай чаз жаза гумир.

¹² Адакай вич гьеле дидедин руфунай экъечӀайла, бедендин са пай ктӀана руг хьанвай чан аламачиз хайи куьрпедиз ухшарди ийимир».

¹³ Мусадини Реббидиз дад-бидад авуна: «Аллагь, Ваз тавакъу хьурай, ам сагъара!»

¹⁴ Амма Реббиди жаваб гана: «Адан бубади адан чиниз тфу вегьенайтӀа, ам ирид йикъан вахтунда русвагьвилик жедачирни? Ам ирид йикъан вахтуналди кундилай къерехдиз акъудрай; ахпа адавай элкъвена хквез жеда».

¹⁵ Мириам ирид юкъуз кундилай къерехда туна, ва ам элкъвена хкведалди халкь рекьиз экъечӀнач.