Кьурумда 10 - Пак Калам

Гимишдин къаргъуяр

¹ Реббиди Мусадиз лагьана:

² «Эл кӀватӀун ва кундилай элячӀун патал гимишдикай гатанвай кьве къаргъу раса.

³ Абурай кьведайни ван авурла, вири эл Гьалтунин Алачухдин сивел ви патав кӀватӀ хьурай.

⁴ Садай ван авурла, ви патав регьберар – Исраилдин сихилрин кьиле акъвазнавайбур кӀватӀ хьурай.

⁵ КӀеви ван авурла, рагъэкъечӀдай пата кун кутунвай тайифаяр рекье гьатрай.

⁶ Кьвед лагьай гъилера кӀеви ван атайла, чпин кунар кьибле пата кутунвай тайифаяр рекье гьатрай. КӀеви ван рекье гьатунин лишан жеда.

⁷ Санал кӀватӀ хьуникай хабар гудайла, къаргъуйрив ван ийиз тур, амма кӀеви ванер акъудмир.

⁸ Къаргъуйрив хахамри, Гьарунан рухвайри, ван ийиз тада. Куьн ва къведай несилар патал и къалурнавай къайда даиманди жеда.

⁹ Куь чилел квев чуькьвена кьулухъ чӀугваз тазвай душмандихъ галаз женг чӀугваз экъечӀайла, къайгъуйрай кӀеви ванер акъуд. И чӀавуз куьн Реббидин, куь Аллагьдин, рикӀел хкведа ва душманрикай хуьда.

¹⁰ Шадвилерин вахтунда, ЦӀийивацран ва маса суварриз, кунугрин ва суварин къурбандрин винел къаргъуяр ягъа – им куь Аллагьдин вилик куьн рикӀел хкун жеда: Зун Ребби, куь Аллагь я».

Синай дагъдилай уьлкведин сергьятдал кьван ( 10:11–14:45 ) Исраилвияр Синай туна фин

¹¹ Кьвед лагьай йисан кьвед лагьай вацран къад лагьай юкъуз циф Шагьидвилин Алачухдин винелай хкаж хьана.

¹² Исраилдин рухваяр Синай кьурумдай рекьиз экъечӀна ва, циф Паран кьурумдал акъваз жедалди, санай-саниз сиягьат авуна.

¹³ Абур Мусадин мецелай тир Реббидин эмирдалди сифте сефер яз рекье гьатнай.

¹⁴ Сифте вичин пайдахдик кваз Ягьудан кундал алай кьушунни абурун хизанар юзана. Ягьудан тайифадин кьиле Аминадабан хва Нагьшун акъвазнавай.

¹⁵ Цуарран хва Натанаил Исахаран тайифадин кьушундин кьиле акъвазнавай,

¹⁶ Гьелунан хва Элиабни – Забулунан тайифадин кьушундин кьиле.

¹⁷ Алачух кӀватӀна ва ам ялзавай гершаниярни мерарияр рекье гьатна.

¹⁸ Гуьгъуьналлаз чпин пайдахдик кваз Рувенан кьушунни абурун хизанар виликди фена. Рувенан тайифадин кьиле Шедеуран хва Элицур акъвазнавай.

¹⁹ Цуришаддаян хва Шелуьмиял Шимунан тайифадин кьушундин кьиле акъвазнавай,

²⁰ Дегуялан хва Элиасаф, – Гадан тайифадин кьушундин.

²¹ Ахпа, пак тир къаб-къажахни гваз къегьатияр рекье гьатна. Алачух абур цӀийи чкадал агакьдалди ягъун лазим тир.

²² Гуьгъуьналлаз чпин пайдахдик кваз Ифраиман кундал алай кьушунни абурун хизанар рекье гьатна. Ифраиман тайифадин кьиле Амигьудан хва Элишам акъвазнавай.

²³ Педацуран хва Гамалиял Манашедин тайифадин кьушундин кьиле акъвазнавай,

²⁴ Гидеунидин хва Абиданни – Бунъяминан тайифадин кьушундин.

²⁵ Эхиримжибур яз, вири дестейрин далу пад хуьз, чпин пайдахдик кваз Данан кундал алай кьушунни абурун хизанар рекьиз экъечӀна. Данан тайифадин кьиле Амишадаян хва Агьиэзер акъвазнавай.

²⁶ Ашеран тайифадин кьушундин кьиле Ахранан хва Пагиял,

²⁷ Энанан хва Агьирни – Нифталидин тайифадин кьушундин кьиле.

²⁸ Абур рекье гьатдайла, Исраилдин рухвайрин кьушун жергейра аваз финин къайда гьа ихьтинди тир.

Вичин халкь Аллагьди Вичи тухун

²⁹ Мусадин яран буба тир мидиянви Регуилан яни ЙитӀаран хва Гьабабаз Мусади икӀ лагьана: «Чун Реббиди вичикай: „За ам квез гуда“ – лагьай вилаятдиз рекье гьатда. Чахъ галаз ша, чнани вахъ галаз хъсан рафтарвал ийида, Реббиди Исраилдиз хъсанвилер хиве кьунва эхир».

³⁰ «Ваъ, зун фидач. Зун жуван чилел мукьва-кьилийрин патав хъфида».

³¹ Амма Мусади лагьана: «Тавакъу ийизва, чун тамир. Ваз кьурумда чна гьинал кун кутуна кӀандатӀа чида эхир, ва чаз рехъ къалурдайди жеда.

³² Вун чахъ галаз фейитӀа, чна Реббиди чи гъиле твадай вири кван вахъ галаз пайда».

³³ Абур Реббидин дагъдилай рекье гьатна ва пуд юкъуз фена. Реббидин Икьрардин сандух абуруз ял ядай чка къалуриз, пуд юкъуз абурун вилик кваз фена,

³⁴ Реббидин циф лагьайтӀа, кундилай элячӀна абур рекье гьатай чӀавуз, юкъуз абурун винел алай.

³⁵ Икьрардин сандух рекье гьатайла, Мусади лугьудай: «Къарагъ, Ребби! Вири душманар гьарнихъ чукӀурай; Вун гзаф такӀанбур Ви вилик акатна катрай».

³⁶ Сандух акъваз хьайила, ада лугьудай: «Ребби, элкъвена хъша Исраилдин сан-гьисаб авачир агъзуррин патав».