Кьурумда 1 - Пак Калам

Синайдин вакъиаяр ( 1:1–10:10 ) Исраилдин халкьдин кьадар тайинарун

¹ Кьвед лагьай вацран сад лагьай юкъуз, исраилвияр Мисридай экъечӀайдалай инихъ кьве йис хьайила, Ребби Синайдин кьурумда Гьалтунин Алачухда Мусадихъ галаз раханай. Ада лагьана:

² «Исраилдин элдин, сад садан гуьгъуьналлаз, гьар са итимдин тӀвар кьуна, тухум ва сихил тирвал кьадар тайинара.

³ Гьарунахъ галаз санал аскервиле къуллугъ авуниз виже къведай вири исраилвияр, къад йис хьанвайбурулай гатӀунна ва гьадалай виниз, халкьдин кьушундин къайдада къелемдиз къачу.

⁴ Гьар са тайифадай квез, вич вичин сихилдин кьил тир са касди куьмек авурай.

⁵ Ингье квез куьмек гудайбурун тӀварар: Рувенан патай – Шедеуран хва Элицур;

⁶ Шимунан патай – Цуришаддаян хва Шелуьмиял;

⁷ Ягьудан патай – Аминадабан хва Нагьшун;

⁸ Исахаран патай – Цуаран хва Натанаил;

⁹ Забулунан патай – Гьелунан хва Элиаб.

¹⁰ Юсуфан рухвайрин патай: Ифраиман патай – Амигьудан хва Элишам; Манашедин патай – Педацуран хва Гамалиял.

¹¹ Бунъяминан патай – Гидеунидин хва Абидан;

¹² Данан патай – Амишадаян хва Агьиэзер;

¹³ Ашеран патай – Ахранан хва Пагиял;

¹⁴ Гадан патай – Дегуялан хва Элиасаф;

¹⁵ Нифталидин патай – Энанан хва Агьир».

¹⁶ Ибур вири элдин патай тайинарнавайбур, тайифайрин регьберар, Исраилдин тухумрин кьиле авайбур тир.

¹⁷ Мусадини Гьаруна тӀварба-тӀвар къалурнавай ксарихъ галаз санал

^18-19 кьвед лагьай вацран сифте юкъуз элдиз эверна. Исраилвийри чпин тухумдик акатзавайбур сихил тирвал малумарна, ва къад йис ва гьадалай гзаф тамам хьанвайбур, Реббиди Мусадиз эмир гайивал, сад садахъ галаз тӀварар кьаз къелемдиз къачуна. Ада Синай кьурумда авай абур икӀ гьисабна:

²⁰ Исраилан сифте хва тир Рувенан эвледрикай: аскервиле къуллугъ авуниз виже къведай, къад йис ва гьадалай виниз тамам хьанвай вири итимар сад садахъ галаз тухум ва сихил тирвал тӀварба-тӀвар гьисабна.

²¹ Рувенан тайифада абурун кьадар 46500 тир.

²² Шимунан эвледрикай: аскервиле къуллугъ авуниз виже къведай, къад йис ва гьадалай виниз тамам хьанвай вири итимар сад садахъ галаз тухум ва сихил тирвал тӀварба-тӀвар къелемдиз къачуна.

²³ Шимунан тайифада абурун кьадар 59300 тир.

²⁴ Гадан эвледрикай: аскервиле къуллугъ авуниз виже къведай, къад йис ва гьадалай виниз тамам хьанвай вири итимар сад садахъ галаз тухум ва сихил тирвал тӀварба-тӀвар къелемдиз къачуна.

²⁵ Гадан тайифада абурун кьадар 45650 тир.

²⁶ Ягьудан эвледрикай: аскервиле къуллугъ авуниз виже къведай, къад йис ва гьадалай виниз тамам хьанвай вири итимар сад садахъ галаз тухум ва сихил тирвал тӀварба-тӀвар гьисабна.

²⁷ Ягьудан тайифада абурун кьадар 74600 тир.

²⁸ Исахаран эвледрикай: аскервиле къуллугъ авуниз виже къведай, къад йис ва гьадалай виниз тамам хьанвай вири итимар сад садахъ галаз тухум ва сихил тирвал тӀварба-тӀвар къелемдиз къачуна.

²⁹ Исахаран тайифада абурун кьадар 54400 тир.

³⁰ Забулунан эвледрикай: аскервиле къуллугъ авуниз виже къведай, къад йис ва гьадалай виниз тамам хьанвай вири итимар сад садахъ галаз тухум ва сихил тирвал тӀварба-тӀвар гьисабна.

³¹ Забулунан тайифада абурун кьадар 57400 тир.

³² Юсуфан хва Ифраиман эвледрикай: аскервиле къуллугъ авуниз виже къведай, къад йис ва гьадалай виниз тамам хьанвай вири итимар сад садахъ галаз тухум ва сихил тирвал тӀварба-тӀвар къелемдиз къачуна.

³³ Ифраиман тайифада абурун кьадар 40500 тир.

³⁴ Юсуфан хва Манашедин эвледрикай: аскервиле къуллугъ авуниз виже къведай, къад йис ва гьадалай виниз тамам хьанвай вири итимар сад садахъ галаз тухум ва сихил тирвал тӀварба-тӀвар къелемдиз къачуна.

³⁵ Манашедин тайифада абурун кьадар 32200 тир.

³⁶ Бунъяминан эвледрикай: аскервиле къуллугъ авуниз виже къведай, къад йис ва гьадалай виниз тамам хьанвай вири итимар сад садахъ галаз тухум ва сихил тирвал тӀварба-тӀвар къелемдиз къачуна.

³⁷ Бунъяминан тайифада абурун кьадар 35400 тир.

³⁸ Данан эвледрикай: аскервиле къуллугъ авуниз виже къведай, къад йис ва гьадалай виниз тамам хьанвай вири итимар сад садахъ галаз тухум ва сихил тирвал тӀварба-тӀвар къелемдиз къачуна.

³⁹ Данан тайифада абурун кьадар 62700 тир.

⁴⁰ Ашеран эвледрикай: аскервиле къуллугъ авуниз виже къведай, къад йис ва гьадалай виниз тамам хьанвай вири итимар сад садахъ галаз тухум ва сихил тирвал тӀварба-тӀвар къелемдиз къачуна.

⁴¹ Ашеран тайифада абурун кьадар 41500 тир.

⁴² Нифталидин эвледрикай: аскервиле къуллугъ авуниз виже къведай, къад йис ва гьадалай виниз тамам хьанвай вири итимар тухум ва сихил тирвал тӀварба-тӀвар къелемдиз къачуна.

⁴³ Нифталидин тайифада абурун кьадар 53400 тир.

⁴⁴ Гьа ибур Мусадини Гьаруна ва чпикай гьар сада вичин сихилрин векилвал ийизвай Исраилдин цӀикьвед регьберди сиягьдиз къачунвай итимар тир.

⁴⁵ Аскервиле къуллугъ авуниз виже къведай, чпин къад йис ва гьадалай виниз тамам хьанвай вири Исраилдин рухваяр чпин сихилар тирвал сиягьдиз къачунай.

⁴⁶ Абурун виридан кьадар 603550 тир.

⁴⁷ Амма Левидин тайифадай тирбур амайбурухъ галаз санал сиягьдиз къачунвачир.

⁴⁸ Реббиди Мусадиз лагьана:

⁴⁹ «Левидин тайифа къелемдиз къачумир ва амай Исраилдин рухвайрихъ галаз санал абурун кьадар тайинармир.

⁵⁰ Левийрал Шагьидвилин Алачух, адан вири къаб-къажах ва адаз талукь тир вири затӀар аманат ая. Абуру Алачух ва адаз талукь тир вири къаб-къажах ял авурай, абурун патахъай къайгъударвал авурай ва Алачухдин къваларив чпин кун туькӀуьр авурай.

⁵¹ Алачух маса чкадиз акъуддай чӀавуз, ам левийри алудрай, ам экӀягъун герек тирла, гьа и кӀвалахни абуру кьилиз акъудрай. Патан кас адан мукьув атайтӀа, ам ажалдин хура твада.

⁵² Исраилдин рухвайри алачухар халкьдин кьушундин къайдада, гьар сада вичин кундал, вичин пайдахдик экӀяда.

⁵³ Амма левийри, Исраилдин эл хъилек акат тийидайвал, алачухар элкъвена Шагьидвилин Алачухдин къваларив эцигда. Левияр Шагьидвилин Алачухдин къаравулар жеда».

⁵⁴ Исраилдин рухвайри, Реббиди Мусадиз гьикӀ эмир авунатӀа, вири дуьм-дуьз гьа жуьреда авуна.