Крар 8 - Пак Калам

Шаула иманияр хурук кутун

¹ Шаула Истефас кьин дуьз кар яз гьисабнай. Гьа йикъалай Ярусалимда Исадихъ иманийрин кӀватӀал кӀевелай хурук кутаз эгечӀнай. Илчийрилай гъейри, амай вири катна фена, Ягьудатдизни Самариятдиз чкӀанай.

² Аллагь рикӀел алай инсанри Истефас кучукна, адахъ чӀехи шел-хвал авунай.

³ Шаул иманийрин кӀватӀал терг ийиз алахъзавай. Ада, кӀваляй кӀвализ физ, имандал атай итимарни папар кьаз, абур къазаматда тваз хьана.

ФилипӀ Самаратда

⁴ Ярусалимдай катайбуру, чеб гьина аваз хьайитӀани виринра Шад Хабар агакьариз, Аллагьдин Гаф чукӀурзавай.

⁵ ФилипӀ Самариятдин меркездиз атана, ана Месигьдикай муштулухар гуз хьана.

⁶ ФилипӀа къалурзавай керемат-ишараяр акваз, адаз яб гайи вири инсанри рикӀивай адан крариз фикир гузвай.

⁷ ЧӀуру жинерар квайбурукай гьарай галаз абур хкатзавай, фалужди янавайбурни кьецӀибур сагъ хъжезвай.

⁸ Шегьерэгьлияр лап шад тир.

⁹ И шегьерда ицитӀар авунал машгъул са кас авай, адан тӀварни Симун тир. Адан ицитӀвилел самаратвияр вири гьейран тир. Ада вич зурба кас хьиз къалурзавай.

¹⁰ Адан аламатри пун квайбурун ва амай маса инсанрин фикирар чпел желбзавай. – Симун – Аллагьдин Къуват я, а Къуватдиз Зурбади лугьузва, – тестикьзавай абуру.

¹¹ Инсанрин фикирар ада вичихъ желбнавай, вучиз лагьайтӀа вичин гьиллейрив вири мягьтелариз хейлин вахтар тир.

¹² ФилипӀа, лагьайтӀа, Аллагьдин Пачагьлугъдикайни Иса Месигь тирдакай Шад Хабарар гузвай. Итимарни, папарни имандал къвезвай ва абуру цик акахьун къачузвай.

¹³ Симунни имандал атана, ада цик акахьун къачуна ва ам ФилипӀахъ галаз амукьна. ФилипӀа къалурзавай аламатар ва керемат-ишараяр акваз, ам мягьтел жезвай.

¹⁴ Самаратдин халкьди Аллагьдин Гаф кьабулна лугьудай хабар Ярусалимда авай илчийрал агакьайла, абуру аниз Петруни Ягья ракъурна.

¹⁵ Абуру, атана, цӀийиз иман кьабулайбурук Пак Руьгь акатрай лугьуз, дуьаяр ийиз хьана,

¹⁶ вучиз лагьайтӀа абурук гьеле садакни Пак Руьгь акатнавачир. Абуру анжах Иса Месигьдин ТӀварцӀелай цик акахьун къачунай.

¹⁷ Ахпа Петрудини Ягьяди абурал гъилер эцигна, абурук Пак Руьгь акатна.

¹⁸ Илчийри гъилер эцигуникди, инсанрик Руьгь акатзавайди акур Симуна абуруз пул гъана

¹⁹ ва лагьана: – За садал гъилер эцигайла, гьа касдикни Пак Руьгь акатдайвал куьне зазни гьахьтин къуват це.

²⁰ – Вуна Аллагьди гузвай пай пулунихъ къачуз жеда лугьузватӀа, вун гьа пулни галаз кьий! – жаваб гана Петруди.

²¹ – Ваз и карда иштиракдай са ихтиярни авач, вучиз лагьайтӀа ви рикӀ Аллагьдин вилик гьахъ туш.

²² Ша, вун Аллагьдин рекьел элячӀ, Реббидиз дуьаяр ая, белки Ада ви рикӀе чӀуру фикир хьунилай гъил къахчун.

²³ Ви рикӀ туькьуьлвилив ацӀанвайди ва вун батӀулвилин зунжурра гьатнавайди заз аквазва.

²⁴ Инал Симуна тӀалабна: – Куьне лагьай крар зи кьилел текъведайвал за квез зи паталай Аллагьдиз дуьаяр авун тавакъу ийизва.

²⁵ Чпин вилериз акур кьван крарикай инсанриз суьгьбетар авуна, Аллагьдин Гаф абурал агакьарайдалай кьулухъ, илчияр Ярусалимдиз хъфена. Хъфидай рекье абуру Самариятдин гзаф кьадар хуьрера Шад Хабардикай ахъайиз хьана.

ФилипӀни эфияпви

²⁶ Реббидин малаикди ФилипӀаз лагьана: – Къарагъ, кьибледихъ Ярусалимдай Газадиз физвай, кӀвачик гзаф квачир рекьел экъечӀ.

²⁷ ФилипӀ къарагъна фена. Ингье, эфияп худум – Гьебешдин Кандикат тӀвар алай пачагь-ханумдин вири хазина гъиле авай везир а рекьяй файтунда аваз физвай. Ам Ярусалимдай ибадат авуна

²⁸ кӀвализ хъфизвай. Файтунда ацукьна, ада Яшай пайгъамбардин ктаб кӀелзавай.

²⁹ Руьгьди ФилипӀаз лагьана: – А файтундиз мукьва хьана, адан къвалал алаз алад.

³⁰ ФилипӀ зверна файтундин патав атана. Анай адаз Яшай пайгъамбарди кхьенвай гафар эфияпвиди гьикӀ кӀелзаватӀа ван хьана. – Вун кӀелзавайдан гъавурда акьазвани? – хабар кьуна ФилипӀа адавай.

³¹ – Гъавурда твадай кас тахьайла, зун гьикӀ гьатрай? – жаваб гана везирди. Ада ФилипӀаз файтундиз акьахна вичин патав ацукьун теклифна.

³² Везирди Каламдай кӀелзавай чка ихьтинди тир: «Ам хеб хьиз, кьасаб ийиз тухванай, сар твазвайдан вилик квай кӀел кисдайвал, Ада гьич сивни ахъайзавачир.

³³ Ам акьван русвагь авунай хьи, Адаз атӀай карни гьахъди хьаначир. Адан эвледрикай лугьуз жедай вуж ава? Адан чан чилел къахчунай эхир» .

³⁴ Худумди ФилипӀавай хабар кьуна: – Лагь кван садра заз, ина пайгъамбар никай рахазва? Вичикай, я тахьайтӀа са масадакай?

³⁵ ФилипӀа, ада кӀелай чкадилай гатӀунна, адаз Исадикай Шад Хабар гуз хьана.

^36-37 Атана абур яд авай чкадив агакьна. – Ингье, ина ядни ава, – лагьана худумди. – Цик акахьун къачудайла, зи вилик пад ни кьада?

³⁸ Ада файтун акъвазра лагьана эмирна. ФилипӀни худум кьведни цел фена. ФилипӀа адав цик акахьун къачуз туна.

³⁹ Абур цяй экъечӀайла, Аллагьдин Руьгьди ФилипӀ садлагьана анлай къахчуна хутахна. Худумдиз ам мад ахкунач. Шад хьайи худумди вичин рехъ давамарна.

⁴⁰ ФилипӀ Ашдад шегьердиз акъатна. Ада Кесар шегьердиз фидай рекьел алай вири шегьеррив Шад Хабар агакьарна.