Крар 4 - Пак Калам

Меслягьатдин вилик

¹ Петруни Ягья халкьдив рахадайла, абурун патав хахамар, Аллагьдин КӀвалин къаравулрин кьилевайди ва сакъаяр атана.

² Илчийри халкьдиз чирвилер гузвайла, абуру, Исадал кьейидалай кьулухъ чан хтун чешне гъиз, кьейидалай кьулухъ чан хтун авай кар тирди чпин рахунра тестикьарзавай. Сакъайриз илчийрин и крарикай гзаф хъел атанвай.

³ Абуру Петруни Ягья кьуна ва геж вахт хьуниз килигна, пакамалди абур къазаматна.

⁴ Петрудизни Ягьядиз яб гайи гзафбуру Шад Хабардихъ иман авуна, гьа икӀ иманийрин кьадарни вад агъзурдав агакьна.

⁵ Пакагьан юкъуз чувудрин гьакимар, агъсакъалар ва тавратдарар Ярусалимда санал кӀватӀ хьана.

⁶ Абурук кьилин хахам Гьайнас, Каяф, Ягья, Искендер, кьилин хахамдин мукьва-кьилиярни акахь хъувунай.

⁷ Абуру Петруни Ягья чпин патав гъун эмирна, гъайила, жузуна: – Ихьтин крар ийидай къуват квез гьинай атана? И крар куьне нин тӀварцӀелай ийизва?

⁸ И чӀавуз Пак Руьгьдив ацӀай Петруди жаваб гана: – Эй халкьдин гьакимарни агъсакъалар!

⁹ КьецӀек гьикӀ сагъ хъхьанатӀа ачухарун патал къе куьне чавай жаваб гьаркьзава.

¹⁰ Квез ва Исраилдин вири халкьдиз чир хьухь хьи, и кас исятда куь вилик сагъ хъхьана акъвазун Назаретдай тир Иса Месигьдин ТӀварцӀелай авур кар я! Куьне Ам хашуниз яна кьена, амма Аллагьди Адал чан хкана.

¹¹ «Куьне – къванцин устӀарри – гьяз татана гадарай къванцикай цлан хандакӀдин пипӀе твадай лап кьилин къван хьана» . И гафар гьа Исадикай кхьенвайбур я.

¹² Хилас ийидай масад авач! Гьадан ТӀварцӀелай гъейри чун хиласдай маса тӀвар чилин винел алайди туш!

¹³ Петруни Ягья кӀелнавачир авам инсанар тирди чизвай гьакимар, абур викӀегьвилелди рахазвай тегьер акурла, тажуб жезвай. Гьакимриз абур Исадихъ галаз хьайи ксар тирдини чизвай.

¹⁴ Петрудинни Ягьядин патав абуру сагъар хъувунвай касни гваз акурла, гьакимривай са гафни абуруз акси яз лугьуз жезвачир.

¹⁵ Инал абуру илчийриз кӀваляй экъечӀун эмирна ва чпин арада меслятар ийиз эгечӀна.

¹⁶ – И инсанриз чна вуч ийин? – лугьузвай гьакимри, – абурун и чӀехи керемат-ишарадикай Ярусалимда авай вири агьалийриз чир хьанва, чавай а кар кваз такьуна жедач.

¹⁷ Исадикай халкьдин арада мадни гегьеншдиз ван чукӀун тавун патал, ша чна абуруз чпин рахунра Адан ТӀвар кьун къадагъа ийин.

¹⁸ Гьакимри илчияр мад эверна хкана, Исадин ТӀварцӀелай рахун ва чирвилер гун абуруз кӀевелай къадагъа авуна.

¹⁹ Амма Петрудини Ягьяди жаваб гана: – Де куьне лагь, чун Аллагьдилай гзаф квез табий хьунухь Аллагьдин вилик дуьз кар жедани?

²⁰ Чавай акурдакай ва ван хьайидакай лугьун тавуна акъвазиз жедач.

²¹ Гьакимривай илчийриз жаза гудай багьна жагъуриз жезвачир, абуруз кичӀерар гана ахъайна, вучиз лагьайтӀа илчийри авур кардай вири халкьди Аллагьдиз шукурар ийизвай.

²² Вич сагъ хъхьунин керемат-ишара акур касдин яшар яхцӀур йисалай виниз тир эхир.

Иманийрин дуьа

²³ Азад хъхьайдалай кьулухъ Петруни Ягья чпинбурун патав хъфена ва абуру чпиз чӀехи хахамрини агъсакъалри лагьай кьван гафарикай ихтилатна.

²⁴ Иманийриз ван хьайила, абуру вирида сад хьана дуьаяр авуна: «Эй Вири Ихтияррин Иеси! Чилни цав, гьуьлер ва анра авай гьар са затӀ халкь авурди Вун я.

²⁵ Чи буба ва Ви лукӀни тир Давудан мецелай Вуна Пак Руьгьдин куьмекдалди лагьанай: Вучиз къал-къил акатзава халкьарик, инсанрини туькӀуьрзава ичӀи фендер?

²⁶ Къарагъзава чилерин пачагьар ва гьакимар саналди меслят жезва Реббидиз акси яз, Адан Месигьдизни акси яз» .

²⁷ РикӀивайни, и шегьерда Гьирудни ПунтӀи ПилатӀ римвийрихъни Исраилдин халкьдихъ галаз сад хьанва. Абурухъ виридахъ Ви ГуьцӀуьр алай пак ЛукӀ Исадал гъил хкаждай чӀуру къаст авай.

²⁸ ИкӀ хьана кӀандайди Вуна виликамаз къетӀнай. И кар Ви къудратдин гьунар я.

²⁹ Исятда, я Ребби, гьакимри чаз гьикӀ кичӀерар гузватӀа, килиг. Гьавиляй Вуна чаз зурба викӀегьвилелди Ви гаф инсанриз чирдай къуват це.

³⁰ Инсанриз жуван къудрат къалура, къуй Ви пак ЛукӀ Исадин ТӀвар кьур-кьур чкада азарри кьунвайбур сагъ хъхьурай, аламатар ва керемат-ишараяр хьурай!

³¹ Дуьаяр авуна куьтягь хьайила, абур кӀватӀ хьанвай чка зурзана. Абур вири Пак Руьгьдив ацӀана, ва абуру Аллагьдин Гаф викӀегьвилелди инсанрив агакьариз хьана.

Вири уртах я

³² Иманияр рикӀералдини руьгьералди вири сад тир. Садани вичин эменни анжах са вичинди я лугьудачир, абурухъ авай-авачирди уртах тир.

³³ Илчийри Ребби Исадал чан хтайдакай уьтквемвилелди ва агалкьунар аваз шагьидвал ийиз хьанай, Аллагьдини абуруз виридаз чӀехи берекат гузвай.

³⁴ Абурун арада дарвиле авай кас авачир, чпихъ мал-мулк авайбуру вахт-вахтундилай, абур маса гуз, пул гъиз

³⁵ илчийрин ихтиярда твадай, а пул иманийрин арада гьар садаз герек кьадар пайдай.

³⁶ Месела, Юсуфа, Куьпридай тир левиди (адаз илчийри Барнаба, яни «Секинвал гудайди» лагьай тӀварни ганвай),

³⁷ вичин ник маса гана, пул гъана илчийрин гъиле вугана.