Крар 3 - Пак Калам

Петруди кьецӀи кас сагъар хъувун

¹ Садра сятдин пудаз, дуьа ийидай вахтунда Петруни Ягья Аллагьдин КӀвализ фенай.

² И чӀавуз Аллагьдин КӀвалин «Иербур» тӀвар алай варарихъ са кьецӀи кас гъана. Адавай дидедиз хьайидалай инихъ къекъвез жезвачир. Гьар юкъуз ам гъана гьанал эцигдай, адани Аллагьдин КӀвализ къвезвайбурувай садакьа тӀалабдай.

³ Аллагьдин кӀвализ гьахьиз кӀанзавай Петруни Ягья акурла, ада гьабурувайни садакьа тӀалабна.

⁴ Петруни Ягья элкъвена дикъетдивди адаз килигна. Петруди адаз лагьана: – Чаз килиг!

⁵ Абурувай са затӀ гьатдатӀа акваз кьил хкажна къекъвераг абуруз килигна.

⁶ Инал Петруди лагьана: – Гимишни къизил захъ авач, амма за ваз захъ авайди гуда. Назаретдай тир Иса Месигьдин ТӀварцӀелай за ваз лугьузва – къарагъна къекъуьгъ!

⁷ Петруди кьецӀекан эрчӀи гъил кьуна адаз къарагъиз куьмекна, гьасятда адан кӀвачерин кӀарабар мягькем хьана.

⁸ Ам къудгъунна кӀвачел къарагъна, къекъвез эгечӀна. Ам абурухъ галаз къекъвез ва хвешила хкадариз, Аллагьдиз шукурар ийиз, Аллагьдин КӀвализ гьахьна.

⁹ Вири инсанриз акуна хьи, ада къекъвез Аллагьдиз шукурар ийизва.

¹⁰ Абуруз ам Аллагьдин КӀвалин «Иербур» тӀвар алай варарихъ ацукьна, аниз фир-хквердавай садакьа тӀалабзавай кас тирди чир хьана. Халкь ам сагълам хьунал мягьтелни гьейран хьанвай.

¹¹ Сагъ хьайиди Петрудилайни Ягьядилай алатзавачир. Халкь атана Сулейманан ширас тӀвар алай чкада авай илчийрал гьейранвилелди алтӀушнай.

¹² И кар акур Петруди абуруз лагьана: – Исраилвияр! Вучиз куьн и кардал тажуб хьанва? Ам икӀ къекъведайвал авун чна чи къуватдалди ва я Аллагьдин вилик чи муъминвилин куьмекдалди авур хьиз яни квез?

¹³ Ибрагьиман, Исакьан ва Якьубан Аллагьди, чи бубайрин Аллагьди, Вичин ЛукӀ Исадал баркалла гъана. Куьне, лагьайтӀа, Ам дувандиз акъудна. ПилатӀаз Ам ахъа хъийиз кӀан хьанатӀани, куьне ПилатӀан вилик Исадикай кьил къакъудна.

¹⁴ Куьне Пак ва Гьахъ-Михьи Касдикай кьил къакъудна ва ивикъич ахъаюн тӀалабна.

¹⁵ Амма куьне уьмуьр Гузвайди кьена. Аллагьди Адал чан хкана, чун а кардин шагьидар я!

¹⁶ Иса Месигьдин ТӀварцӀихъ иман авуни и квез аквазвай ва чидай кас мягькемарна. Исадихъ иман авуни и кас сагъар хъувуна, и кар квез виридаз акваз-акваз кьилиз акъатна.

¹⁷ Гила, стхаяр, заз чизва хьи, куьне Иса рекьидай чӀавуз квез, куь кьиле авайбуруз хьиз, куьне вуч ийизватӀа чизвачир.

¹⁸ Месигьди азаб-азият чӀугуникай Аллагьди вири пайгъамбаррин мецелди виликамаз лугьунни авунай, Ада и кар кьилизни акъуднай.

¹⁹ Куь гунагьрилай гъил къахчун патал Аллагьдиз килиг ва Адан рекьел ша!

²⁰ Гьа чӀавуз Аллагьди куь руьгьер кӀубанарда ва куь патав квез виликамаз тайинарнавай Месигь – Иса ракъурда.

²¹ Гьеле кьуд пад цӀийи хъжедалди Ам цаварал аламукьун лазим я. Аллагьдини къадим вахтарилай инихъ Вичин пак пайгъамбардин мецелди гьа икӀ жеда лагьанай.

²² Мусади лагьанай: «Реббиди, куь Аллагьди, квез зун хьтин пайгъамбар ракъурда, ам квекай сад жеда. Куьн гьар са карда гьа пайгъамбардиз табий хьухь.

²³ Адан чӀалаз килигзавачир гьар вуж хьайитӀани халкьдин арадай чукурда ва ам телеф жеда».

²⁴ Смаилалай эгечӀна вири пайгъамбаррини гьа и йикъара кьиле фейи крарикай виликамаз лагьанай.

²⁵ Пайгъамбардин эвледарни Икьрардин варисар куьн я. Аллагьди Ибрагьимаз лагьай и гафарив куь бубайрихъ галаз и Икьрар кутӀуннавай: «Ви несилар чилел алай вири халкьар патал хийир-дуьа жеда».

²⁶ Аллагьди Вичин лукӀрал чан хкайла, сифте Ада Ам куьн гунагь рекьивай яргъа авун патал куь патав ракъурна, гьа икӀ Аллагьди Вичин лукӀарин куьмекдалди квез хийир-дуьа авуна.