Крар 28 - Пак Калам

Малта атӀадал

¹ Сагъ-саламатдиз гьуьлуьн къерехдиз акъатайла, чаз чун алай къураматдиз Малта лугьузвайди чир хьана.

² Къураматдин агьалийри чун лап хъсандиз кьабулна. Марф къваз эгечӀна, мекьи хьана. Абуру цӀай хъувуна, чун илифарна.

³ Павела са къужахда авай кӀарасар кӀватӀна, абур цӀуз вегьиз хьана. ЦӀун чимивал гьиссна са гьинай ятӀани садлагьана акъатай гъуьлягъ Павелан гъилик ккӀана.

⁴ Къураматдин агьалийриз Павелан гъиликай куьрс хьанвай гъуьлягъ акурла, абуру сада садаз лугьузвай: – И кас са инсан яна кьенвайди хьунухь лазим я. Гьуьле завалдикай хилас хьанватӀани, Кьисасдин аллагьди адал чан тадач эхир.

⁵ И чӀавуз Павела гъил юзурна, гъуьлягъ цӀуз вегьена. Гъуьлягъди адаз гьич са зиянни ганач.

⁶ Инсанар адал вил алаз акъвазнавай. Абуру ам дакӀвада ва я садлагьана кьена ярх жеда лугьуз вил алаз гзаф вахт хьана, амма адаз затӀни тахьанвайди акурла, абуру чпин фикирар дегишарна, ам аллагь я лугьуз хьана.

⁷ Чун акъвазнавай чка анин сердер Публусдин мулкарин мукьув гвай. Ада чун лап хъсандиз илифарна. Пуд юкъуз чун адан кӀвале хьана.

⁸ Адан буба азарди кьуна месе авай. Адак цӀайни руфунин тӀал квай. Павела, адан патав фена, дуьа авуна, адал гъилер эцигна, ам сагъар хъувуна.

⁹ И кардилай гуьгъуьниз къураматдал алай чеб азарри кьунвай вирибур чеб сагъ хъхьун патал адан патав къведай.

¹⁰ Абуру чаз гзаф гьуьрметарнай. Чун рекье гьатиз кӀвачин хьайила, абуру рекьиз герек къведай кьван затӀаралди чун таъминарна.

Павел Римда

¹¹ Къураматдал пуд варз акъудайдалай кьулухъ чун ина кьуьд акъудай «Кьветхверар» тӀвар алай, Искендер шегьердин гимида аваз гьуьлуьз экъечӀна.

¹² СуьрекӀусдиз атана, гьана чун пуд юкъуз хьана.

¹³ Анай чун Регидиз фена. Пакагьан юкъуз кьибле патан гар къарагъна, кьвед лагьай юкъуз чун ПӀутӀигьулриз акъатна.

¹⁴ Чаз ана иманияр жагъана, абуру чавай чпихъ галаз са гьафтеда акъвазун тӀалабна. Эхирни чун Римдиз атана агакьна.

¹⁵ Чун къвезвайдакай ина авай стхайриз хабар авай, абур та Апидин Майданни Пуд Карвансара лугьудай чкайрал къведалди чун кьабулиз вилик атана. Павелаз а инсанар акурла, ада Аллагьдиз шукур авуна. Ам кӀубан хьана.

¹⁶ Чун Римдиз гьахьайла, Павелаз кьилди, амма къаравулдин вил алаз уьмуьр тухудай ихтияр гана.

Римда Шад Хабар чукӀурун

¹⁷ Пуд югъ алатайла, Павела Римдин чувудрин кьилевайбуруз вичин патав эверна. Абур кӀватӀ хьайила, ада лагьана: – Стхаяр, за я чи халкьдиз, я чи бан-бубайрин къайдайриз акси тир гьич са карни авуначтӀани, зун Ярусалимда къазаматна, римвийрин гъиле туна.

¹⁸ Абуруз, силисдал зак яна рекьидай хьтин са тахсирни квачиз акурла, зун ахъайиз кӀан хьана.

¹⁹ Амма чувудар акси хьуниз килигна, зи дуван Римдин пачагьди авун тӀалабуниз зун мажбур хьана. И кар за зи халкьдик са гьихьтин ятӀани тахсир кутун патал авурди туш.

²⁰ Куьн акун патал ва квехъ галаз рахун патал къе за куьн кӀватӀни авунва. Исраилди умуд кутунвай кардихъ иман авуна лугьуз, къе зун къазаматдани тунва.

²¹ – Ягьудатдай ви гьакъиндай чаз гьич са чарни атанач, – жаваб гана яб гузвайбуру. – Чи патав атанвай стхайрикай гьич садани чаз вакай са пис гафни лагьанач.

²² Амма чаз вуна вуч лугьудатӀа гьадаз яб гуз кӀанзава, вучиз лагьайтӀа чаз а гапӀалдикай чизва, адакай вирина аксивилелди рахазва.

²³ Абуру чеб Павелан патав къведай югъ тайинарна. А юкъуз адан кӀвализ гзаф инсанар атана. Экуьнилай няналди Павела абуруз Аллагьдин пачагьвиликай шагьидвалзавай. Ам Мусадин Къанундикай ва пайгъамбаррин ктабрикай бине кьуна, абур Иса – Месигь тирдан чӀалахъариз алахъзавай.

²⁴ Садбур ада имандал гъана, муькуьбур адан чӀалахъ жезвачир.

²⁵ Абур са фикирдал алачиз хъфизвай. Павела абуруз лагьана: – Пак Руьгьди Яшай пайгъамбардин мецелди куь бубайриз хъсандиз лагьанай:

²⁶ «А халкьдин патав фена лагь: куьне япаралди яб гуда, амма куьн са куьнинни гъавурда гьатдач, куьн вилералди килигда, амма куь вилериз са затӀни аквадач.

²⁷ А халкьдин рикӀ буьркьуь хьанва. Абуру япар кӀевнава, вилер акьалнава. ИкӀ туширтӀа, абурун вилериз аквадай, япариз ван къведай, рикӀ гъавурда акьадай, абур Захъ элкъведай. Гьа чӀавуз за абур сагъар хъийидай».

^28-29 ГьакӀ хьайила, квез чир хьухь хьи, инсаният хилас хьуникай хабар Аллагьди маса халкьарал ракъурзава. Гьабуру ябни гуда.

³⁰ Римда кьунвай кӀвале Павел сагъ кьве йисуз амукьна. Ада вичин патав вуж атайтӀани кьабулдай.

³¹ Ада Аллагьдин Пачагьлугъдикай хабар гузвай, инсанриз Ребби Иса Месигьдикай чирвилер гуз, ам лап викӀегьдиз рахазвай, адан вилик пад садани кьазвачир.