Крар 27 - Пак Калам

Павел Римдиз рекье гьатун

¹ Чун Италдиз рекье твада лагьай къарар агакьайла, Павел ва къазаматнавай са бязибур Римдин пачагьдин кьушундин эфсер тир Юлидал тапшуругъ авуна.

² Чун Адрамитдай экъечӀзавай ва Асия вилаятдин къерехра авай бандарай физвай гимида акьахна. Гими рекье гьатна. Чахъ Саланикдай тир макӀеданви АристӀарх галай.

³ Пакагьан юкъуз чун Сидундив агакьна. Юли Павелав хъсандиз эгечӀзавай, гьавиляй ада Павелаз ял ягъун патал дустарин патав фидай ихтияр гана.

⁴ Чун анай мад гьуьлуьз экъечӀна, гар чиниз ягъуниз килигна, чун Куьпридин гар авачир кефер патай яна фена.

⁵ Киликатдилайни Памфилдилай алатна физ, чна ачух гьуьл атӀана, чун Луькиятда авай Муьра шегьердиз атана,

⁶ ана эфсердиз Искендерандай Италдиз физвай гими жагъана. Чун эфсерди гьада акьадарна.

⁷ Чи гими яваш-яваш вилик физ са гзаф йикъар хьана. Эхирни, чӀехи четинвилелди чун Киндасдилай алатна. Чиниз ягъизвай гару чаз гьа рехъ давамардай мумкинвал гузвачир, гьавиляй чи гими КиритӀдилай къекъуьн гана, адан гар авачир патай Салманадин пипӀ лугьудай чкадилай элячӀна фена.

⁸ Гьуьлуьн къерехдай яна, эхирни чун Ласейдивай яргъа авачир Хъсан Бандар лугьудай чкадиз са гужуналди акъатна.

⁹ Рекье чи гзаф вахт квахьна, гьуьлел тӀурфанар жедай бере алукьнавайвиляй гьуьлуьз экъечӀун хата тир. Гьавиляй Павела абуруз ихьтин меслят къалурна:

¹⁰ – Стхаяр, заз чун мад гьуьлуьз экъечӀун хата тирди аквазва. Са чи гимини чи парар ваъ, гьакӀ чи уьмуьрни хатадик ква.

¹¹ Эфсерди Павелаз яб ганач, ада гимидин иесидини гимичийрин кьилевайда лагьайвал авуна.

¹² Чи гими акъвазнавай банд кьуьд акъудун патал къулайди тушир, гьакӀ хьайила инсанрин чӀехи паюни рехъ давамарун кьетӀна. Абуру, ФуйникӀдиз агакьдай мумкинвал хьайитӀа, ана кьуьд акъудда лугьуз умудзавай. ФуйникӀ КиритӀдин рагъакӀидай пата авай. Ам кефердихъни кьибледихъ гимияр фин патал ачух банд тир.

Кьибле патан гар

¹³ Кьибле патай кьезил гар къарагъна. Гимичийриз а гару чпин рикӀик квай кар кьилиз акъудиз куьмекдай хьиз хьана. Абуру, лабар хкажна, КиритӀдин къерех кьуна гими гьална.

¹⁴ Са тӀимил вахт арадай фейила, КиритӀ галай патахъай къати гар акъатна, ахьтин гаруз «кефердинни рагъэкъечӀдай патан гар» лугьуда.

¹⁵ Гар гимидин хура гьатна, гимидивай гаруз дурум гуз хьанач. Чун гарун басрухдиз са кьадар вахтунда аксивал ийиз алахъна, затӀ арадал татайла, чна гими гарун ихтиярда туна.

¹⁶ Гьуьле авай Кавда лугьудай гъвечӀи къураматдин патавай фидайла, чаз са тӀимил вахтунда гарукай чуьнуьх жедай мумкинвал хьана. Ана гимичийри зурба азиятрик хиласай луьткве

¹⁷ гимидал хкажна. Ахпа гимичийри элкъвез-элкъвез гимидилай цӀилер чӀугуна, ам мягькемарна. Яд кьери СуьртӀа лугьудай чкадал алкӀиз кичӀела, абуру кьезил лабар вегьена, гими гарув тухуз туна.

¹⁸ Къати гар яргъалди давам хьуниз килигна, чун пакад юкъуз гимида авай пар гьуьлуьз гадаруниз мажбур хьана.

¹⁹ Мад са йикъалай гимичийри чпин гъилералди гимидин алатарни гьуьлуьз гадарна.

²⁰ Гзаф йикъара тӀурфан давам хьанай, я рагъ, я гъетер аквазмачир. Чун хилас хьуникай чи умудар атӀана.

²¹ Хейлин вахтунда инсанри са затӀни тӀуьнвачир. Павела къарагъна лагьана: – Стхаяр, за авур меслятдиз яб гана КиритӀдай куьн экъечӀначиртӀа, чун и баладикни акатдачир, я чаз зиянарни жедачир.

²² Амма исятда за квевай рикӀер кӀевиз кьун тӀалабзава, квекай садни рекьидач, анжах гими кукӀвар жеда.

²³ За Вичиз муьтӀуьгъ лукӀра хьиз къуллугъзавай Аллагьдин малаик сенфиз зи патав пайда хьана.

²⁴ «КичӀе жемир, Павел, – лагьана Ада заз. – Вун дуванханада Римдин пачагьдин вилик акъвазна кӀан жеда. Аллагьди ваз ийидай мергьемет себеб яз и гимида аваз вахъ галаз физвайбур вири сагъ яз амукьда».

²⁵ Гьавиляй викӀегь хьухь, стхаяр! Зун Аллагьди заз лагьайвал жедайдан чӀалахъ я.

²⁶ Къураматрикай садал чи гими яд кьери чкадал ацукьда.

²⁷ Им чун АдратӀик гьуьлелай физвай цӀукьуд лагьай йиф тир. Йифен кьулариз хьиз гимичийриз чун чилиз мукьва жезвай хьиз хьана.

²⁸ Абуру гьуьлуьн деринвал алцумайла, яхцӀурни цӀуд юкӀ кьван хьана. Са кьадар вахтунилай мад алцум хъувурла, къанни цӀуд юкӀ кьван хъхьана.

²⁹ Гимичийри чи гими къванерихъ галукьиз кичӀела адан кьулухъ патай кьуд лабар вегьена ва абуру югъ фад алукьрай лугьуз дуьаяр авуна.

³⁰ Гимичияр гимидай катизни алахъна, и кар кьилиз акъудун патал, абур гимидин вилик кьиляй лабар авадардай амалар ийиз, хиласдай луьткве цел авудиз алахъна.

³¹ Павела эфсердизни аскерриз лагьана: – И ксар гимида амукь тавуртӀа, куьн хилас хьун мумкин туш.

³² Инал аскерри луьткве кутӀуннавай цӀилер турунив яна атӀана, луьткве гьуьлуьз аватна.

³³ Экв жедайла Павел виридал фу неъ лугьуз алахъна. – Къе цӀукьуд югъ я куьне, са вуч ятӀани вилив хуьз, са затӀни тӀуьн тавуна, – лагьана ада.

³⁴ – Гьавиляй за квез са кӀус фу неъ лугьуз минетзава. Фу тӀуьртӀа, ада квез чан аламукьиз куьмекда. КичӀе жемир, куь кьилелай са чӀарни аватдач.

³⁵ ИкӀ лагьана, Павела фу къачуна, виридан вилик Аллагьдиз хийир-дуьа авуна, ам атӀана, нез эгечӀна.

³⁶ И карди вирибур кӀубанарна ва абурни нез эгечӀна.

³⁷ Гимида чун вири кьве вишни пудкъанни цӀуругуд кас авай.

³⁸ Инсанри тух жедалди тӀуьрдалай кьулухъ, гимида авай техил гьуьлуьз гадарна, гими кьезиларна.

³⁹ Экв хьайила, абуруз чеб гьиниз акъатнатӀа чизвачир, гимичийриз къумади кьунвай кьакьан тушир къерех авай гъвечӀи банд акуна. Чпелай алакьайтӀа, гимичийри гими кьери чкадал ацукьардай меслят авуна.

⁴⁰ Лабар, цӀилер атӀана, гьуьле туна, ахпа гимичийри гимидин кӀаник квай, гими тухузвай кьусуяр кутӀуннавай цӀилерни атӀана, кьусуйрив кӀвалахиз туна. Гару къерехдихъ тухудайвал гъвечӀи елкен хкажна.

⁴¹ Гьа икӀ, гими къерехдив агакьна, къумада гьатна акъваз хьана. КӀуф къумада акӀай гими юзазмачир. Адан кьулухъ пад къати лепейри кукӀвариз хьана.

⁴² Къазаматнавай са касдивайни катиз тежедайвал, аскерриз абур рекьиз кӀан хьана.

⁴³ Амма эфсердиз Павел хиласиз кӀанзавай, гьакӀ хьайила ада аскерар акъвазарна. Ада сирнавиз чидайбуруз, вирибурулайни вилик циз хкадарна, къерех галайвал сирнав авун эмирна.

⁴⁴ Амайбуруз тахтайрални гимидикай амукьай маса затӀарал алаз къерехдиз экъечӀ лагьана. Гьа икӀ вири сагъ-саламатдиз гьуьлуьн къерехдиз акъатна.