Крар 23 - Пак Калам

Меслягьатдин вилик

¹ КӀватӀ хьанвайбуруз вил яна, Павела лагьана: – Стхаяр, къенин йикъал къведалди за Аллагьдин вилик виждан михьи яз жуван уьмуьр тухвана.

² Инал Павелан патав акъвазнавайбуруз кьилин хахам Гьананиди адан сив кутуна ягъун эмирна.

³ Павела адаз лагьана: – Аллагьди вунни яда, лацу чепедай асуннавай цал! Вун инал Къанундин бинедаллаз зи дуван авун патал ацукьнавайди я, амма вуна зун ягъ лугьуналди Къанун чӀурзава.

⁴ Павелан патав акъвазнавайбуру лагьана: – Аллагьдин кьилин хахамдин хатурдик вуна вуч лагьана хкуьрзава?

⁵ – Стхаяр, заз ам кьилин хахам тирди чизвачир, – жаваб гана Павела. – Каламдани кхьенва эхир: «Ви халкьдин кьиле авайдакай чӀурукӀа рахамир».

⁶ КӀватӀ хьанвайбурукай садбур сакъаяр, муькуьбурни фарисеяр тирди Павелаз чизвай, гьакӀ хьайила ада ван алаз Меслягьатдин векилриз лагьана: – Стхаяр, зун фарисейдин хва фарисей я, зи дуванни кьейибурал чан хтуник умуд ква лугьуз ийизва.

⁷ Ада икӀ лугьунни кумаз, фарисейринни сакъайрин арада гьуьжет гьатна. Меслягьат кьве патал пай хьана,

⁸ вучиз лагьайтӀа, сакъайри мейитрал чан хтунар, малаикар, жинерар кваз кьазвачир. Амма фарисейри абур авай крар я лугьузвай.

⁹ ЧӀехи гьарай-эвер акъатна. Фарисейрин патай тавратдаррикай са бязибур къарагъна хци гьуьжетар ийиз эгечӀна: – И касдай чаз са пис карни аквазвач. Низ чида кьван, адахъ галаз Руьгь ва я малаик рахазвачтӀа?

¹⁰ Гьуьжет акьван къати хьана хьи, кьушундин кьилевайдаз абуру Павел кӀус-кӀус ийиз кичӀе хьана. Гьавиляй ада аскерриз аниз фена, ам ккӀизвайбурун юкьвай акъудна, къеледиз хутах лагьана эмир гана.

¹¹ Гуьгъуьнин йифиз Павелан патав акъвазна Реббиди лагьана: – ВикӀегь хьухь! Ярусалимда вуна Закай шагьидвал гьикӀ авунатӀа, Римдани вуна гьакӀ шагьидвал авун герек я.

Павелаз акси чӀуру къаст

¹² Пакагьан экуьнахъ са бязи чувудар чӀуру къаст авун патал кӀватӀ хьана. Павел яна текьенмаз гьич са затӀни я ненни ийидач, я хъванни лагьана абуру кьин кьуна.

¹³ Павелаз чӀуру къаст ийиз кӀанзавайбур яхцӀур касдилайни гзаф авай.

¹⁴ ЧӀехи хахамринни агъсакъалрин патав фена, абуру лагьана: – Чна, Павел яна кьин тавунмаз, сиве гьич са затӀни твадач лагьана кӀевелай кьин кьунва.

¹⁵ Гьа икӀ куьне ва Меслягьатди, квез Павелавай галай-галайвал силис кьаз кӀанзава лагьана, кьушундин кьилевайдав ам иниз гъиз тур. Чун гьазур хьана акъвазда. Ам аниз агакьунни кумаз, чна ам яна рекьида.

¹⁶ И чӀуру къастуникай Павелан вахан хциз хабар хьана. Адани къеледиз фена Павелаз хабар гана.

¹⁷ Павелани эфсеррикай садаз эверна лагьана: – И гада кьушундин кьилевайдан патав твах, и касдиз адахъ галаз ийидай ихтилатар ава.

¹⁸ Эфсерди гада тухвана кьушундин кьилевайдаз лагьана: – Къазаматнавай Павела заз эверна, и гада ви патав твах лагьана заз минетна. Адахъ ваз ийидай ихтилат ава.

¹⁹ Кьушундин кьилевайда гададин гъил кьуна са патахъ тухвана. Адахъ галаз кьилди амукьайла, адавай хабар кьуна: – Ваз вуч лугьуз кӀанзава?

²⁰ – Чувудри Павел пака Меслягьатдиз гъваш лугьун кьетӀна, – лагьана гадади. – И тӀалабун абуру гуя Павелавай галай-галайвал силис кьун патал ийизвайди я.

²¹ Амма вун абурун чӀалахъ жемир, яхцӀур касдилайни гзафбуру ам чинеба вилив хуьда. Абуру ам текьенмаз чпи я недач, я хъвадач лугьуз кьин кьунва. Вун рази жеда лугьуз, абур гьазур хьана акъвазнава.

²² Кьушундин кьилевайда гада ахъайна ва адаз эмирна: – Вуна заз и агьвалатдикай ихтилатайди гьич садазни лугьумир.

Павел Кесардиз ракъурун

²³ Кьушундин кьилевайда вичин эфсеррикай кьведаз эверна эмир гана: – Нянин кӀуьдаз кьве виш ях аскер, пудкъанни цӀуд миях ва кьве виш кас жидаяр гвай аскерар гьазура. Чна Павел Кесардиз тухуда.

²⁴ Павелаз улакь гьазура. Килиг гьа, Павел Римдин пачагьдин сердер Феликсан патав сагъ-саламатдиз агакьардайвал ая.

²⁵ Ада ихьтин чар кхьена:

²⁶ «Луьси Клавдасан патай жанаби сердер Феликсаз саламар.

²⁷ И кас чувудри кьунай, абур ам рекьиз гьазур хьанвай. Зун жуван аскерар галаз атана, ам Римдин ватанэгьли тирди чир хьайила, ам хиласна.

²⁸ Абуру адак гьихьтин тахсирар кутазватӀа чирун патал за ам абурун Меслягьатдиз тухванай.

²⁹ Зун гъавурда гьатайвал, абуру адак кутазвай тахсиркарвал чувудрин Къанундихъ галаз алакъада ава. Заз адакай я рекьидай хьтин, я къазаматда твадай хьтин тахсир жагъанач.

³⁰ И касдиз чӀуру къаст авун патал чувудри гаф-чӀал сад авунвайди заз малум хьайила, за ам тадиз ви патав ракъурна. Адак тахсир кутазвайбуруз за чпин делилар гьихьтинбур ятӀа ваз чир ая лагьанва».

³¹ Аскерар, чпиз эмир гайивал, Павелни къачуна йифиз АнтӀипатрисдиз атана.

³² Гуьгъуьнин юкъуз ам мияхрихъ галаз Кесардиз ракъурна, абур элкъвена къеледиз хтана.

³³ Мияхар Кесардиз атана агакьайла, абуру сердердив чар ва Павел вич вахкана.

³⁴ Гьакимди чар кӀелна, Павелавай вич гьи вилаятдай я лагьана хабар кьуна. Павел Киликатдай тирди чир хьайила,

³⁵ ада лагьана: – Вак тахсир кутузвайбурни иниз атайтӀа, гьа чӀавуз за ви кардиз яб гуда. Гьакимди Павел Гьирудан дараматда къаравулар алаз хуьх лагьана эмир гана.