Крар 21 - Пак КаламЯрусалимдиз сиягьат 1 Абурухъ галаз чара хъхьана, чун гьуьлуьз экъечӀна ва дуьм-дуьз Кус атӀадал фена. Пакагьан юкъуз чун Радасдиз агакьна. Гьанайни ПатӀарадиз фена. 2 Ана Финикидиз физвай гими жагъурна, гьада аваз рехъ давамарна. 3 Куьпри аквадайвал кьибле патай яна Суьриядиз фена. Туьрс шегьерда чи гими акъвазарна, адай парар авудна. 4 Ина чна Исадин тилмизар жагъурна, абурухъ галаз ирид югъ акъудна. Са бязибуру, Руьгьди эсердик кутунваз, Павелаз Ярусалимдиз фимир лугьуз минетна. 5 Вахт атана агакьайла, чун чи рекьиз физ гьазур хьана. Вири иманияр, абурун папарни аялар чун рекье тваз шегьердай гьуьлуьн къерехдал кьван экъечӀна. Ана чна метӀер чилиз яна дуьаяр авуна. 6 Чун, сада садаз сагърай лагьана, гимидиз акьахна. Абурни чпин кӀвалериз хъфена. 7 Гимида аваз рехъ давамарна, чун Туьрс шегьердай Питалмасдиз атана. Гьана стхайрал-вахарал кьил чӀугуна, абурухъ галаз са югъ акъудна. 8 Гуьгъуьнин юкъуз анай Кесардиз рекье гьатна. Ина Шад Хабар чукӀурзавай ФилипӀан кӀвале акъвазна. Ам Ярусалимдин иманийрин кӀватӀалди тайинарнавай ирид шемасдикай сад тир. 9 Адахъ гъуьлуьз тефенвай кьуд руш авай, абурувай пайгъамбарвал ийиз жедай. 10 Чун ина аваз са шумуд югъ алатайла, иниз Ягьудатдай пайгъамбар Агъаб акъатна. 11 Ам чи патав атана, ада Павелан чӀул къачуна вичин гъилер, кӀвачер кутӀунна ва лагьана: – Пак Руьгьди лугьузва хьи, Ярусалимда и чӀулунин агъа чувудри гьа икӀ кутӀунна римвийрин гъиле твада. 12 И гафар чаз ван хьайила, чна ва чкадинбуру Павелаз Ярусалимдиз фимир лугьуз минет ийиз хьана. 13 Амма Павела жаваб яз лагьана: – Шелар ийиз куьне зи рикӀ вучиз падзава? Зун неинки къазаматда ацукьиз, гьакӀ Ребби Исадин хатурдай Ярусалимда чанни гуз гьазур я. 14 Ам чӀалал гъиз тахьайла, чун секин хьана. – Къуй Аллагьдиз кӀандайвал хьурай, – лагьана чна. 15 Са шумуд йикъалай чун рекье гьатиз гьазур хьана ва Ярусалимдиз фена. 16 Чахъ галаз Кесардай са бязи тилмизарни атана. Абуру чун Минасунан кӀвализ гъана, чун гьана амукьна. Куьпридай тир Минасун лап фадлай Исадин тилмиз тир. Якьубан меслят 17 Ярусалимда иманийри чун хушвилелди кьабулна. 18 Пакагьан юкъуз Павел чахъ галаз Якьубан патав фена. Ана иманийрин чӀехибур вири кӀватӀ хьанвай. 19 Салам гайидалай кьулухъ, Павела вичив маса халкьарин арада Аллагьди ийиз тур крарикай галай-галайвал ихтилатна. 20 Адаз яб гайибуру Аллагьдиз шукурар авуна. Ахпа абуру Павелаз лагьана: – Гила ваз, стха, имандал атанвай чувудар шумуд агъзур кас аватӀа чидани? Абуру вирида гьакъисагъвилелди Къанундал амалзава. 21 Вуна, маса халкьарин арада уьмуьр тухузвай вири чувудриз Мусадин Къанундикай къерех хьухь, аялар мад суьннет хъийимир ва чи къайдаяр кьуна ацукьмир лугьузвай ванер абуруз атанва. 22 Чна вуч авун лазим я? Абуруз, гьелбетда, вун атанвайдакай хабар жеда. 23 ГьакӀ хьайила чна гудай меслятдиз яб це. Чи арада Аллагьдин вилик вяд авур кьуд кас ава. 24 Гьабурни галаз фена адет тирвал михьивилер ая, абуру гана кӀандай пулни вуна це, гьа и чӀавуз абурувай Аллагьдин вилик авур вяд куьтягь хьунин лишан яз кьилерни тваз жеда. Гьа икӀ авуртӀа, вуна Къанундихъ галаз кьадайвал уьмуьр тухузвайди виридаз аквада. Вакай чукӀурнавай хабарар тапанбур тирди виридаз малум жеда. 25 Маса халкьарикай яз имандал атанвайбуруз, лагьайтӀа, чна абуру кьилиз акъудна кӀанзавай ихьтин къайдаяр авай чар кхьенай: бутриз къурбанднавай тӀуьн, дуьз тукӀун тавунвай гьайвандин як, иви кумай як немир, явавиликай яргъаз хьухь. 26 Пакагьан юкъуз а ксарихъ галаз фена, Павела абурухъ галаз санал михьивилер авуна. Ахпа ада, Аллагьдин КӀвализ гьахьна, чпин михьивилерин вахт куьтягь жедай югъ хахамриз малумарна. И юкъуз Павелани адахъ галай кьуд касди къурбандар авун лазим тир. Павел кьун 27 Михьивилер авуна ирид югъ алатзавайла, Павел Аллагьдин КӀвале аваз акур Асия вилаятдай тир са шумуд чувудди футфа кутуна халкьдив Павел кьаз туна 28 ва гьарайиз эгечӀна: – Исраилвияр! Чи куьмекдиз ша! Виринра чи халкьдиз, чи Къанундиз ва и Чкадиз акси гафар лугьуз виридаз чирвилер гузвай кас гьа им я. Ада Аллагьдин КӀвализ чувудар туширбурни кваз гъанва, гьадалди ада и пак Чка чиркин авунва. 29 Виликдай абуруз Павелахъ галаз шегьерда Эфесдай тир Тирафим акунай, гьакӀ хьайила абуру ам Павела вичихъ галаз Аллагьдин КӀвализ гъанва лагьана фикирнай. 30 Вири шегьерда гъулгъула гьатна. Кьуд патахъай къвез инсанар кӀватӀ жезвай. Павел кьуна, Аллагьдин КӀваляй галчӀурна акъудна. Гьанин варарни гьасятда кӀевна. 31 Абуруз ам рекьидай ният авай чӀавуз вири Ярусалимда гъулгъула гьатнавайдакай шегьерда авай Римдин кьушундин кьилевайдаз хабар гана. 32 Ам, тадиз са шумуд эфсерни аскер галаз халкьдин арадиз гьахьна. Абур акурла, къал къачунвайбуру Павелаз кьазвай гатунар акъвазарна. 33 Кьушундин кьилевайда Павел кьуна ам кьве зунжурда тун эмирна. Эфсерди халкьдивай гатазвай кас вуж я, ада вуч авуна лагьана хабар кьуна. 34 Халкьдин арадай садбуру са гафар, муькуьбуру маса гафар гьарайзавай. Гъулгъуладин гъиляй адаз са тайин жаваб жагъун тавурла, ада Павел къеледиз тухун эмирна. 35 Абур къеледин гурарив агакьайла, халкь акӀ туьнт хьана хьи, аскерар Павел гъилерал алаз тухуниз мажбур хьана. 36 Халкьди абурун гуьгъуьниз физ-физ: – Ам яна йикь! – лугьуз гьарайзавай. 37 Аскерри Павел къеледин къенез тухузвайла, ада кьушундин кьилевайдаз лагьана: – Жечни квевай са кар тӀалабайтӀа? – Яъ, вун юнан чӀалал рахазвани?! – жаваб яз хабар кьуна кьушундин кьилевайда. – 38 АкӀ ятӀа, вун и мукьвара къалар акъудна, кьурумдиз кьуд агъзур къачагъ галаз катай мисриви туш ман? 39 – Зун чувуд я, – жаваб гана Павела, – Киликатда авай ТӀарас лугьудай тӀвар-ван авай шегьердин эгьли я. За тавакъу ийида, заз халкьдихъ элкъвена рахадай ихтияр це. 40 Кьушундин кьилевайда ихтияр гайила, Павела гурарал акъвазна халкьдиз гъилелди ишара авуна. Халкь кисайла, ам чувуд чӀалал рахаз эгечӀна. |
© Институт перевода Библии, 2010-2024
Institute for Bible Translation, Russia