Крар 2 - Пак Калам

Пак Руьгь атун

¹ ЯхцӀурни цӀуд лагьай йикъан суварин югъ алукьна. Вири са чкада кӀватӀ хьана.

² Садлагьана цавай атай тӀурфандин хьтин кӀеви ванци абур авай кӀвал ацӀурна.

³ Виридаз зулар-зулар жезвай ялаврин мецериз ухшар са вуч ятӀани атана чпел гьар садал акъвазайди акуна.

⁴ Вирибур Пак Руьгьдив ацӀана ва чара-чара халкьарин чӀаларал рахаз эгечӀна: Пак Руьгьди абуруз гьа ихьтин алакьунар ганай.

⁵ И чӀавуз Ярусалимда жуьреба-жуьре уьлквейрай тир ва рикӀел Аллагь алай чувудри уьмуьр тухузвай.

⁶ Акъатай гьарай-эвердал гзаф халкь кӀватӀ хьана. Иманияр рахадайла, анал кӀватӀ хьанвайбуруз гьар садаз вичин дидед чӀалалди рахадай ван хьана, абур теспача хьана.

⁷ Гзаф мягьтел хьайи инсанри сада садавай хабар кьуна: – И инсанар вири Галилейдай тушни?

⁸ Чаз гьардаз абур чи дидед чӀалал рахадай ван къвезва. Им гьикӀ жезвай кар я?

⁹ Чи арада гьар жуьре уьлквейрай инсанар – партивияр, мидявияр, эламвияр, Месапатамдин, Ягьудатдин, Кападукдин, ПӀунтӀасдин ва Асия вилаятдин,

¹⁰ Фиригъдин, Памфилдин, Мисридин агьалияр, Ливиятдин, Киринейдин патарив гвай агьалияр, Римдай атанвайбур,

¹¹ чувудар ва чувудрин дин кьабулнавай масабур, киритӀвиярни арабар ава. Чаз гьар садаз и инсанар Аллагьдин зурба крарикай чи чӀаларал гьикӀ рахазватӀа ван къвезва!

¹² Пагь атӀана, вуч лугьудатӀа течиз амукьай абуру сада садавай хабар кьазвай: – Им вуч лагьай чӀал я?

¹³ Са бязибуру хъуьруьнар ийизвай: – Абур чехир гзаф хъвана, луьхъ хьанва.

Петрудин рахунар

¹⁴ Петруди, амай цӀусад илчидихъ галаз санал акъвазна, халкьдихъ элкъвена, виридаз ван къведайвал лагьана: – Ягьудатдин итимар ва Ярусалимдин вири агьалияр! Захъ хъсандиз яб акала! Квез чир хьухь хьи,

¹⁵ и инсанар хъвана сархуш туш, гьеле сятдин экуьнин кӀуьд я.

¹⁶ Им Яил пайгъамбарди лагьай гафар кьилиз акъатун я:

¹⁷ «Эхиримжи йикъара, – лугьузва Аллагьди, – За Жуван Руьгь вири инсанрик кутада. Куь рухваярни рушар Зи мецелди рахаз жеда, жегьилриз керематар, кьуьзуьбуруз ахварар аквада.

¹⁸ Зи лукӀар тир итимрикни папарик гьа йикъара За Зи Руьгь кутада, абурни Зи мецелди рахаз жеда.

¹⁹ Винида цавал За аламатар къалурда, агъада чилерални – керематар-ишараяр: иви, цӀай ва гумадин кӀватӀар.

²⁰ Реббидин чӀехи ва баркалладин югъ алукьдалди виликамаз Рагъ хкахьна мичӀи жеда, варз, иви хьиз, яру жеда.

²¹ Реббидин ТӀвар кьуна эверай гьар сад хилас жеда» .

²² Исраилвияр, за лугьузвай гафариз яб це! Назаретдай тир Иса – Аллагьди тестикьарнава. ИкӀ тирди Аллагьди Адав ийиз тур аламатрай ва керемат-ишарайрай, Адав къалуриз тур лишанрай аквазва. Квез и крар куь вилералди акуна, хъсандиз чизва.

²³ Аллагьди виликамаз кьетӀнавайвал, Иса куь гъиле туна. Куьне римвийрин куьмекдалди Иса хашуниз яна кьена.

²⁴ Амма Аллагьди Адал чан хкана, Ам ажалдин еперай акъудна. Ажалдихъни Иса кьуна акъвазариз жедай къуват авайди тушир.

²⁵ Давуд пачагьди Адакай икӀ лагьанай: «Заз Ребби датӀана зи вилик кваз аквадай. Жув кьве рикӀин тахьун патал Ам зи эрчӀи гъилихъай гала.

²⁶ Гьавиляй зи рикӀ хвешивиливди, Зи мезни шад гафаривди ацӀанва. Зун фана ятӀани, захъ умуд ава,

²⁷ я Ребби, Вуна зун агъа дуьньяда тадач, Жуван муъмин кас тадач сура члафиз!

²⁸ Вуна заз уьмуьрдиз тухузвай рехъ къалурна. Вун патав гвайла, Зи рикӀ шадвилив ацӀуда» .

²⁹ Стхаяр, завай квез ачухиз жеда хьи, чи буба Давудни вири инсанар хьиз кьена. Ам кучукни авунай. Адан кьветӀ чахъ гилани ама.

³⁰ Адан эвледрикай тир са касдикай, Давуд хьиз, пачагь жеда лагьана Аллагьди кьин кьунай. Давудаз и кар чизвай. Ам пайгъамбар тир эхир.

³¹ Гьавиляй, «Ам агъа дуьньяда тадач» ва «Жуван муъмин кас тадач сура члафиз» лугьудайлани, адаз Месигьдал кьейидалай кьулухъ чан хкведайди виликамаз чизвай.

³² Аллагьди и Исадал чан хкана, чун вири и кардин шагьидар я!

³³ Аллагьди Иса хкажна Вичин эрчӀи гъилихъай ацукьарна. Хиве кьур Пак Руьгь Вичин Бубадин патай къачур Исади а Руьгь чакни кутуна. Квез аквазвайди ва ван къвезвайди гьа вакъиадин нетижа я.

^34-35 Давуд пачагь, лагьайтӀа, цаварал хкаж хьайиди туш, ятӀани ада лагьана: «Реббиди зи Агъадиз лагьана: „Ви душманар За Ви кӀвачерик вегьидалди Зи эрчӀи гъилихъай ацукь“» .

³⁶ Къуй Исраилдин вири инсанриз кӀевелай чир хьурай хьи, куьне хашуниз ягъай и Исадикай Аллагьди Реббини, Месигьни авуна!

³⁷ И гафарин ван хьайила, ийир-тийир квахьай инсанри Петрудивайни муькуь илчийривай хабар кьаз хьана: – Я стхаяр, чна вуч авун лазим я?

³⁸ – Куьн гьар са кас Аллагьдин рекьел атун лазим я, – жаваб гана Петруди. – Ахпани куьне, куь гунагьрилай гъил къахчун патал, Иса Месигьдин ТӀварцӀелай цик акахьун къачу. Гьа чӀавуз квез Аллагьди Пак Руьгь пай яз гуда.

³⁹ Аллагьди и кар квез, куь аялриз ва яргъара авайбуруз, Ада Вичин патав эверзавай кьван вирибуруз хивени кьуна.

⁴⁰ Петруди гьакӀни гзаф маса гафаралди абуруз несигьатар гана: – Рекьяй акъатнавай и несилдин арада куьне куьн хилас ийиз тур.

⁴¹ Адан гафар кьабулай ва имандал атай инсанри цик акахьун къачуна. Гьа юкъуз Исадихъ иман ийизвайбурун кьадар пуд агъзур кас кьван артух хьана.

Иманийрин уьмуьр

⁴² Иманийри вири вахт санал акъудзавай: санал илчийрин чирвилериз яб гузвай, санал фуни атӀузвай, санал дуьаярни ийизвай.

⁴³ Илчийри къалурзавай кьван гзаф аламатар ва керемат-ишараяр акурла, инсанрин рикӀера кичӀевал гьатзавай.

⁴⁴ Вири иманияр санал алай, абурухъ авай-авачирдини уртах тир.

⁴⁵ Абуру чпин мал-мулк, эменни маса гуз, хьайи пул чпин арада гьар садаз герек тир кьван пайзавай.

⁴⁶ Абур гьар юкъуз садвилелди Аллагьдин КӀвале кӀватӀ жезвай. Абуру нубатдалди кӀвалера вирида санал фу атӀузвай, шадвилелди ва михьи рикӀелди фу незвай,

⁴⁷ Аллагьдиз шукурар ийизвай. Вири халкьди абуруз гьуьрметзавай, Аллагьдини гунагьрикай хиласзавайбурун кьадар югъ-къандавай артухарзавай.