Крар 17 - Пак Калам

Саланикда халкь къарагъун

¹ Павелни адахъ галайбур Амфипулдайни АпӀалиндай яна Саланикдиз атана. Ана чувудрин синагуг авай.

^2-3 Вичиз адет хьанвайвал, пуд Киш юкъуз Павел синагугдиз фена. Ина ада чувудар Каламдин гъавурда твазвай. Каламдикай бине кьуна, Павела Месигьди азиятар чӀугун ва ахпа Адал кьейидалай кьулухъ чан хтун лазим тирди субутарзавай. – Зун Вичикай рахазвай Иса гьа Месигь я, – лугьузвай Павела.

⁴ Адаз яб гайибурукай бязи чувудри, Аллагьдиз ибадат ийизвай гзаф кьадар масабуру ва вилик-кьилик квай гзаф папари Исадихъ иман авуна. Абур Павеланни Силаван патаз атана.

⁵ Чувудри адал пехилвал ийизвай. Санал кӀватӀ хьана, абуру майдандилай гьинавай виже текъведай ксар жагъурна. Абуруни халкь кӀватӀна шегьерда гъулгъула туна. КӀватӀ хьайибур, Павелни Силав халкьдин вилик акъудиз кӀанз, абур жагъуриз Ясунан кӀвал галай патахъ фена.

⁶ Анай Павелни Силав жагъун тавурла, абуру шегьердин гьукумдаррин патав Ясун ва имандаллай амай стхайрикай са кьадарбур гъана. Халкьди гьарайзавай: – Фадлай дуьньяда гъулгъула тунвай инсанар гила инизни атанва.

⁷ Ясуна абур вичин кӀвале кьабулна. Абуру вири санал Римдин пачагьдин эмирар чӀурзава ва Иса тӀвар алай маса пачагь ава лугьузва.

⁸ И гафарин ван галукьай шегьердин гьакимрикни халкьдик къалабулух акатна.

⁹ Абуру, Ясунавайни адахъ галайбурувай дувандиз хтун патал залукдин пул къачуна, абур ахъайна.

Илчияр Берида

¹⁰ Иманийри йифиз тадиз Павелни Силав Беридиз рекье туна. Беридиз агакьайла, абур чувудрин синагугдиз фена.

¹¹ Беривияр саланиквийрилай рикӀ ахъа инсанар тир. Абуру Аллагьдин Гаф чӀехи гьевесдалди кьабулна. Павелан гафар дуьзбур яни-тушни чирун патал, абуру гьар юкъуз Каламни мукьуфдивди кӀелзавай.

¹² Гзаф кьадар чувудар ва гьакӀни вилик-кьилик квай хейлин маса папарни итимар имандал атана.

¹³ Амма Павела Аллагьдин Гафуникай Берида суьгьбетзава лагьана ван хьайила, Саланикда авай чувудар гьа инизни атана акъатна. Абуру футфа кутаз, халкь Павелазни Силаваз акси акъвазариз хьана.

¹⁴ Иманийри Павел тадиз гьуьл галайвал ракъурна, Силавни ТӀиматӀей Берида амукьна.

¹⁵ Павел рекье твазвайбур адахъ галаз Афинайриз кьван атана, ахпа абур Силавазни ТӀиматӀеяз жезмай кьван фаддаказ вичин патав хъша лугьузвай Павелан тагьким гваз элкъвена хъфена.

Павел Афинайра

¹⁶ Павел Афинайра вичин юлдашрал вил алаз акъвазнавайла, и шегьерда авай кьван бутар акваз, ам перт жезвай.

¹⁷ Гьавиляй синагугда ада чувудрихъни Аллагьдиз ибадат ийизвай муькуьбурухъ галаз суьгьбетарзавай. Идалайни гъейри шегьердин майдандал вичел гьалтайбурухъ галаз ада гьар юкъуз ихтилатар ийидай.

¹⁸ Садра адахъ галаз астаикӀри ва Эпикуран терефдарар тир са шумуд филасафди гьуьжетар ийиз хьана. Садбуру хабар кьазвай: – И лагълагъзавайдаз вуч лугьуз кӀанзава? Масадбуру лугьузвай: – Аквазвайвал, ада яд уьлквейрин аллагьрикай ихтилатзава. Абуру акӀ Павела Исадикай ва кьейидалай кьулухъ адал чан хтуникай рахазвайвиляй лугьузвай.

¹⁹ Павел АрпӀаг тӀвар алай кӀунтӀунал кӀватӀ жедай межлисдиз гъана, кьилевайбуру адавай хабар кьуна: – Вуна лугьузвай цӀийи чирвал вуч ятӀа чазни чирайтӀа жедачни?

²⁰ Вун къариб затӀарикай рахазва, абур вуч гафар ятӀа чаз чир хьана кӀанзава.

²¹ (Афинайрин агьалийризни ана уьмуьр тухузвай чара уьлквейрай тир инсанриз чпин вахт цӀийи хабарар ахъайиз ва абуруз яб гуз акъудунилай хъсан маса машгъулат авачир.)

²² КӀватӀ хьанвайбурун вилик Павела къарагъна лагьана: – Афинайрин агьалияр! Гьи патай килигайтӀани, заз куьне аллагьриз гьуьрметзавайвал аквазва.

²³ Куь шегьерда къекъвез-къекъвез аллагьриз икрамдай чкайриз фейила, заз гьатта «ЧАЗ ТЕЧИДАЙ АЛЛАГЬДИЗ» лугьудай гафар кхьенвай къурбанганни акуна. Гьа и квез течиз куьне икрамзавай Аллагьдикай за квез суьгьбетда.

²⁴ Дуьнья ва ана авай кьван затӀар халкь авур Аллагьди, цаваринни чилин Реббиди, инсанрин гъилералди эцигнавай ибадатханайра уьмуьр тухузвач.

²⁵ Адаз инсанри чпин гъилералди Вичиз къуллугъ авун герек туш. Акси яз, инсанриз уьмуьр, нефес ва амай вири затӀар Ада Вичи гузва.

²⁶ Ада са инсандикай вири чилел жедай инсаният халкьна. Вири халкьариз Ада уьмуьр тухудай вахтни чка тайинарна.

²⁷ Аллагьди инсанривай Вичихъ къекъвез жедайвал, Вичин патав къвез жедайвал ва Вич жагъуриз жедайвал авуна. Ам чавай гьар садавайни яргъа туш эхир.

²⁸ Вучиз лагьайтӀа Гьада аваз чна уьмуьр тухузва, чун гьерекатдани ава, дуьньядални ала. Куь са бязи шаиррини гьа икӀ лагьанай: «Чун Гьадан несил я».

²⁹ Чун Аллагьдин тухумдикай яз хьайила, чна Аллагь къизилдикайни гимишдикай ва я къванцикай инсанрин фикиррини амалди арадал гъанвай суьрет хьтинди я лагьана фикирна кӀандач.

³⁰ Алатай вахтара са куьникайни хабар авачир инсанриз Аллагьди жаза гудачир, гила, лагьайтӀа, Ада вирина вири инсанриз Вичин рекьел ша лугьузва.

³¹ Вучиз лагьайтӀа Аллагьди адалат гваз дуьньядин дуван ийидай югъ тайинарнава. А дуван ни ийидатӀа, гьа Касни къалурнава. А Касдал кьейидалай кьулухъ чан хкуналди, Аллагьди вири инсанриз Вичи тайинарнавайди Гьам тирди субутна.

³² Инал алайбуруз кьейидалай кьулухъ чан хтана лугьудай гафарин ван атайла, абурукай са бязибуру ягьанатдин хъверна, муькуьбуру лагьана: – Чаз мад гъилера ви и ихтилатдиз яб хгуз кӀанзава.

³³ КӀватӀ хьанвайбур гьанал туна Павел хъфена.

³⁴ Амма са бязибуру Павелан гафарихъ иман авуна. Абур адан патав атана. Абурун арада АрпӀагдин векил Дуьаниси, Дамар лугьудай са паб ва масабур авай.