Крар 14 - Пак Калам

Кани шегьерда

¹ Кани шегьерда Павелни Барнаба чпиз адет хьанвайвал синагугдиз фена. Ана абуру Исадикай суьгьбетар авуна. Гзаф кьадар чувудрини муькуьбурукай тирбуру Исадихъ иман авуна.

² Амма Исадихъ иман ийиз кӀанзавачир чувудри маса халкьарикай тирбурун арада футфа туна, абур иманийриз акси акъвазарна.

³ ЯтӀани Павелни Барнаба ана гзаф вахтунда амукьна. Абуру Реббидикай викӀегьвилелди вязер ийизвай. Реббиди, лагьайтӀа, абурув аламатар ва керемат-ишараяр къалуриз тунай. Гьа идалди Аллагьди Вичин берекатдикай абуру лугьузвай гафар тестикьарзавай.

⁴ Шегьерэгьлияр кьве пай хьана. Садбуру чувудрин, муькуьбуруни илчийрин пад кьуна.

⁵ Чувудрини маса халкьарикай тирбуру чпин кьилевайбурни галаз илчийриз кар кьун патал, абуруз къван гуда лагьана, гаф-чӀал сад авуна.

⁶ Амма илчийриз абурун къастуникай хабар хьана. Абур ЛуькӀанат уьлкведа авай ЛуьстӀра ва Дербе лугьудай шегьерризни абурун патарив гвай чкайриз катна.

⁷ Ана абуру Исадин гьакъиндай Шад Хабар гузвай.

ЛуьстӀрада ва Дербеда

⁸ ЛуьстӀрада кӀвачер кӀакӀанвай са кас авай. Ам хайи чӀавалай набут тир, адавай уьмуьрда гьич къекъвез хьайиди тушир.

⁹ Павела ихтилат ийизвайла, а касди адаз яб гузвай. Павелаз акуна хьи, и набут касдихъ вич сагъ хъийидайвилин иман ава.

¹⁰ – Къарагъ, кӀвачел акъваз! – ван алаз лагьана ада набут касдиз. Амни къудгъунна къарагъна къекъвез эгечӀна.

¹¹ Павела авур аламат акур инсанри ЛуькӀанатдин чӀалал гьарайиз хьана: – Чи патав инсанрин кӀалубда аваз аллагьар атанва!

¹² Барнабадиз абуру Зевс лагьана тӀвар гана, Павелазни – Гьермес, вучиз лагьайтӀа, рахунрин кьенерар Павелан гъиле авай.

¹³ Шегьердин къерехда Зевсан ибадатхана авай. Ана къуллугъзавай касди, халкьдихъ галаз Павелазни Барнабадиз къурбанд авун патал, жунгаварни цуькверин кӀунчӀар шегьердин варарив гъана.

¹⁴ Барнабадизни Павелаз и кардикай хабар хьайила, абуру, чпел алай пекер кукӀварна, халкьдин арадиз гьахьна, гьараяр авуна:

¹⁵ – Акъваз, я стхаяр, куьне вуч ийизва? Чунни куьн хьтинбур я! Чна квез чан алай Аллагьдикай Шад Хабар гъанва. Бутар гадарна, чан алай Аллагьдиз килиг! Чилни цав, гьуьлер ва анра авай кьван затӀар халкь авурди Гьам я.

¹⁶ Къадим вахтара Ада гьар са халкьдиз вичиз кӀандайвал уьмуьр тухудай ихтияр ганайтӀани,

¹⁷ Вичи ийизвай мергьеметдин краралди Ада Вичикай вахт-вахтунда хабарни гузвай. Ада цавай квез марф ва бегьер ракъурзавай, квез недай суьрсет гузвай ва куь рикӀерни шадвилив ацӀурзавай.

¹⁸ И гафар лагьанатӀани, абуру чпиз къурбандар гъиз кӀанзавай халкь гужа-гуж акъвазарна.

¹⁹ Гьа иниз АнтӀиах ва Кани шегьеррай чувудар атана, абуру инсанар чпин патаз гъана ва Павелаз къван гуз эгечӀна. Абуруз ам кьейиди хьиз хьайила, абуру галчӀурна тухвана ам шегьердин къерехдиз гадарна.

²⁰ Тилмизар атана адал алтӀушна. Павел къарагъна шегьердиз хъфена. Пакагьан юкъуз ам Барнабадихъ галаз Дербедиз рекье гьатна.

Суьриядин АнтӀиахдиз хтун

²¹ И шегьерда Шад Хабар чукӀурна, гзаф инсанар имандал гъайидалай кьулухъ абур элкъвена ЛуьстӀра шегьердиз, анай Канидиз ва АнтӀиахдиз хтана.

²² Хьайи чкайра абуру тилмизрин руьгь мягькемарзавай ва абуруз Аллагьдихъ иман ийиз амукьунихъ эверзавай. Абуру гьакӀ Аллагьдин Пачагьлугъдиз акъатун патал чна гзаф азиятарни чӀугуна кӀанда лугьузвай.

²³ Павелани Барнабади иманийрин гьар са кӀватӀалдин кьиле жедайбур тайинарна. Дуьаярни авуна, сивни хвейи абуру иманийрин кӀватӀалар чпи Вичихъ иман ийизвай Аллагьдал аманат авуна.

²⁴ Илчияр Писидатдай яна Памфилдиз атана,

²⁵ Пергида Аллагьдин Гафуникай хабар гайидалай кьулухъ абур Аталидиз фена.

²⁶ Исятда тамамарнавай кӀвалахар кьилиз акъудун патал чеб Аллагьдин берекатдал аманатна, абур са мус ятӀани АнтӀиахдай экъечӀнай. Гила абур гимида аваз элкъвена гьа АнтӀиахдиз хъфена.

²⁷ Иниз хтана, иманийрин кӀватӀалда авайбур кӀватӀна, Павелани Барнабади, чпин куьмекдалди Аллагьди авур кӀвалахрикай рахаз-рахаз, чпи чувудрикай туширбуруз имандин рак гьикӀ ахъайнатӀа ихтилат авуна.

²⁸ Тилмизарни галаз абур ана гзаф вахтунда амукьна.