Крар 10 - Пак Калам

Петруни Карнел

¹ Кесар шегьерда Карнел лугьудай са кас авай. Ам Римдин аскеррик квай Италдин кьушун тӀвар алай дестедин эфсер тир.

² Ам ва адан вири хизан Аллагьдиз икрамзавай ва Аллагьдихъай кичӀезвай инсанар тир. Ада дарвиле авайбуруз гъил ахъавилелди куьмекар гудай. Ада Аллагьдиз датӀана дуьаяр ийидай.

³ Садра, нисинилай кьулухъ сятдин пудриз хьиз, Карнелаз керемат акуна. Адаз акваз-акваз малаик атана. Малаикди лагьана: – Карнел!

⁴ Карнел адаз кичӀевал кваз килигна. – Вуч хьана, я агъа? – лагьана ада. – Вуна ийизвай дуьаярни кесибриз гузвай куьмекар Аллагьдиз аквазва, – лагьана малаикди.

⁵ – Гила Яфадиз инсанар ракъура, абуру са гьи ятӀани Симун-Петру лугьудай касдиз иниз ша лугьурай.

⁶ Ам табагъар ийидай Симунан мугьман я. Симунан кӀвал гьуьлуьн патав гва.

⁷ Карнелахъ галаз рахай малаик хъфейла, ада вичин кьве вач-хъшадиз ва вичин кьилдин тапшуругъар кьилиз акъудзавай аскеррикай Аллагь рикӀеллай садаз эверна.

⁸ Хьайи кардикай вири абуруз ахъаяйдалай гуьгъуьниз ада абур Яфадиз ракъурна.

⁹ Пакагьан юкъуз, Карнела ракъурнавайбур шегьердив агакьзавай вахтунда, Петру дуьа ийиз кӀвалин къавал акьахнавай.

¹⁰ Адаз гишин хьанвай ва фу нез кӀанзавай. ТӀуьн гьазур жедалди Петрудиз ахварал алайдаз хьиз керемат акуна:

¹¹ ахъа хьайи цавай кьуд пӀипӀ са ни ятӀани кьунвай хьтин зурба суфрадиз ухшар са затӀ агъуз эвичӀна.

¹² Адал гьар жуьредин гьайванар, чурчулар ва къушар алай.

¹³ Ахпа адаз цавай къвезвай ванци лагьана: – Къарагъ, Петру! И гьайванар тукӀуна неъ.

¹⁴ – Гьич са чӀавузни, я Ребби! – лагьана жаваб гана Петруди – зи уьмуьрда за чиркин ва я гьарам затӀ тӀуьрди туш.

¹⁵ Ванци адаз кьвед лагьай гъилера хълагьна: – Аллагьди гьалал авунвай затӀуниз чиркинди лугьумир.

¹⁶ Гьа икӀ пудра давам хьана, ахпа суфра мад цавуз хкаж хъхьана.

¹⁷ Петру им вуч керемат ятӀа лугьуз фикирдик квай арада Карнела ракъурнавай инсанар, Симунан кӀвал жагъурна, адан варарив акъвазнавай.

¹⁸ Абуру Симун-Петру ина авани лугьуз, кӀевиз хабар кьазвай.

¹⁹ Акур керематдикай хиялар ийизмай Петрудиз Руьгьди лагьана: – Симун, вахъ пуд кас къекъвезва.

²⁰ Къарагъ, кӀаник эвичӀ. Са шакни тавуна абурухъ галаз алад, абур За ракъурнавайбур я.

²¹ КӀаник эвичӀна, Петруди а ксариз лагьана: – Куьн къекъвезвай инсан ингье зун я. Квез завай вуч кӀанзава?

²² – Чун эфсер Карнела ракъурнавайбур я, – жаваб гана абуру. – Ам гьахъ-михьи ва Аллагьдихъай кичӀезвай инсан я. Ам вири Ягьудатдин халкьдин арада гьуьрмет авай кас я. Пак малаикди Карнелаз ваз вичин патав эвера лагьана ва ви ихтилатриз яб гун эмирнава.

²³ Петруди кӀвализ ша лагьана абур илифарна. Пакагьан юкъуз Петру ва адахъ галаз Яфадай тир имандал алай са шумуд стха мугьманрихъ галаз рекье гьатна.

²⁴ Са йикъалай абур Кесар шегьердиз атана акъатна. Карнела вичин мукьва-кьилияр, ярар-дустар кӀватӀнавай. Абуру санал Петру вилив хуьзвай.

²⁵ Петру гьаятдиз гьахьнамазни, Карнела, Петрудин вилик фена, адаз, кӀвачерив ярх хьана, икрам авуна.

²⁶ – Къарагъ, – лагьана Петруди, адаз къарагъиз куьмекна, – зунни гьа вун хьтин инсан я.

²⁷ Карнелахъ галаз рахаз-рахаз, Петру кӀвализ гьахьна. КӀвале адаз гзаф инсанар кӀватӀ хьанваз акуна.

²⁸ Ада абуруз лагьана: – Квез чизва хьи, чувудриз маса халкьарикай тирбурухъ галаз рафтарвал авун ва абурун кӀвалериз фин къадагъа авунва. Амма Аллагьди заз гьич са касни кьацӀайдай ва я чиркиндай кьун тавун лазим тирди къалурна.

²⁹ ГьакӀ хьайила, заз ша лагьайла, зун чуькьни тавуна куь патав атана. Гила за квевай куьне заз вучиз эвернавайди ятӀа хабар кьан.

³⁰ – Кьуд югъ идалай вилик йикъан сятдин пудаз за жуван кӀвале дуьа ийизвай, – жаваб гана Карнела. – Садлагьана зи вилик цӀарцӀар гузвай пекер алай са кас акъатна

³¹ ва лагьана: «Карнел, вуна ийизвай дуьаяр Аллагьди кьилиз акъудзава ва вуна кесибриз гайи куьмекарни Адаз аквазва.

³² Гьавиляй вуна Яфа шегьердиз Петру-Симун лугьудай касдиз эвериз инсанар ракъура. Ам табагъар ийидай Симунан кӀвале акъвазнава, адан кӀвал гьуьлуьн патав гва».

³³ Зани гьасятда ви патав инсанар ракъурна. Вун атана хъсан кар хьана. Аллагьди чаз вуч лугьун ваз эмирнаватӀа вавай чирун патал, исятда чун иниз Аллагьдин вилик кӀватӀ хьанва.

³⁴ Петру рахаз эгечӀна: – Зун рикӀивай а кардин гъавурда акьазва хьи, Аллагьди са халкь маса халкьдилай вине кьазвач.

³⁵ Аллагьди Вичихъай кичӀезвай ва дуьз кӀвалахар ийизвай гьар са кас, адан миллетдизни килиг тавуна, кьабулзава.

³⁶ Аллагьди Исраилдин халкьдиз вирибурун Ребби тир Иса Месигьди адаз ислягьвал гъида лагьана хабар ракъурна.

³⁷ Ягьяди цик акахьун къачу лагьана эверайдалай кьулухъ, Галилейдилай эгечӀна вири Ягьудатда кьиле фейи крарни квез чизва.

³⁸ Аллагьди Назаретдай тир Исадиз Пак Руьгьни чӀехи къуват гана. Гьавиляй Исади Вич къекъвез хьайи вири чкайра хъсанвилер авуна, иблисдин гъилик акатнавайбур сагъар хъувуна. Вучиз лагьайтӀа Аллагьни Адахъ галаз авай.

³⁹ Вири Ягьудатда ва Ярусалимда Исади авур кьван крарин шагьидар я чун. Чувудри Ам хашуниз яна кьена,

^40-41 Аллагьди Адал пуд лагьай юкъуз чан хкана. Аллагьди Ам вири халкьдиз ваъ, анжах чаз, Вичи виликамаз хкянавай шагьидриз, аквадайвал авуна! Исадал кьейидалай кьулухъ чан хтайла, чна Адахъ галаз фу-яд тӀуьнай.

⁴² Аллагьди Ам чан алайбурунни кьейибурун дуванбегвиле тайинарнава, Исади чун и кардикай инсанриз хабар гудай шагьидар яз ракъурнава.

⁴³ Пайгъамбаррини гьадакай шагьидвал ийизва. Абуру лугьузва хьи, Исадихъ иман авур гьар садан гунагьрилай Адан ТӀварцӀелди гъил къахчуда.

⁴⁴ Петруди и гафуникай ихтилатар ийизмай кьван гагьда адаз яб гузвай вирибурук Пак Руьгь акатна.

⁴⁵ Петрудихъ галаз атай чувуд иманияр Аллагьди Пак Руьгьдин пай маса халкьарикай тирбурузни ганвайди чир хьайила, лап мягьтел хьана,

⁴⁶ вучиз лагьайтӀа абуруз Карнелани адахъ галай инсанри Аллагьдиз жуьреба-жуьре чӀаларал шукурар ийизвайди акунвай. Инал Петруди лагьана:

⁴⁷ – Чак хьиз Пак Руьгь акатнавай и инсанриз цик акахьун къачун къадагъа ийиз жедани кьван?

⁴⁸ Адани Иса Месигьдин ТӀварцӀелай абурув цик акахьун къачуз туна. Идалай кьулухъ абуру Петрудиз са шумуд юкъуз чпин патав гумукь лагьана.