Киххьей къанун 9 - Пак Калам

Лайих тушир пишкеш

^1-2 Яб це, Исраил! Къе куьн Ярдан вацӀалай элячӀзава хьи, квелай кьадардиз ва къуватдиз артух халкьарин чилер, цавув агакьзавай цлар галай чӀехи ва сенгер янавай шегьерар, еке буйдин ва чӀехи халкь тир анакьийрин чилер кьун патал, – квез абур чизва, квез ван хьана хьи, инсанри абурукай гьикӀ лугьудатӀа: «Анакьийрин хура нивай акъваз жеда?!».

³ Амма Ребби, куь Аллагь, кана руьхъ ийидай цӀай хьиз, куь вилик кваз физвайди гила гъавурда акьукь. Им Гьам я абур тергдайди, абурун винел квез гъалибвал гудайди, – ва куьне, Реббиди квез хиве кьурвал, абурун чил муьтӀуьгъар ийида, абур тадиз тергда.

⁴ Реббиди, куь Аллагьди, абур чукурайла, куьне квез лугьумир: «Им чи гьахъ-михьивал себеб яз, Реббиди чна и уьлкве къачун патал чун иниз гъана». Ваъ, и халкьарин пис крар себеб яз Реббиди абурун чилер квев вахкузва!

⁵ Куьне куьн гьахъ гвайбур ва дуьзбур тирвиляй атана и уьлкве къачудайди туш. Реббиди, куь Аллагьди, квез и чилер и халкьар батӀул тирвиляй, ва Ада куь бан-бубаяр тир Ибрагьимаз, Исакьаз ва Якьубаз кьур кьин кьилиз акъудун яз гузва.

⁶ Гьавиляй чир хьухь, Реббиди, куь Аллагьди, а авадан уьлкве куь ихтиярда тун куь гьахъ-михьивилихъ галаз алакъада авач. Ваъ, куьн кьилиз ялдай халкь я!

Къизилдин дана

⁷ Куьне Ребби, куь Аллагь, кьурумда гьикӀ перт ийизвайтӀа рикӀел хуьх ва рикӀелай алудмир. Мисридай экъечӀай йикъалай гатӀунна ва инив агакьдалди куьн датӀана Реббидиз акси жезвай.

⁸ Куьне Ребби Харебдин патарив а саягъда перт авунай хьи, Адаз, хъиле гьатна, куьн терг ийиз кӀан хьанай.

⁹ Реббиди квехъ галаз кутӀуннавай а Икьрардин кхьинар алай къванцин кьелечӀ къаябар къахчун патал зун дагъдиз хкаж хьайила, за дагъда яхцӀур югъни яхцӀур йиф акъуднай, я тӀуьначир, я хъваначир.

¹⁰ Реббидини зав кхьинар алай къванцӀин кьелечӀ кьве къаяб вуганай; абурал Аллагьдин гъилелди, вири жемят кӀватӀ хьанвай юкъуз Реббиди квез дагъдал, цӀун кьулай вуч лагьанайтӀа, вири чӀугунвай.

¹¹ ЯхцӀур югъни яхцӀур йиф алатна – Реббиди зав къванцин кьелечӀ кьве къаяб, икьрар алай къаябар, вуганай.

¹² Реббиди заз лагьанай: «Тади ая, эхвичӀ! Вуна Мисридай акъудай ви халкь усалди хьанва. За алад лагьай дуьз рекьелай абур гьикьван фад элячӀна! Абуру чпиз цӀурурна цайи икрам ийидай кӀалуб раснава».

¹³ Реббиди заз лагьанай: «Заз аквазвайвал, и халкь кьилиз ялдайди я!

¹⁴ Зун акъвазармир – За абур терг ийида, абурун тӀвар цавун кӀаникай квадарда. Валай лагьайтӀа За къуват авай ва кьадардиз гзаф халкь арадал гъида».

¹⁵ Зун элкъвена дагъдай эвичӀиз хьана. Дагъ ялавди кьуна кузвай; зи гъилени икьрар алай къванцин кьелечӀ кьве къаяб авай.

¹⁶ Заз акуна хьи, куьне Реббидин, куь Аллагьдин, вилик гунагьдиз рехъ ганва, – куьн патал цӀурурна цанвай данадин кӀалуб гьазурнава. Куьн Реббиди алад лагьай дуьз рекьелай лап фад элячӀнавай!

¹⁷ А чӀавуз за кхьинар алай кьве къаябни чилел гьалчнай – абур куь вилик ханай.

¹⁸ Ахпа зун мад Реббидин вилик экӀя хьанай – мад яхцӀур юкъузни яхцӀур йифиз я тӀуьначир, я хъваначир – Реббидин вилера негь тир кӀвалах авунай ва куьне авур гунагьдин патахъай Адак хъел кутунай.

¹⁹ Заз хаф янавай, хъилев ва ажугъдив ацӀанвай Реббидиз куьн терг ийиз кӀанзавай эхир. Амма Ада и гъилерани зи гафуниз яб ганай.

²⁰ Реббидиз Гьарунан хъел гзаф авай ва ам терг ийиз кӀанзавай, амма за гьа чӀавуз Гьарунан патахъайни тӀалабнай.

²¹ Куь гунагьни, куьне туькӀуьрай дана, за канай, куьлуь авунай, гатанай, руг жедайвал регъвенай – ва и руг дагъдай авахьзавай хвалаз гадарнай.

²² Куьне Реббидик гьам Таверада, гьам Массада, гьамни Къибрат-Гьатагьавада хъел кутунай.

²³ Реббиди квез Къадеш-Барнедай женгинин рекьиз экъечӀ лагьайла – Ада квез «Алад фена За квез гузвай а уьлкве къачу!» – лагьайла, куьн Реббидин, куь Аллагьдин, эмирдиз табий хьаначир, куьн Адахъ агъуначир, Адахъ яб акалначир.

²⁴ Заз куьн чизвай вири и вахтунда куьн Реббидин чӀалаз килигначир!

²⁵ За Реббидин вилик пел чилив агакьарнай ва яхцӀур юкъузни яхцӀур йифиз Адан вилик экӀя хьана ярх хьанай – Ада куьн терг ийиз кӀанзава лагьанай эхир.

²⁶ За Реббидиз минет авунай: «Агъа Ребби, Жуван халкь, Жуван эменни пуч ийимир! Вуна абур Ви чӀехи гьукумдалди азад авунай, Жуван чӀехи къудратдалди Мисридай акъуднай.

²⁷ Ви лукӀар тир Ибрагьим, Исакь ва Якьуб рикӀел хкваш, и халкьдин кьилиз ялуниз, адан батӀулвилиз ва гунагьриз килигмир.

²⁸ ТахьайтӀа Вуна чун акъуддай а уьлкведа лугьуда: „Реббиди абур хиве кьунвай а чилел тухун мумкин кар тушир, Адаз абур акунани кӀанзавайди тушир. Гьавиляй Ада абур кьурумдиз гьана терг авун патал тухванвайди тир“.

²⁹ Амма абур – Ви халкь ва Ви эменни я эхир. Вуна абур Жуван чӀехи къуватдалди, къудратдалди акъуднай!»