Киххьей къанун 8 - Пак Калам

Ребби рикӀелай алуд тавунин эмир

¹ За исятда квез малумарзавай вири эмирар гьа лагьайвал кьилиз акъуд. ИкӀ хьайитӀа куьн чан аламаз амукьда ва кьадардиз артух жеда; куьне фена, Реббиди кьин гана куь бан-бубайриз хиве кьунвай уьлкве муьтӀуьгъар ийида.

² РикӀел хкваш, Реббиди, куь Аллагьди, квяй кьил акъудун патал куьн умунарна ва килигна чирна: куьне Адан эмирар кьилиз акъуддани-акъуддачни – вири и яхцӀур йисан вахтунда куьн кьурумдай гьикӀ тухванатӀа.

³ Ада куьн умунарзавай, каш чӀугваз тазвай, я квез, я куь бан-бубайриз гьич ванни тахьай мангьудалди тухар ийизвай. Адаз квез къалуриз кӀанзавай хьи, инсандал алай чан тек са фалди туш. Инсанди Реббидин сивяй вуч акъатзаватӀа, гьадалди уьмуьр тухузвайди я!

⁴ Вири и яхцӀур йисуз ви парталар кукӀвар жезвачир, ви кӀвачер дакӀвазвачир.

⁵ Гъавурда гьат эхир, Реббиди, ви Аллагьди, бубади хциз гьикӀ тербия гудатӀа, вазни гьакӀ тербия гузва!

⁶ Реббидин, ви Аллагьдин, эмирар кьилиз акъуд, Адан рекье аваз алад ва Адахъай кичӀе хьухь.

⁷ Реббиди, ви Аллагьди, вун вичяй вацӀар авахьиз физвай, дерейра ва дагълара булахар ва чилин кӀаник квай ятар дуьздал экъечӀзавай авадан уьлкведиз,

⁸ къуьлуьнни мухан, цӀипицӀлухрин, инжилринни анаррин уьлкведиз, зейтундин чӀемедин ва виртӀедин уьлкведиз гъида.

⁹ И уьлкведа вуна тух жедалди тӀуьн жагъин тийиз уьмуьр тухудач, са куьнихъни муьгьтеж жедач; адан къванерик ракь ква, дагълара вавай буьруьнж хкудиз жеда.

¹⁰ Тух хьайила, Ада ви ихтиярда тур авадан уьлкведай, Реббидиз, ви Аллагьдиз, шукур ая.

¹¹ Гьавиляй, килиг гьа, Ребби, ви Аллагь, рикӀелай алудмир, за ваз исятда малумарзавай Адан тагькимрал, къалурнавай къайдайрал ва эмиррал амал ая.

¹² Вуна тухдалди недайла, хъсан кӀвалер эцигдайла ва абура уьмуьр тухудайла,

¹³ вахъ маларинни лапагрин кьадар гзаф хьайила, гимиш, къизил ва гьар жуьредин девлет артух хьайила,

¹⁴ дамах акатмир ва Ребби, ви Аллагь, рикӀелай ракъурмир. Ада вун Мисридай, лукӀвиляй акъудна,

¹⁵ вун зегьер квай гъуьлягъринни акьрабрин арадай, кьуру ва цикай магьрум чилерай чӀехи ва акурла кичӀе жедай кьурумдай тухвана. Вун паталди Ада цив рагай авахьиз туна;

¹⁶ Ада вун кьурумда, ви бан-бубайриз гьич ванни тахьай мангьудалди тухарна. Ада, ахпа ваз хъсан хьун патал, вун умунарна ва синагъ авуна.

¹⁷ Фикир ийимир хьи, им вуна ви къуватралди гъилиз гъанвай девлет я лагьана!

¹⁸ Ребби, ви Аллагь, рикӀел хуьх. Гьам я ваз и девлетар гъилиз гъидай къуват гузвайди – Ада ви бан-бубайрихъ галаз кутӀуннавай икьрар къенин юкъузни кьилиз акъудзава.

¹⁹ Амма куьне Ребби, куь Аллагь, рикӀелай ракъурайтӀа, ва маса аллагьрин гуьгъуьна аваз фейитӀа, абуруз къуллугъ ийиз ва икрам ийиз хьайитӀа, куьн са рахунни алачиз пуч жеда – идан патахъай за куьн гиламаз хабардар ийизва!

²⁰ Куьне Реббидиз, куь Аллагьдиз, яб гун тийиз хьайитӀа, чпин чилер квез гун патал Реббиди терг ийизвай а халкьар хьиз, куьнни телеф жеда!