Киххьей къанун 3 - Пак Калам

Башандин пачагь Аган винел гъалибвал

¹ Элкъвена хьиз, чун Башан галайвал рекьяй фенай. Аг, Башандин пачагь, вичин вири кьушунни галаз чи хуруз экъечӀнай ва Эдреидин патарив чахъ галаз женг гатӀуннай.

² Реббиди заз лагьанай: «КичӀе жемир, За ам вич, адан вири кьушун ва адан уьлкве ви гъиле твазва. Куьне Гьешбанда гьакимвал авур амарийрин пачагь тир Сигьаназ вуч авунайтӀа, гьадазни гьакӀ ая».

³ Реббиди, чи Аллагьди, Башандин пачагь Агни, адан вири кьушунни галаз чи гъиле тунай: чна абур сад амай кьван вири яна кьенай!

⁴ А вядеда чна адан сад амай кьван вири шегьерар кьунай – имни пудкъад шегьер, вири Аргуб вилаят, Аган Башан пачагьлугъ.

⁵ Вири ибур сенгер янавай кьакьан цлар галай ва агалнавай варар авай шегьерар тир. Идалайни гъейри – сенгер янавачир гзаф кьадар хуьрер.

⁶ Чна абур тергнай – Гьешбандин пачагь Сигьаназ хьтин кар кьунай. И шегьерра чна гьам итимар, гьам папар, гьамни аялар тергнай.

⁷ Амма вири малар ва шегьерра гъиле гьатай шейэр чна чаз тунай.

^8-9 Гьа икӀ, а чӀавуз чна Ярдан вацӀун и пата гьакимвал ийизвай амарийрин кьве пачагьдин чилер кьунай – Арнан вацӀалай Гьерман дагъдал (сидунвийри аниз Сиръян, амарийри – Сенир лугьуда) кьван экӀя хьанвай чилер –

¹⁰ дагъдин дуьзенра авай вири хуьрер, вири Гилеад, Аган Башан пачагьлугъдин шегьерар тир Салхадал ва Эдреидал кьван, вири Башан.

¹¹ Аг, Башандин пачагь, рефаимрикай эхиримжиди тир. Адан месни – ракьунди. Исятда ам аманийрин Раббада ава; ам, адетдин кьуьнтералди, кӀуьд кьуьнтуьн яргъивал, кьуд кьуьнтуьнни гьяркьуьвал алайди я.

Ярдандилай рагъэкъечӀдай пата авай чилер паюн

¹² Чна а чӀавуз къачур чилер, Арнан вацӀун дередилай вине авай Араэрдилай ва Гилеаддин дагьдин дуьзенлухрин са пай, ана экӀя хьанвай хуьрерни кваз, за Рувенанни Гадан тайифайриз ганай.

¹³ Амай Гилеад, ва гьакӀни Аган пачагьлугъ тир вири Башан, за Манашедин тайифадин са паюниз ганай. Аргубдин вири вилаятдиз – санлай вири Башандиз – виликдай Рефаимрин чил лугьудай.

¹⁴ Амма Яира, Манашедин эвледди, Аргубдин вири вилаят, гешурийрин ва магьахвийрин сергьятрив кьван, кьуна ва адаз вичин тӀвар гана, гьакӀ хьайила къенин йикъал къведалди Башандиз Яиран хуьрер лугьузва.

¹⁵ Магьиран эвледриз за Гилеад ганай.

¹⁶ Рувенанни Гадан тайифайриз, лагьайтӀа, за Гилеаддилай Арнан дередал кьван авай чилер ганай, дередин кӀаняйтӀуз вичин а пата аманийри уьмуьр тухузвай Яббукь вацӀал къведалди сергьят яз.

¹⁷ Идалайни гъейри, за абуруз дуьзендин чилер ганай – Ярдан тирвал, Кинерет вирелай Кьейи гьуьлуьв яни УькӀуь гьуьлуьв кьван – ва рагъэкъечӀдай пата Фасга дагъдин ценерив кьван.

¹⁸ А чӀавуз за и тайифайриз ихьтин тапшуругъ ганай: «Реббиди, куь Аллагьди, квез мулкар яз и чилер гана. Амма куьн, яракь гъиле авай итимар, женгиниз куь стхаяр тир вири Исраилдин рухвайрин кӀвенкӀве аваз фин лазим я!

¹⁹ Куь папар, аялар ва малар – заз квез гьикьван гзаф малар аватӀа чида! – за квез гайи хуьрера амукьрай.

²⁰ Реббиди куь стхайриз, квез хьиз архайинвал гайила, абуру, Реббиди, куь Аллагьди, чпиз гузвай, Ярдан вацӀун а пата авай уьлкве муьтӀуьгъ авурла, – гьа чӀавуз куьн за квез гайи куь чилин белгенрал элкъвена хкведа».

²¹ А вядеда за Шуаяз лагьанай: «Реббиди, куь Аллагьди, и кьве пачагьдиз вуч авунайтӀа, ваз ви вилералди акуна. Вун чпелай яна фидай маса пачагьлугъризни Реббиди гьахьтин кар кьада.

²² Абурухъай кичӀе жемир: Реббиди, куь Аллагьди, Вичи куьн патал женг чӀугвазва!»

Мусадиз Ярдандилай элячӀун къадагъа авун

²³ А чӀавуз за Реббидиз ялвар авунай:

²⁴ «Агъа Ребби! Вуна заз, ви лукӀраз, Ви чӀехивал ва ви гъилин къуват къалуриз гатӀунна! Цаварал я тушни чилерал ихьтин крарни алакьунар вичин къуватдай фидай маса аллагь авани кьван?

²⁵ Ихтияр це ман зазни вацӀалай элячӀна, Ярдандин а пата авай авадан уьлкве аквадай – гьам и авадан дагълух чилер, гьамни Либан!»

²⁶ Амма Реббидиз куьн себеб яз закай хъел атанвай ва заз яб ганачир. Ада лагьанай: «Бес хьуй! Мад Завай идан патахъай тӀалабунар ийимир.

²⁷ Фасга дагъдиз хкаж хьухь ва рагъакӀидай патаз, кефер патаз, кьибледиз ва рагъэкъечӀдай патаз килиг, жуван вилералди килиг, вучиз лагьайтӀа Ярдандилай элячӀун ваз кьисмет авунвач.

²⁸ Шуаяз серенжемар це, адаз мягькемди ва уьтквемди хьухь лагьана эмир це. Ам и инсанрин кьиле аваз фида – ва ваз анжах вилералди аквадай уьлкве абурун мулкариз элкъуьрда».

²⁹ Чун Бет-Пеардин патарив гвай дугуна акъвазнай.