Киххьей къанун 2 - Пак Калам

Кьурумда гьарна къекъуьн

¹ Чун кьулухъ элкъвенай ва НацӀун гьуьлуьхъди физвай рекьяй кьурумдиз гьахьнай; Реббиди заз гьа икӀ эмир ганай. Чун хейлин вахтунда Сеирдин дагъларин къвалалай физ рекье хьанай.

² Ахпа Реббиди заз лагьанай:

³ «Бес я куьн и дагъларин вири патарихъай элкъвена фейи кьван. Кефер патахъ элкъуьгъ.

⁴ Халкьдизни малумара: Куьн куь стхайрин, Эсаван эвледрин, Сеирдин эгьлийрин чилерай яна фида. Абуруз квехъай кичӀезва. Килиг гьа,

⁵ абурухъ галаз дяве гатӀунмир! Абурун чилин гьич са чӀибни За квез гудач, вучиз лагьайтӀа Сеирдин дагълар За Эсаван мулкар яз тайинарнава.

⁶ Гьам куьне недай суьрсет, гьам куьне хъвадай яд абурувай гимишдихъ къачу.

⁷ Реббиди, куь Аллагьди, квез вири крара хийир-дуьа авунва эхир! Адаз куьн и чӀехи кьурумдайтӀуз гьикӀ физватӀа хабар я. Ингье им яхцӀур йис я Ребби, куь Аллагь, квехъ галаз ва квез гьич са куьнин патахъайни игьтияж авачир».

⁸ Чун чи стхайрин, Эсаван эвледрин, Сеирдин эгьлийрин уьлкведикай, вич Элатдилай Эциан-Гебердал кьван дуьзен тирвал экӀя хьанвай рекьикай, къерех хьана – ва Магьабдин дуьзенриз гьахьнай.

⁹ Реббиди заз лагьанай: «Магьабвийрал гьужум ийимир, абурухъ галаз дяве гатӀунмир, абурун чилерикай За квез гьич са затӀни гудач, вучиз лагьайтӀа За Ар Лутан эвледриз мулкар яз ганва».

¹⁰ (Виликдай ана анакьияр хьтин, кьакьан буйдин, чӀехи ва гзаф кьадарралди авай халкьди эмийри уьмуьр тухузвай.

¹¹ Абур, анакьияр хьиз, рефаимрикай яз гьисабзава; магьабвийри абуруз эмияр лугьузва.

¹² Сеирда лагьайтӀа виликдай хурийри уьмуьр тухузвай, амма Эсаван эвледри абурун чилер кьуна, абур тергна ва гьана уьмуьр тухуз ацукьна – Исраилан эвледри чпиз Реббиди чпин ихтиярда тур уьлкведа вуч авунайтӀа, гьакӀ авуна.)

¹³ «Виликди! – лагьана Реббиди. – Зеред вацӀун кьерелай элячӀ!» Чунни Зеред вацӀун кьерелай элячӀнай.

¹⁴ Къанни цӀемуьжуьд йисуз чна Къадеш-Барнедилай гатӀунна рехъ атӀанай – ингье Зереддилай элячӀна. Чи арада виликан несилдин аскеррикай гьич садни амачир – абуруз Реббиди кьин кьурвал.

¹⁵ Чи юкьва авай абурув сад садан гуьгъуьналлаз Реббидин гъил агакьна, ва эхирни абурукай садни чан аламаз амукьнач.

¹⁶ И аскерар сад амай кьван вири кьейила,

¹⁷ Реббиди заз лагьанай:

¹⁸ «Куьн исятда Ардилай яна, магьабвийрин чилелайтӀуз алад,

¹⁹ ва ахпа аманийрин уьлкведив агакьда. Абурал вегьемир, абурухъ галаз дяве гатӀунмир. Абурун чилерикай За квез гьич са кӀусни гудач, вучиз лагьайтӀа и чилер За Лутан эвледрин ихтиярда тунвайбур я».

²⁰ И уьлквени, чпиз аманийри замзуммияр тӀвар ганвайбур тир, рефаимрин чилерикай яз гьисабзава, абуру виликдайни гьана уьмуьр тухузвай.

²¹ Им чӀехи, гзаф кьадардин халкь тир – анакьияр хьиз, кьакьан буй авай. Амма Реббиди абур тергна – аманийри абурун чилер кьуна ва гьана уьмуьр тухуз ацукьна.

²² Реббиди амманияр патал, чеб Сеирда уьмуьр тухузвай Эсаван эвледар патал вуч авунайтӀа, гьам авуна. Ада Хурияр тергнай эхир – Эсаван эвледрини абурун чилер кьунай ва гилалди гьана уьмуьр тухузва.

²³ Газадин къваларив гвай хуьрера уьмуьр авур авияр лагьайтӀа, кафтарвийри – Кафтардай атай халкьди, – тергнай ва гьа икӀ абурун чилел уьмуьр тухуз ацукьнай.

Хешбандин пачагь Сигьанан винел гъалибвал

²⁴ «Виликди! – лагьанай Реббиди. – Арнан вацӀалай элячӀ! Килиг, За Гьешбандин пачагь амари Сигьан ва адан уьлкве куь гъиле твазва. Чилер къачуз гатӀуна! Дяве ая!

²⁵ И йикъалай эгечӀна За цавун кӀаник квай вири халкьарик куь вилик кичӀ ва хаф ядай гьиссер кутада. Квекай ван хьайила, абур кичӀе хьана зурзаз акъвазда!»

²⁶ Къедемат кьурумдай за Сигьанан, Гьешбандин пачагьдин, кьилив адаз ислягьвал теклиф ийиз векилар ракъурнай. За адав агакьарун патал эмир ганай:

²⁷ «Заз ви чилерилай яна фидай ихтияр це. Зун рехъ кьуна фида, я эрчӀи, я чапла патахъ элячӀдач.

²⁸ Чна недайдини, чна хъвадайдини вуна чаз гимишдихъ маса гуда. Анжах ви чилерай яна фидай ихтияр це –

²⁹ Сеирда уьмуьр тухузвай Эсаван эвледри, ва Арда уьмуьр тухузвай магьабвийри хьиз, – ва чун Ярдан вацӀун а патаз, Реббиди, чи Аллагьди, чаз гузвай гьа уьлкведиз рекье гьатда».

³⁰ Амма Сигьаназ, Гьешбандин пачагьдиз, чун и патай а патаз ахъайиз кӀан хьанач. Реббиди, чи Аллагьди, Сигьан куь гъиле тун патал, адан руьгь терсди, рикӀни кӀевиди авуна – и кӀвалахни кьилиз акъатна.

³¹ Реббиди заз лагьанай: «Килиг, сифте За Сигьанни адан уьлкве ви гъиле твада! И уьлкве муьтӀуьгъ авунилай гатӀуна».

³² Сигьан вичин вири кьушунни галаз чи хуруз экъечӀнай ва Ягьацдин патарив чахъ галаз женг гатӀуннай.

³³ Реббиди, чи Аллагьди, ам чи гъиле тунай: чна ам ва адан рухваяр яна кьенай ва адан вири кьушун телефнай.

³⁴ А вядеда чна адан вири шегьерар кьунай ва абур тергнай. И шегьерра чна садни тун тавуна, гьам итимар, гьам папар, гьамни аялар тергнай

³⁵ Анжах малар ва шегьерра гъиле гьатай затӀар чна чаз тунай.

³⁶ Арнан вацӀун дередин къерехда авай Араэрдилай, ва дереда авай хуьрелай гатӀунна лап Гилеаддин чилерал къведалди гьич са къеледивайни чи хура акъвазиз хьаначир. Реббиди, чи Аллагьди, вири чи гъиле туна!

³⁷ Амма аманийрин уьлкведал куьне вегьеначир – я Яббукь вацӀун дередал, я дагъдин хуьрерал. Реббиди, чи Аллагьди, гьакӀ эмир ганай.