Хьунухь 9 - Пак Калам

Аллагьдинни Нуьгьан икьрар

¹ Аллагьди Нуьгьазни адан рухвайриз хийир-дуьа авуна: «Куьне куь тум-кьадар артух ая, чил ацӀура.

² Чилел алай вири вагьшийриз ва цавара авай вири къушариз, гьам чилин винел алай чан алай кьван вири куьлуь-шуьлуьйриз, гьамни гьуьлера авай вири гъетериз квехъай кичӀе хьурай ва куь вилик зурзурай: абур куь ихтиярда тунва.

³ Вири гьайванар за квез, виликдай набататрин къацар гайивал, тӀуьн патал гузва.

⁴ Амма чан алай як, яни иви квайди, – немир.

⁵ Куь ивидин патахъайни – къакъудай уьмуьрдин патахъайни – За а иви экъичайдаз – кӀандатӀа ам вагьши хьурай, кӀандатӀа вичин стхадин уьмуьр къакъудай инсан – жаза гуда.

⁶ Инсандин иви ни экъичайтӀа, и кардай ивикъичдин иви эхкъичрай. Вучиз лагьайтӀа инсан Аллагьдин къамат хьиз халкь авунвайди я.

⁷ Куьне куь тум-кьадар артух ая, чил тирвал чукӀукӀ, гзаф хьухь».

⁸ Аллагьди Нуьгьаз ва адан рухвайриз лагьана:

^9-10 «Гила За квехъ галаз ва квелай гуьгъуьниз къведай несилрихъ галаз, гьам гимидай эвичӀай чан алай вири затӀарихъ галаз: ничхиррихъ, кӀвалин ва вагьши гьайванрихъ галаз икьрар кутӀунзава.

¹¹ Квехъ галаз зи икьрар ихьтинди жеда: идалай кьулухъ чан алай гьич са затӀни мад чилел яд акьалтна терг жедач, яд акьалтуни мад чил барбатӀ хъийидач».

¹² Аллагьди давамарна: «Ингье За квехъ галаз ва чан алай кьван вири затӀарихъ галаз эбеди яз кутӀунзавай икьрардин лишан:

¹³ За циферал Жуван чӀемерук – яргъируш – Зини чилин агьалийрин арада авай икьрардин лишан яз куьрсарнава.

¹⁴ За лацу цифер чилин винел гъайила, абурукай яргъируш хкечӀда.

¹⁵ И чӀавуз квехъ ва чан алай гьар са затӀунихъ галаз кутӀуннавай икьрар Зи рикӀел хкведа – ва чан алай гьар са затӀ терг ийидай яд акьалтун мад хъижедач.

¹⁶ Циферик яргъируш жеда – Заз ам аквада, ва чилел алай вири агьалийрихъ галаз эбеди яз кутӀуннавай Жуван Икьрар Зи рикӀел хкведа».

¹⁷ Аллагьди Нуьгьаз лагьана: «Им За чилел уьмуьр тухузвай гьар са затӀунихъ галаз кутӀуннавай Икьрардин лишан я».

Нуьгьан рухваяр

¹⁸ Гимидай экъечӀай Нуьгьан рухваяр – ибур Шам, Хам ва Яфет я. Хам Къенанан буба я.

¹⁹ Абурун кьадар пуд тир, ва чилел алай вири халкьар гьабурулай арадал атанвайди я.

²⁰ Нуьгьа чилел зегьмет чӀугвазвай; сифте ада ципицӀар цана.

²¹ Чехирдикай хъвана, Нуьгь луьл сархуш хьана ва кьецӀилдаказ вичин алачухдик къаткана.

²² Адан кьецӀилвал Къенанан буба Хамаз акуна ва экъечӀна и кардикай стхайриз лагьана.

²³ И чӀавуз Шамани Яфета къуьнерихъ чухва вегьена ва кьулу-кьулухъ атана адан кьецӀилвал чухвадалди кӀевна. Абур чеб маса патахъ килигзавай, гьавиляй адан кьецӀилвал акуначир.

²⁴ Нуьгь кьил кьилел хтанваз ахварай аватна ва вичин гъвечӀи хци авур кӀвалах чир хьайила,

²⁵ ада лагьана: «Къенаназ лянет хьурай! Вичин стхайриз ам лап усал лукӀ хьурай!» Аллагьди мадни лагьана:

²⁶ «Шукур хьурай Реббидиз, Ша́ман Аллагь тир! Къенан лагьайтӀа, стхайрин лукӀ хьурай.

²⁷ Аллагьди Яфетан мулкар гегьенш авурай! Яфета Шаман алачухрик уьмуьр тухурай! Къенан лагьайтӀа, стхайрин лукӀ хьурай».

²⁸ Дуьньядал яд акьалтайдалай кьулухъ Нуьгьан уьмуьр мадни пуд вишни яхцӀурни цӀуд йис давам хьана.

²⁹ Уьмуьрдин яшар кӀуьд вишни яхцӀурни цӀудаз барабар хьайила, Нуьгь кьена.