Хьунухь 8 - Пак Калам

¹ Нуьгь ва адахъ галаз санал гимида авай вагьши ва кӀвалин гьайванар Аллагьди рикӀел хкана. Аллагьди чилел гар ракъурна ва ятар кьулухъди чӀугуна.

² КӀев хьана чӀехи деринрин сивер, кӀев хьана цавун хилер, ва марф къун акъваз хьана.

³ Яд яваш-яваш чилелай алатиз хьана. Вишни яхцӀурни цӀуд йикъалай яд ахцукьиз эгечӀна:

⁴ ирид лагьай вацран цӀерид лагьай юкъуз гими Араратдин дагъларал акъваз хьана.

⁵ Ци явашдиз кьулухъ чӀугуна, цӀуд лагьай вацран сад лагьай юкъуз дагъларин кукӀушар малум хьана.

⁶ ЯхцӀур югъ алатна. Вичи туькӀуьрай дакӀар ачухна,

⁷ Нуьгьа кӀвагъ къецел ахъайна; чил кьурадалди кӀвагъ гагь лув гуз физ, гагь элкъвена хквез хьана.

⁸ Ахпа Нуьгьа яд акьалтун куьтягь хьанватӀа чирун патал къецел лиф ахъайна,

⁹ амма лифрезни вичин кӀвач хкӀадай чка жагъанач ва элкъвена хтана, вучиз лагьайтӀа гьеле вири чил ци кьунмай. Нуьгьа гъил яргъи авуна, лиф гимидиз хкана.

¹⁰ Ада ирид юкъуз гуьзетна ва лиф мад ахъайна.

¹¹ Ам няниз хтана – кӀуфа зейтун тарцин таза пеш аваз, ва Нуьгьаз яд ахцукьнавайди чир хьана.

¹² Ада мад ирид къуз гуьзетна, мадни лиф ахъайна. Амни – мад элкъвена адан патав хтанач.

Нуьгьан къурбандар ва Аллагьди гайи гаф

¹³ Нуьгьан уьмуьрдин ругуд вишни са йис алукьайла, сад лагьай вацран сад лагьай юкъуз яд ахцукьна. Нуьгьа гимидин къав ахъайна ва адаз чилел яд аламачирди акуна.

¹⁴ Кьвед лагьай вацран къанни ирид лагьай юкъуз, чилин винел пад кьуру хьайила,

¹⁵ Аллагьди Нуьгьаз лагьана:

¹⁶ «Папахъ, рухвайрихъ ва абурун папарихъ галаз санал гимидай экъечӀ.

¹⁷ Вири гьайванарни акъуд – гьам ничхирар, гьам малар, гьамни чилел къекъведай чан алай вири куьлуь-шуьлуьяр: дуьнья тирвал чукӀурай, абуру бегьер гъурай ва кьадардиз гзаф хьурай».

¹⁸ Нуьгь рухваяр, паб ва рухвайрин папарни галаз гимидай экъечӀна,

¹⁹ гуьгъуьнал алаз вагьшияр, куьлуь гьайванар, ничхирар – чилел уьмуьр тухузвай кьван гьар са затӀ жинс жинсинин гуьгъуьна аваз эвичӀна.

²⁰ Нуьгьа Реббидиз къурбанган эцигна ва гьайванрин михьи вири жуьрейрикай ва михьи къушарикай кунуг авуна.

²¹ Къурбандрин хуш ни чӀугваз, Реббиди вичи-вичиз элкъвена икӀ лагьана: «Абурун рикӀери лап жегьил чӀавалай эгечӀна писвилихъ ялзаватӀани, идалай кьулухъ мад За инсанар себеб яз чилиз лянет хъийидач. За жува халкь авур чан алай кьван вири затӀариз мад инад кьуниз рехъ гудач.

²² Чил амай кьван эхир тахьурай: цунин ва гуьнин, мекьин ва зегьемдин, гатун ва хъуьтӀуьн, йикъан ва йифен».