Хьунухь 6 - Пак Калам

Инсаният телеф авунин ният

¹ Чилел алай инсанрин кьадар къвердавай артух жезвай. Абуруз рушар жезвай, ва

² инсанрин рушарин иервал акваз Аллагьдин рухвайри абур, нин рикӀи гьим кьунатӀа, пабвиле къачузвай.

³ Реббиди лагьана: «Зи руьгь инсандик датӀана кваз жедач. Ам анжах як я, ва адан уьмуьрдин муьгьлет вишни къад йис хьурай».

⁴ И девирда (ва адалай кьулухъни) чилел зурба буйдин инсанри уьмуьр тухузвай, вучиз лагьайтӀа Аллагьдин рухваяр инсанрин рушарихъ галаз жезвай, ибуруни абурулай аялар хазвай. Къадим девирдин пагьливанар тир абуру чпин тӀвар машгьур авунвай.

⁵ Аллагьдиз акуна хьи, инсанрин патай чилел гзаф писвилер жезва: абурун вири фикирар датӀана писвилихъ элкъуьрнава.

⁶ Ам инсан чилел халкь авунал пашман хьана ва рикӀ дердини кьуна,

⁷ лагьана: «За жува халкь авур вири инсанар, абурухъ галаз санал кӀвалин гьайванарни, вагьшиярни, къушарни чилин винелай терг ийида. Абур халкь авуникай За гьайиф чӀугвазва».

⁸ Анжах са Нуьгьаз Реббидин вилерай майил авай.

Аллагьди Нуьгьаз гими расунин эмир гун

⁹ Ингье Нуьгьакай ихтилат. А девирдин инсанрин арада анжах Нуьгь гьахъ-михьи ва рехне квачир кас тир, адан уьмуьр Аллагьдин рекье аваз физвай.

¹⁰ Нуьгьаз пуд хва авай: Шам, Хам ва Яфет.

¹¹ Чил Аллагьдин вилера негь хьанвай: ам зулумкарвилеривди ацӀанвай.

¹² Аллагьдиз акуна хьи, чил ява хьанва: вири чӀуру рекье аваз физва.

¹³ Аллагьди Нуьгьаз лагьана: «За чилел уьмуьр тухузвайкьванбур вири тергда, чил абурун пис краривди ацӀанва. За абур ва абурухъ галаз санал вири чилни терг ийида.

^14-15 Амма вуна жуваз гафер тарцин кӀарасдикай гими туькӀуьр ая. Ингье, вуна ам гьикӀ туькӀуьрдатӀа. Адан къене кьилдин кӀвалер хьтин чкаяр гьазура, къене патайни, винелайни адаз къир ягъа. Адан яргъивал – пуд виш кьуьнт, гьяркьуьвал – яхцӀурни цӀуд кьуьнт, кьакьанвални – къанни цӀуд кьуьнт хьурай.

¹⁶ Къавни акӀ туькӀуьр ая хьи, герек адан винел пад са кьуьнт хкис жедайвал. Къвалайни рак акъуда. Гимида пуд мертеба хьурай.

¹⁷ За дуьньядал яд акьалдарда ва адан винел алай ва чпин бедендик уьмуьрдин нефес квай вири затӀар терг ийида. Чилел алай кьван вири шейэр уьмуьрдикай магьрум жеда.

¹⁸ Амма вахъ галаз Зи Икьрар жеда. Вун гимида акьахда – рухваяр, паб ва рухвайрин папарни галаз –

¹⁹ ва жувахъ галаз чан алай вири шейэрикай са жуьт къачуда, эркек ва диши, абурни вахъ галаз санал хилас жедайвал.

²⁰ Къушарикай, маларикай ва чилел алай чан квай гьар са куьникай са жуьт вахъ галаз гимида акьахда, абур хилас жедайвал.

²¹ Жувахъ галаз гьар жуьредин суьрсет къачу – жуваз ва гьабуруз игьтият яз».

²² Нуьгьа Аллагьди лагьайвал вири кьилиз акъудна.