Хьунухь 5 - Пак Калам

Адамалай Нуьгьалди

¹ Ингье Адамакайни адан несилрикай ихтилатдин ктаб. Аллагьди инсан халкь авурла, Ада Аллагьдин тегьер арадал гъана.

² Ада эркекни дишиди халкь авуна ва абуруз хийир-дуьа авуна. Абур халкь авур чӀавуз абурал – «инсан» тӀварни эцигна.

³ Адаман вишни къанни цӀуд йис тир чӀавуз, адаз хва хьана – адан къамат ва тегьер авай. Адама адал ШетӀ тӀвар эцигна.

⁴ ШетӀ хьайидалай кьулухъ Адаман уьмуьр муьжуьд виш йисуз давам хьана; адаз рухваярни рушар мад авай.

⁵ КӀуьд вишни къанни цӀуд йис хьайила, Адам кьена.

⁶ ШетӀан вишни вад йис тир чӀавуз, адаз Энаш лугьудай хва хьана.

⁷ Энаш хьайидалай кьулухъ ШетӀан уьмуьр муьжуьд вишни ирид йисуз давам хьана; адаз рухваярни рушар мад авай.

⁸ КӀуьд вишни цӀикьвед йис хьайила, ШетӀ кьена.

⁹ Энашан кьудкъанни цӀуд йис тир чӀавуз, адаз Къенан тӀвар алай хва хьана.

¹⁰ Къенан хьайидалай кьулухъ Энашан уьмуьр муьжуьд вишни цӀувад йисуз давам хьана; адаз рухваярни рушар мад авай.

¹¹ КӀуьд вишни вад йис хьайила, Энаш кьена.

¹² Къенанан пудкъанни цӀуд йис тир чӀавуз адаз Магьалалел тӀвар алай хва хьана.

¹³ Магьалалел хайидалай кьулухъ Къенанан уьмуьр муьжуьд вишни яхцӀур йисуз давам хьана; адаз рухваярни рушар мад авай.

¹⁴ КӀуьд вишни цӀуд йис хьайила, Къенан кьена.

¹⁵ Магьалалелан пудкъанни вад йис тир чӀавуз адаз Яред тӀвар алай хва хьана.

¹⁶ Яред хайидалай кьулухъ Магьалалелан уьмуьр муьжуьд вишни къанни цӀуд йисуз давам хьана; адахъ рухваярни рушар мад авай.

¹⁷ Муьжуьд вишни кьудкъанни цӀувад йис хьайила, Магьалалел кьена.

¹⁸ Яредан вишни пудкъанни кьве йис тир чӀавуз адаз Гьенух тӀвар алай хва хьана.

¹⁹ Гьенух хайидалай кьулухъ Яредан уьмуьр муьжуьд виш йис давам хьана; Адаз рухваярни рушар мад авай.

²⁰ КӀуьд вишни пудкъанни кьве йис хьайила, Яред кьена.

²¹ Гьенухан пудкъанни вад йис тир чӀавуз адаз Метушелагь тӀвар алай хва хьана.

²² Метушелагь хайидалай кьулухъ Гьенухан уьмуьр пуд виш йис давам хьана, адан уьмуьр Аллагьдин рекье аваз фена; адаз рухваярни рушар мад авай.

²³ Гьенух пуд вишни пудкъанни вад йисуз уьмуьр тухвана,

²⁴ ва адан уьмуьр Аллагьдин рекье аваз фена. Гьенух амукьнач: Аллагьди ам вичин патав хутахна.

²⁵ Метушелагьан вишни кьудкъанни ирид йис тир чӀавуз адаз Ламех тӀвар алай хва хьана.

²⁶ Ламех хайидалай кьулухъ Метушелагьан уьмуьр ирид вишни кьудкъанни кьве йисуз давам хьана; адаз рухваярни рушар мад авай.

²⁷ КӀуьд вишни пудкъанни кӀуьд йис хьайила, Метушелагь кьена.

²⁸ Ламехан вишни кьудкъанни кьве йис тир чӀавуз адаз хва хьана.

²⁹ «Ада чаз чи кӀвалахда, Аллагьди лянет авунвай чилел чӀугвазвай чи зегьметда теселли гуда», – лагьана Ламеха ва гьавиляй адал Нуьгь тӀвар эцигна.

³⁰ Нуьгь хайидалай кьулухъ Ламехан уьмуьр вад вишни кьудкъанни цӀувад йисуз давам хьана; адаз рухваярни рушар мад авай.

³¹ Ирид вишни пудкъанни цӀерид йис хьайила, Ламех кьена.

³² Нуьгьан вад виш йис тир чӀавуз адаз рухваяр хьана: Шам, Хам ва Яфет.