Хьунухь 49 - Пак Калам

Якьуба вичин рухвайриз хийир-дуьа авун

¹ Якьуба вичин рухвайриз эверна: – КӀватӀ хьухь: за куьн гележегда куь гуьзетдатӀа хабардар ийида.

² КӀватӀ хьана яб це Якьубан рухваяр, Исраилаз яб це, куь бубадиз!

³ Рувен, зи сифтеди, зи къудрат, Зи итимвилин къуватдин сифте майва, Ам кьакьан я виридалай – ичӀи къуват!

⁴ Вилик пад кьаз тежедай ятар хьтин, хъижедач вун мад сифтеди, къаткана кьван бубадин месел – зи месиз кӀур гана, мурдар авуна!

⁵ Шимунни Леви, стхаяр, чпин кантӀар инсаф тийирвилин яракь тир!

⁶ За абурун къастара иштирак ийизвач, кӀеретӀдикай туш зун абурун. Хъел акатда инсанар рекьида, къугъунар ийида, жунгавар набут ийида.

⁷ Лянет я абурун икьван инсаф авачир хъилез, гьакӀни гъазабдиз, акьван къати! Якьубан рухвайрин арада гьарнихъ чукӀурда абур, чкӀана гьарниз акъудда Исраилан рухвайрин арада!

⁸ Ягьуд, стхайри ви тариф ийида! Ви гъил – душманрин кьамал жеда, ваз стхайри икрам ийида.

⁹ Вун, Ягьуд, жегьил аслан хьиз, гъуьрчен винел цавуз акъатда, зи хва. Аслан хьиз чилив игис хьана – Нивай чӀур ийиз жеда асландин секинвал?

¹⁰ Ягьудан гъилерай гьукумдин лаш аватдач, гьакимдин аса адан кӀвачеривай къакъатдач. Вахт къведа – ада жерме къачуда ва халкьар адаз муьтӀуьгъ жеда.

¹¹ Лам кутӀундай затӀ адан ципицӀдин чӀере я, ципицӀдин чӀере я шаркӀунтар кутӀунун патал. Вичин парталар ада чехирда чуьхуьзва, вичин либасар ципицӀдин ивида.

¹² Вилер адан чехирдикай мичӀи я, некӀедикди лацу я адан сарар.

¹³ Забулуна уьмуьр тухуда гьуьлуьн къерехда, гимияр атана акъваздай. Сергьятни адан патарив Сидундин гва.

¹⁴ Исахар къуват квай лам я, парарин арада яргъи хьана къатканвай;

¹⁵ Адаз акуна хьи, секинвал хъсан затӀ я, и чилни гзаф гуьрчег я, ва далу парцин кӀаник кутуна, масадан гъилик квайди хьана.

¹⁶ Дана вичин халкь идара ийида: имни Исраилдин тайифайрикай сад я.

¹⁷ Дан рекьел гъуьлягъ хьурай, агъу авай гъуьлягъ жигъиррал алай. КӀасда балкӀандин кӀвач, мияхни аватда далудихъди.

¹⁸ Ребби, На хиласуник ква зи умуд!

¹⁹ Гадал вегьида таланчийри, абурухъ ам галтугда тарашиз абур.

²⁰ Ашераз булдалди недай-хъвадайди ава, пачагьар няметралди ада таъминарзава.

²¹ Нифтали азад мирг я, вичи гзаф гуьрчег балаяр хадай.

²² Юсуф бегьер гудай чӀере я, бегьер гудай чӀере чешмедин патав гвай. Адан хилери цал бегьем кӀевнава.

²³ Гьужумрикни акатнай ам, душманвални авунай адахъ галаз, Дяве авунай адахъ галаз устадар тир лишанчийри.

²⁴ Амма чӀемерук адан датӀана тӀарам тир, адан гъилериз къуват гузвай чешме Уьтквемдан, Якьубан Аллагьдин, гъилер тир эхир, ва Иман гвайбурун чубан, исраилдин раг тир!

²⁵ Ам ви бубадин Аллагь я, Ада ваз куьмекда, Ам вири Алакьдайди я, Ада ваз нуьсрет гуда. Кьакьан цаварин нуьсрет, Дерин деринрин нуьсрет, Мумайрин кӀвенкӀверин ва руфунин нуьсрет.

²⁶ Вине я ви бубадин нуьсрет, кьадим дагъларин нуьсретдилай даим тепейрин жумартвилерилай. Абур вири Юсуфан кьилел хьуй, Вичин стхайрин арада хан тирдан пелел.

²⁷ Бунъямин вагьши жанавур я: пакамахъ вичин къурбанд жакьвазва, няниз гъуьрч сараралди кукӀварзава.

²⁸ Исраилдин цӀикьвед тайифа ва абуруз бубади авур хийир-дуьаяр гьа ихьтинбур я. Гьар са тайифадиз – вичин хийир-дуьа.

Якьубан кьиникь ва кучукун

²⁹ Якьуба рухвайриз лагьана: «Мукьвара зун бан-бубайрин патав хъфида. Зун зи бубайрин патав хети Эфранан чуьлдал алай кьветӀе динж ая.

³⁰ И кьветӀ Къенандин чилел, Мамредин патарив, Махпелан чуьлда ава, чуьл лагьайтӀа Ибрагьима хети Эфранавай сурарин чка патал къачурди я.

³¹ Ана гьам Ибрагьимни адан паб Сарра, гьам Исакьни адан паб Рефикъа кучукнава, гьана за Лияни кучукнай.

³² Гьам чуьл, гьамни анал алай кьветӀ хетийривай маса къачунвайбур я».

³³ Рухвайриз ихьтин тапшуругъ гана, Якьуб месел ярх хьана кьена ва бан-бубайрин патав хъфена.