Хьунухь 46 - Пак Калам

Якьуб Мисридиз фин

¹ Исраил, вичин вири мал-девлет кӀватӀ хъувуна, рекьиз экъечӀна. Беэр-Шебадиз атайла, ада вичин буба Исакьан Аллагьдиз къурбанд авуна –

² ва йифиз Аллагьди ахварай адаз эверна: «Якьуб! Якьуб!» «Гьай», – жаваб гана Исраила.

³ Аллагьди лагьана: «Зун Аллагь я, ви бубадин Аллагь я. Мисридиз физ кичӀе жемир, Мисридиз алад: ана за вакай чӀехи са халкь арадал гъида.

⁴ Зун Вични квехъ галаз Мисридиз къведа, ва За куьн анай хкинни хъийида. Юсуфа вичин гъилелди ви вилер акьалда».

⁵ Якьубани Беэр-Шеба туна, рехъ давамарна. Чпив фиръаванди вуганвай дапурагра аваз Исраилан рухвайри Якьуб, чпин аялар ва папар тухузвай;

⁶ чпин нехирар абуру вилик кутуна гьалзавай ва Къенанда гъилиз гъайи мал-девлетни къахчунвай. Гьа икӀ Якьуб вичин вири эвледарни галаз Мисридиз куьч хьана:

⁷ рухваяр, рушар, хтулар – вичин вири тухум ада Мисридиз хкана.

Якьубан хизандин сиягь

⁸ Ингье Мисридиз куьч хьайи Исраилан несилрин тӀварар: Якьуб ва адан эвледар. Якьубан сифте хва – Рувен.

⁹ Рувенан рухваяр: Гьенух, Палу, Гьецран ва Карми.

¹⁰ Шимунан рухваяр: Ямуил, Ямин, Агьад, Яхин, Цагьар ва къенанви папа хайи хва Шаул.

¹¹ Левидин рухваяр: Гершан, Къегьат ва Мерари.

¹² Ягьудан рухваяр: Эр, Анан, Шелагь, ПерецӀ ва Зерагь. Эрни Анан гьеле Къенанда амаз кьенай, Пересаз лагьайтӀа кьве хва – Гьецранни Гьамул – хьанай.

¹³ Исахаран рухваяр: Тала, Пува, Яв ва Шимран.

¹⁴ Забулунан рухваяр: Серед, Элан ва Ягьлеил.

¹⁵ Ибур Якьубаз, адан руш Динани хьиз, Лияди Падан-Арамда хайи несилар я. Рухваярни рушар вири кваз – къанни цӀипуд кас.

¹⁶ Гадан рухваяр: Сифян, Гьаги, Шуни, Эсбан, Эри, Аради, Арели.

¹⁷ Ашеран рухваяр: Йимнагь, Ишва, Ишви ва Берия. Абурун вах – Серагь. Бериядин рухваяр: Гьебер ва Малкиял.

¹⁸ Ибур Якьубаз Лабана вичин руш Лиядиз къаравуш яз гайи Зилпади хайи несилар я, – цӀуругуд кас.

¹⁹ Якьубаз Рахилакай хьайи рухваяр: Юсуф ва Бунъямин.

²⁰ Мисрида Андин ибадатханада диндин къуллугъдар ПатӀи-Фарадин руш Асената Юсуфаз кьве хва хана: Манаше ва Ифраим.

²¹ Бунъяминан рухваяр: Бела, Бехер, Ашбел, Герай, Наъман, Эхи, Раш, Мупим, Гьупим ва Ард.

²² Ибур Якьубаз Рахилакай хьайи несилар я – цӀукьуд кас.

²³ Данан хва: Гьушим.

²⁴ Нифталидин рухваяр: Ягьциял, Гуни, Яцер ва Шилем.

²⁵ Ибур Якьубаз Лабана вичин руш Рахилаз къаравуш яз гайи Билгьадикай хьайи несилар я – ирид кас.

²⁶ Якьубахъ галаз Мисридиз атайбурун умуми кьадар, адан рухвайрин сусар квачиз, – пудкъанни ругуд кас.

Якьубан хизан Мисридиз атун

²⁷ Юсуфаз Мисрида идалай вилик кьве аял авай. Мисридиз куьч хьайи Якьубан тухумдин кьадар вири санлай пудкъанни цӀуд касдикай ибарат тир.

²⁸ Ягьуд и вахтунда Якьуба вилик, Юсуфан кьилив, Юсуфа Гешенда абурун кӀвенкӀвел экъечӀун патал, ракъурнавай. Абур Гешендив агакьна.

²⁹ Юсуфа вичин дапурагдик балкӀанар кутӀуниз туна ва вичин буба Исраилан вилик экъечӀун патал Гешендиз рекье гьатна. Ам бубадин вилик экъечӀна, адан гардан кьуна ва адан къужахда яргъалди шехьна.

³⁰ «Гила, заз вун сагъ яз акурдалай кьулухъ, зун кьейитӀани жеда», – лагьана Исраила.

^31-32 Юсуфа вичин стхайриз ва вири сихилдиз лагьана: «Зун фиръавандиз Къенандай зи патав стхаяр ва вири зи сихил атанвайди, абур чубанар тирди, лапагар хуьзвайди, чпихъ галаз лапагар ва къарамалар хканвайди ва мад мал-девлет гвайди лугьуз физва.

³³ Куьне лагьайтӀа, фиръаванди квез эверна ва куьн квел машгъул я лагьана хабар кьурла,

³⁴ икӀ жаваб це: „Фиръаван, вун сагърай. Чун аял чӀавалай, чи бубаяр хьиз, чубанар я“. И чӀавуз куьн Гешен чилел тада, вучиз лагьайтӀа хипер хуьзвай вирибур мисривийри мурдар хьанвайбур яз гьизабзавайди я».