Хьунухь 4 - Пак Калам

Стха яна кьин

¹ Адам вичин паб Гьавадихъ галаз хьана. Ам руфунал залан хьана, хва – Къабил – хана. «Реббидин куьмекдалди заз гада жагъана!» – лагьана ада.

² Ахпа ада Гьабил – Къабилан стха хана. Гьабила лапагар хуьзвай, Къабила чилиз къуллугъзавай.

³ Къабила Реббидиз савкьват яз чилин майваяр гъайи са югъ алукьна,

⁴ Гьабилани сифте къачунвай дулдин кӀелерин хъуцӀур гъана. Гьабилни адан савкьват Реббиди разивилелди кьабулна,

⁵ амма Къабилни адан савкьват ваъ. Хъилекди Къабилан чин чӀулав хьана.

⁶ «Вак вучиз хъел ква?» – жузуна Реббиди Къабилавай. – «Вуна чин вучиз чӀур авунва?

⁷ Хъсанвал ийизватӀа – кьил хкаж. ТуштӀа, гунагь гуьрцелдихъ чуьнуьх хьанва. Адаз вун гъилиз къачуз кӀанзава, вун адан иеси хьухь».

⁸ Къабила вичин стха Гьабилаз лагьана: – Ша чуьлдиз экъечӀин. Абур чуьлдиз экъечӀна. Ана Къабила вичин стхадал вегьена ва ам яна кьена.

⁹ «Ви стха Гьабил гьина ава?» – хабар кьуна Реббиди Къабилавай. «Чидач, – жаваб гана Къабила. – Зун зи стхадин къаравул яни кьван?»

¹⁰ «Вуна вуч авуна?» – лагьана Аллагьди. – «Ви стхадин иви чилел экъичнава: ада Заз минетзава.

¹¹ Вун лянетдик акатна: вуна ви стхадин иви хъваз тур чили вичи вун инкарда.

¹² Гьикьван вуна адаз къуллугъ авуртӀани, ада мад ваз тӀуьн гудач. Вун чукурнавай, ина-ана къекъвез гьатнавай кас я».

¹³ «Ихьтин жаза заланди я, – лагьана Къабила, – завай ам эхиз жедач.

¹⁴ Къе вуна зун чилелай чукурзава, чуьнуьх жеда зун Вакай. Чукурнавайди ва ина-ана къекъвез гьатнавайди я зун – нивай хьайитӀани зун яна рекьиз жеда».

¹⁵ Амма Реббиди лагьана: «Ни Къабил яна кьейитӀани, гьадав ирид къатда кьисас ахгакьда». Рекьера гьалтайбуру ам яна рекьин тавун патал Аллагьди Къабил кьетӀен лишандалди къейдна.

¹⁶ Къабил Реббидин патавай квахьна хъфена ва Эдемдилай рагъэкъечӀдай пата экӀя хьанвай Над уьлкведа уьмуьр тухуз акъвазна.

Къабилан эвледар

¹⁷ Къабил вичин папахъ галаз хьана, амни руфунал залан хьана ва адаз Гьенух тӀвар алай хва хана. Къабила а вахтунда шегьер эцигзавай – ва адаз Гьенух – вичин хцин тӀвар гана.

¹⁸ Гьенухаз Ирад тӀвар алай хва хьана, Ирадаз – Мегьуяил, Мегьуяилаз – Метушаил, Метушаилаз – Ламех.

¹⁹ Ламеха вичиз кьве паб къачуна: садан тӀвар Ада тир, муькуьдан – Силла.

²⁰ Адади Ябал тӀвар алай хва хана, ва адалайни алачухра уьмуьр тухуз жез малар хуьзвайбур арадал атана.

²¹ Ябалахъ Юбал тӀвар алай стха авай – адалай чуьнгуьрдални кфилдал макьамар тамамардайбур арадал атана.

²² Силладиз Тубал-Къайин тӀвар алай хва хьана – буьруьнжни ракь гатадай чатун устӀар. Тубал-Къайинан вах Нагъама тир.

²³ Ламеха вичин папариз икӀ лагьана: – Хъсандиз яб це заз Адани Силла! Яб це, папар, за вуч лугьудатӀа! Зал итимди хер авуртӀа – яна рекьида! Гадади ягъайтӀани – яна рекьида!

²⁴ Къабилан патахъай къахчудай кьисас ирид къат артух я, амма Ламехан патахъай – пудкъанни цӀерид гъилера!

ШетӀ ва Энаш

²⁵ Адам мад вичин папахъ галаз хьана. Адани хва хана ва адал ШетӀ тӀвар эцигна, идан манани ихьтинди тир: «Аллагьди заз Къабила яна кьейи Гьабилан чкадал цӀийи велед гана».

²⁶ ШетӀахъ вичи адаз Энаш тӀвар ганвай хвани авай. Гьа чӀавалай инихъ инсанри Реббидин тӀварцӀиз кьаз эвер ийиз хьана.