Хьунухь 38 - Пак Калам

Ягьудни Тамар

¹ А чӀавуз Ягьуд, стхайрикай чара хьана, Гьира тӀвар алай са адулламвидин патав бине кутуна ацукьна.

² Ана адаз са къенанвидин, Шуа тӀвар алай касдин рушак адан вил хкӀуна. Ягьуда ам паб яз къачуна, адахъ галаз хьана,

³ амни руфунал залан хьана ва хва хана – Ягьуда адаз Эр тӀвар гана.

⁴ Паб мад руфунал залан хьана хва хана ва адаз Анан тӀвар гана.

⁵ Ахпа Кезибда мад сад хана ва адал Шелагь тӀвар эцигна.

⁶ Вичин сифте хва тир Эраз Ягьуда паб яз Тамар тӀвар алай са руш къачуна,

⁷ амма Эр Аллагьдин рикӀи кьуначир ва Реббиди адан чан къачуна.

⁸ Ягьудани Ананаз лагьана: «Стхадин хендедадихъ галаз уьмуьр твах. Стха эвез ая, адаз несил це».

⁹ Амма Ананаз чизвай хьи, Тамара хайи сад лагьай хва аданди яз гьисабдач, ва гьавиляй стха патал аялар алад тавунин мураддалди, гьар гъилера адахъ галаз къаткайла, вичин тум чилел гадардай.

¹⁰ Реббидиз ада ийизвай кӀвалахар хуш тушир, и кар себеб яз Реббиди гьадан чанни къачуна.

¹¹ Ягьудани Тамараз лагьана: «Зи хва Шелагь чӀехи жедалди, фена жуван диде-бубадин патав хендеда хьиз уьмуьр твах». ИкӀ лугьунин себебни ада ихьтин фикир авун тир: «ЧӀехибурун гуьгъуьналлаз гъвечӀидини рекьидайвал тахьуй!» Тамарни вичин бубадин кӀвализ хтана.

¹² Хейлин вахтар алатна. Шуадин руш, Ягьудан паб кьена. Яс куьтягь хьайила, Ягьуд вичин дуст адулламви Гьирани галаз лапагрилай сар тваз Тимнадиз фена.

¹³ Тамараз вичин апай лапагрилай сар тваз Тимнадиз фенвайди чир хьайила,

¹⁴ ада вичелай хендедадин парталар хтӀунна, чин шаршавдалди кӀевна ва Тимнадиз фидай рекьел алай Энайимдиз гьахьдай чкадал галчукна хьиз ацукьна. Адаз Шелагь чӀехи хьанватӀани, вич сакӀани адаз къачун тийизвайди акунвай эхир.

¹⁵ Тамараз килигайла, Ягьуда ам къагьбе я лагьана фикирна, вучиз лагьайтӀа адан чин шаршавдалди кӀевнавай.

¹⁶ Ам рекьин къерехда ацукьнавай адаз мукьва хьана ва лагьана: «Зун вахъ галаз къаткин ман». Адаз ам вичин свас тирди чизвачир эхир! Папа хабар кьуна: «Зун вахъ галаз къаткунай вуна заз вуч гуда?»

¹⁷ «За ваз зи суьруьдикай са бацӀи ракъурда», – жаваб гана ада. Амма папа лагьана: «Ракъурдалди замин тур».

¹⁸ «Ваз гьихьтин замин кӀанда?» – хабар кьуна Ягьуда. «Къайтандихъ галай ви муьгьуьр ва гъиле авай аса», – жаваб гана ада. Ада вичивай тӀалабай кьван вири затӀар вугана, адахъ галаз къаткана, ва Тамар адалай руфунал залан хьана.

¹⁹ Ахпа къарагъна хъфена, чинал алай шаршав алудна, ва мад вичин хендедадин парталар ахлукӀна.

²⁰ Ягьуда вичин яр-дуст тир адулламви элкъвена замин вахчун патал бацӀини гваз ракъурай чӀавуз, а паб жагъуриз хьанач

²¹ ва чкадин агьалийривай хабар кьуна: «Энайимдиз фидай рекьив ацукьнавай а ява паб гьина ава?» Амма адаз жаваб ганай: «Анал са ява пабни хьайиди туш».

²² Ам Ягьудан кьилив хтана ва лагьана: «Заз ам жагъанач, чкадин агьалийрини лугьузва хьи, анал са ява пабни хьайиди туш».

²³ Ягьуда лагьана: «Гьа шейэрни гьадаз амукьрай, чна чун беябур тийин. За адаз бацӀини ракъурзава, амма вавай ам жагъуриз жезвач!»

²⁴ Са пуд варз алатайла, Ягьудаз хабар гана: «Тамара, ви суса, гунагь авуна ва гила руфунал залан я». «Адаз кьуна цӀай ягъа», – эмир гана Ягьуда.

²⁵ Амма Тамар рекьидай чкадал тухудайла, ада вичин апаяз икӀ лугьун патахъай тӀалабна: «Зун и затӀарин иесидилай руфунал залан хьана». «Чир жезвани, – хабар кьуна ада, – и къайтандихъ галай муьгьуьрни аса?»

²⁶ Ягьудаз чир хъхьана. «Гьахъ гьадан патал ала, – лагьана ада. – Вири и кардин себеб за ам зи хва Шелагьаз гъун тавун я». Мад адахъ галаз Ягьуд къаткун хъувунач.

²⁷ Тамара хадай вахт алукьна, ва адахъ кьветхверар авайди малум хьана.

²⁸ Аялдивай азад жедайла ва къецел са гъил акъатайла, мамачи папа адак икьи яру рангунин гъал кутӀунна ва лагьана: «Сифте экъечӀайди им я».

²⁹ Амма аялди гъил къенез чӀугун хъувуна ва дуьньядал сифте адан стха пайда хьана. «Вун гьикӀ хьана вилик акатна?» – хабар кьуна мамачи папа; ва аялдиз ПерецӀ тӀвар гана.

³⁰ Адан гуьгъуьналлаз икьи яру гъални гъилик кваз дуьньядиз кьвед лагьайдини малум хьана. Адал Зерагь тӀвар эцигна.