Хьунухь 35 - Пак Калам

Аллагьди Бет-Элда Якьубаз хийир-дуьа авун

¹ Аллагьди Якьубаз лагьана: «Къарагъна Бет-Элдиз алад. Гьана вуна уьмуьр тухуз ацукь ва гьана вун ви стха Эсавакай катдайла, ви вилик атай Аллагьдиз къурбанган туькӀуьра».

² Якьуба вичин хизандиз ва вичин вири инсанриз лагьана: «Квез авай кьван вири чара аллагьар квадар ая, михьивилер ая ва парталар дегиша.

³ Чун Бет-Элдиз фин. Ана за зун кӀеве авайла, заз куьмек яз зи патав атай ва вири дуьшуьшрал, захъ галаз хьайи Аллагьдиз къурбанган эцигин».

⁴ Абуру Якьубав чпив гвай кьван вири чара аллагьар вахкана, япарай сиргъаярни акъудна, гьабурни Якьубав вахкана. Якьуба абур вири Шехемдин патарив гвай мегъуьн тарцик кучукна.

⁵ Абур рекье гьатна. Аллагьдин патай ракъурнавай хаф ядай хьтин кичӀевилив ацӀанвай патарив гвай шегьеррин агьалияр Якьубан рухвайрин гуьгъуьна гьатнач.

⁶ Якьуб вичин жемятни галаз Къенандин чилел алай, гила Бет-Эл лугьузвай Луз шегьердив агакьна

⁷ ва ана къурбанган эцигна. Ада иниз «Эл-Бет-Эл» тӀвар гана, вучиз лагьайтӀа Якьуб стхадикай катай чӀавуз ина адан вилик Аллагь атанай.

⁸ Рефикъадиз нек гайи паб Дебара кьена. Ам Бет-Элдин патарив мегъуьн тарцин кӀаник кучукнай ва и тарциз Аллун-Баххут тӀвар ганай.

⁹ Якьуб Падан-Арамдай хтайдалай гуьгъуьниз Аллагь мад адан вилик пайда хьана, адаз хийир-дуьа авуна ва лагьана:

¹⁰ «Ви тӀвар Якьуб я, амма гележегда ви тӀвар Якьуб ваъ – Исраил жеда». ИкӀ Ада адаз Исраил тӀвар гана.

¹¹ Аллагьди адаз мадни икӀ лагьана: «Зун вири алакьдай Аллагь я. Гзаф аладдайди, кьадардиз чӀехиди хьухь: валай халкь арада къведа, Са мусибат халкьар! Валай пачагьар аладда!

¹² Ибрагьимаз ва Исакьаз гайи чилни За вазни ви несилриз гуда».

¹³ Аллагь Якьубан патавай хъфейла,

¹⁴ Якьуба вичихъ галаз Аллагь рахай чкадал къван къяна ва къурбанд яз и къванцин винелай зейтундин чӀемни чехир илична.

¹⁵ Ада и чкадиз Бет-Эл лагьана.

Рахил кьиникь

¹⁶ Абур Бет-Эл туна хъфидайла ва Эфратадин патарив агакьайла, Рахилаз тӀалар гатӀунна. Аял хун четинвилелди кьиле фена.

¹⁷ Рахилаз гзаф азият гана. «КичӀе жемир, – лагьана мамачи папа. – Килиг, вахъ мад са хва ава!»

¹⁸ Эхиримжи нефесдик рекьизвай Рахила хциз Бен-Ани тӀвар гана. Амма бубади адал маса тӀвар эцигна – Бунъямин.

¹⁹ ИкӀ Рахил кьена. Ам гила вичиз Бетлегьем лугьузвай Эфратадихъ фидай рекьин къерехда кучукна,

²⁰ ва Якьуба адан сурал гуьмбет эцигна. Ам къенин йикъал къведалди анал ала – Рахилан сурун кьилихъ янавай къван.

²¹ Исраила, яни Якьуба, вичин рехъ давамарна ва Мигдал-Эдердилай алатайла, алачухар экӀяна.

²² Инал акъвазнавайла, Рувен вичин бубадин пуд лагьай паб Билгьадихъ галаз къаткана. Бубадиз и кардикай хабар хьана. Якьубаз цӀикьвед хва авай.

Якьубан рухвайрин сиягь. Исакьан кьиникь

²³ Лиядин рухваяр: Рувен (Якьубан сифте хва), Шимун, Леви, Ягьуд, Исахар ва Забулун.

²⁴ Рахилан рухваяр: Юсуф ва Бунъямин.

²⁵ Рахилан къаравуш Билгьадин рухваяр: Дан ва Нифтали.

²⁶ Лиядин къаравуш Зилпадин рухваяр: Гад ва Ашер. Ибур Якьубан Падан-Арамда хайи рухваяр я.

²⁷ Якьуб вичин буба Исакьан кьилив са мус ятӀани Ибрагьима, ахпа Исакьа уьмуьр тухвай, гила вичиз Хевран лугьузвай Къирйат-Арбадин патав авай Мамредиз атана.

²⁸ Исакьан вишни кьудкъад йис хьана.

²⁹ Ам агьил кьуьзек яз уьмуьрдикай тух хьана кьена ва бан-бубайрин патав хъфена. Ам рухвайри – Эсавани Якьуба – кучукна.