Хьунухь 3 - Пак Калам

Сифтегьан гунагь

¹ Ребби Аллагьди халкьнавай кьван вири гьайванрикай гъуьлягъ виридалайни амалдарди тир. Ада папавай жузуна: «Аллагьди квез и багъда авай майвайрикай гьич садни недай ихтияр тагун дуьз гаф яни?»

² «Чаз майваяр недай ихтияр ава, – жаваб гана папа. –

³ Багъдин юкьвал экъечӀнавай са тарцелай чна адан майваяр тӀуьна жедач, абурук хкӀунани виже къведач, тахьайтӀа чун рекьида лагьана Аллагьди».

⁴ «Рекьидач, – лагьана гъуьлягъди. –

⁵ Аллагьдиз чида хьи, куьне абур тӀуьртӀа, куь вилер ачух жеда ва квекай хъсанвални писвал вуч ятӀа чизвай Аллагь хьтинбур жеда!»

⁶ Папаз аквада хьи, и тарцин майваяр хъсанбур, килигиз хуш къведайбур ва акьул артухардайбур я. Адани са майва атӀана тӀуьна. Гъуьлуьзни ада са майва гана – гъуьлуьни адахъ галаз санал тӀуьна.

⁷ Абурун вилер ачух хьана, чпин кьецӀилвал акуна ва инжилдин пешерикай чпиз юкьвалай агъуз кӀевдай пекер авуна.

⁸ Шагьвар акъатна – абуруз багъда Ребби Аллагь къекъвезвайди ван хьана ва тарарин кьулухъ чуьнуьх хьана.

⁹ «Вун гьина ава?» – эверна Ребби Аллагьди инсандиз.

¹⁰ «Заз Вун багъда къекъвезвайди ван хьана», – жаваб гана инсанди. – «Заз зун кьецӀил тирди акуна, кичӀ акатна, чуьнуьх хьана».

¹¹ «Ваз вун кьецӀил тирди ни лагьана?» – хабар кьуна Ребби Аллагьди. – «Вуна За ваз къадагъа авунвай тарцелай майваяр тӀуьнвани?»

¹² «Вуна заз ганвай папа – гьа гьада заз и майваяр гана, ва зани тӀуьна», – жаваб гана инсанди.

¹³ «Вуна икӀ вучиз авуна?» – хабар кьуна Ребби Аллагьди папавай. «Гъуьлягъди зун алцурна, зани тӀуьна», – жаваб гана ада.

¹⁴ Ребби Аллагьди гъуьлягъдиз икӀ лагьана: «Авур кардай ваз лянет хьурай: вагьшийринни маларин арада негь хьанвайди, вун руфун чилелай галчӀуриз фида ва вири уьмуьр руг нез акъатда.

¹⁵ Вунни паб за душманар ийизва, куь балаярни сад садаз душманар я: адан хци ви кьил яна хада, вунани адан дабан кӀасда».

¹⁶ Папаз Ребби Аллагьди лагьана: «За ваз аял хун азият алайди ийида, азабра хада вуна аялар. Гъуьлуьхъ вун датӀана тамарзу жеда: гъуьл вун патал агъа жеда».

¹⁷ Адамаз Ребби Аллагьди икӀ лагьана: «Папаз яб гана, вуна майва тӀуьна, За ваз къадагъа авур! Гила вун себеб яз чил лянетдик акатна: азиятралди гила вири уьмуьрда вуна адан няметар жагъурда.

¹⁸ Цацар алай валар ада вун патал чӀехи ийида, чуьлдин векь ваз тӀуьн жеда

¹⁹ ва чин гьекьедай хьана жуван фу гъилиз гъида. Вичяй вун къачунвай чилик вун хъфидалди, вучиз лагьайтӀа руг я вун ва мад руквадиз элкъвен хъийида».

²⁰ Инсанди – Адама – вичин папаз Гьава лагьана тӀвар гана, вучиз лагьайтӀа ам вири чан алайбурун сифте диде хьана.

²¹ Ребби Аллагьди хамуникай парталар расна ва итимдални адан папал алукӀна.

²² Ребби Аллагьди лагьана: «Инсан чакай сад хьтинди хьанва – хъсанвални писвал чизвайди! Ада гьакӀ уьмуьрдин тарцелайни майва атӀун тавурай гьа, ам тӀуьна, ажал авачирдини тежедайвал!»

²³ Ребби Аллагьди инсан Эдемдин багъдай чукурна – вич халкь авур чилиз зегьмет чӀугурай лагьана.

²⁴ Инсан чукурна ва Эдемдин багъдал, рагъэкъечӀдай патахъай къаравулар акъвазарна – херупӀар ва кьуд патахъди ядай ялав квай тур, абуру уьмуьрдин тарцив фидай рехъ хуьн патал.