Хьунухь 26 - Пак Калам

Исакьни Рефикъа Герарда

¹ Уьлкведал, виликдай, Ибрагьиман вахтара хьиз мад каш акьалтна ва Исакь Герардиз, филиштийрин пачагь Абумелекан уьлкведиз, рекье гьатна.

² Ребби Исакьан вилик пайда хьана ва икӀ лагьана: «Мисридиз фимир, За ваз къалурай уьлкведа уьмуьр твах.

³ Гьана куьчери яз ацукь, Зунни вахъ галаз жеда ва ваз хийир-дуьа ийида. За ви буба Ибрагьимаз гайи кьин кьилиз акъудда: вири и чилер ваз ва ви несилриз гуда.

⁴ За ви несилар кьадардал атайла, цава авай гъетериз барабар ийида, ва абурув вири и чилер вахгуда. Ви несилар чилел алай вири халкьар патал хийир-дуьа жеда

⁵ – Ибрагьима Зи гафуниз яб гунай ва вири Зи тапшуругъар, эмирар, къалурнавай къайдаяр ва къанунар кьилиз акъудунай».

⁶ Исакь Герарда уьмуьр тухуз акъвазна.

⁷ Чкадин агьалийри адавай Рефикъадикай хабар кьурла, ада жаваб гана: «Ам зи вах я». «Паб я» лугьуз кичӀе хьана: гзаф иерди тир Рефикъа себеб яз, вич рекьин тавун патал.

⁸ Вахтар къвез алатна. Са гъилера Абумелеказ, филиштийрин пачагьдиз, дакӀардай Исакьа Рефикъадихъ галаз вичин рикӀ гьикӀ аладарзаватӀа акуна.

⁹ Ада Исакьаз эверна лагьана: «АкӀ хьайила, ам ви паб я ман? Бес вучиз вуна ам ви вах я лугьузвай?» «Заз ам себеб хьана зун яна рекьиз кичӀезвай», – жаваб гана Исакьа.

¹⁰ «Вуна чаз вуч ийизва? – лагьана Абумелека. – Чакай сада ви папахъ галаз йиф акъуднайтӀа – вун паталди чаз гьихьтин тахсир жедай?»

¹¹ Абумелекани вири вичин халкьдиз малумарна: «И касдик, я тушни адан папак хкуьрай гьар вуж хьайитӀани ажалдин иеси жеда».

Къуйрин патахъай акьунар

¹² И уьлкведа уьмуьр тухуз акъвазна, Исакьа техил цаз хьана. Реббиди адаз хийир-дуьа авуна: а йисуз адан бегьер кьадардилай виш гъилера артухди хьана.

¹³ Исакьахъ къвердавай гзаф девлет жезвай. Адакай бегьем девлет авайди хьана:

¹⁴ гила адаз лапагрин ва маларин нехирар, гзаф кьадар вач-хъшаяр авай. Филиштийри адал пехилвал ийиз хьана.

¹⁵ Абуру гьеле адан буба Ибрагьиман девирда Ибрагьиман лукӀари эгъуьннавай къуяр накьвар вегьена ацӀурна,

¹⁶ Абумелека вичини Исакьаз лагьана: «Чи патавай экъечӀна хъвач. Вакай чун паталди гзаф къудрат авай кас хьанва».

¹⁷ Исакьни Герар дередиз хъфена, гьана акъвазна

¹⁸ ва чеб гьеле Ибрагьиман девирда эгъуьнай ва Ибрагьим кьейидалай кьулухъ филиштийри накьвадивди ахцӀурай къуяр цӀийи кьилелай накьвадикай михьиз хьана. И къуйрал ада гьа чӀавуз абуруз Ибрагьима гайи тӀварар эхцигна.

¹⁹ Са гъилера адан лукӀари дереда авай са чешме накьварикай хкудна.

²⁰ Амма Герардин чубанри Исакьан чубанрихъ галаз гьуьжетар ийиз, абуруз «Им чи яд я» лугьуз хьана. Къуйдин патахъай къал-макъал хьун себеб яз, адаз гьа ихьтин тӀварни гана: Эсекь.

²¹ Маса къуй эгъуьннай; гьадан патахъайни гьуьжетар арадал атана, ва гьавиляй адаз СитӀна тӀвар гана.

²² И чӀавуз Исакь мадни яргъал фена, мад са къуй эгъуьнна, и гъилера гьуьжетар хъхьанач. Исакьа и чуьлдиз Регьабат тӀвар гана, имни: «Чун и чилел гзаф хьун патал эхирни чаз Реббиди гегьеншвилер гана» лагьай чӀал я.

²³ Ахпа Исакь элкъвена Беэр-Шебадиз хтана,

²⁴ ва ана, лап гьа сифте йифиз адан вилик Ребби пайда хьана. «Зун ви буба Ибрагьиман Аллагь я, – лагьана ада. – КичӀе жемир: Зун вахъ галаз я. За ваз хийир-дуьа ийида ва ви несил кьадардиз чӀехиди яз арадал гъида – За икӀ Зи лукӀ Ибрагьиман хатурдай ийида».

²⁵ Инал къурбанган туькӀуьрна ва Реббидин тӀварцихъ ялварна, Исакьа инал вичин алачухар экӀяна, адан лукӀарни къуй эгъуьниз эгечӀна.

²⁶ Лап гьа и вахтунда Герардай Исакьан кьилив, вичихъ меслятар къалурдай Ахузат ва аскеррин чӀехиди тир Пихални галаз, Абумелек атана.

²⁷ «Куьн зи кьилив вучиз атанвайди я? – хабар кьуна Исакьа. – Куьне зун, рикӀиз хуш тахьана, чукурнай эхир!»

²⁸ «Чаз Ребби ви патал алайди ачухдаз аквазва, – жаваб ганай абуру, – ва гьавиляй чун кьинелди сад хьана кӀанзава. Ша икьрар кутӀунин!

²⁹ Вуна чаз писвал ийидач лагьана кьин це: чнани ваз са писвални авунач эхир, анжах хъсанвилер, ваз чи патавай ислягьдиз хъфидай мумкинвал ганай, ва гила вахъ Реббидин хийир-дуьа гала!»

³⁰ Исакьа абуруз дем туькӀуьрна, абуру тӀуьн-хъун авуна.

³¹ Пакамахъ абуру кьве патан кьинер кьунай. Исакьа мугьманар рекье хутуна ва абурни рази яз элкъвена хъфена.

³² Гьа и юкъуз къуй эгъуьнзавай лукӀари яд жагъанвайдан гьакъиндай Исакь хабардарна.

³³ Исакьа и къуйдиз Шеба лагьана тӀвар гана. Гьа адалай шегьердал исятда алай Беэр-Шеба тӀварни атанва.

Эсаван папар

³⁴ Эсаван яхцӀур йис тамам хьайила, ада вичиз паб яз хети Беэридин руш Ягьудит ва хети Эланан руш Басмат къачуна.

³⁵ Исакьазни Рефикъадиз абурухъ кьведахъ галазни тежер кьван четин тир.