Хьунухь 21 - Пак Калам

Исакь дидедиз хьун

¹ Аллагьди, хиве кьурвал, Сарра рикӀел хкана: Реббиди вичин гаф кьилиз акъудна.

² Сарра кӀвачел залан хьана ва Аллагьди тайинарай ва абуруз лагьай вахтунда лап кьуьзуь хьанвай Ибрагьимаз хва хана.

³ Ибрагьима цӀийиз ханвайдаз, Саррадиз хьанвай вичин хциз, Исакь лагьана тӀвар гана,

⁴ муьжуьд лагьай юкъузни, Аллагьди эмир гайивал, адаз суьннет авуна.

⁵ Исакь хьайила, Ибрагьиман виш йис тир.

⁶ Сарради лагьана: «Хъуьруьн къведай кар кьуна заз Аллагьди: закай низ ван хьайитӀани – захъ галаз санал хъуьруьнар ийида».

⁷ Ва алава хъувуна: «Сарради аялдиз хур гудайди Ибрагьимаз нивай лугьуз жедай? Амма ингье, кьуьзуь кьилихъ, за адаз хва хана!»

⁸ Аял чӀехи хьана, ам хурудикай галуднавай юкъуз Ибрагьима еке мярекат кутуна.

Гьагарни Исмаил чукурун ва хилас хьун

⁹ Мисриви паб Гьагара хайи Ибрагьиман хци кстахвилер ийиз акурла,

¹⁰ Сарради Ибрагьимаз лагьана: «А къаравуш адан хвани галаз чукура! Адан хцикай, зи хва Исакьакай хьиз, ви варис жедач!»

¹¹ Ибрагьимаз вичин хцикай ихьтин гафар ван хьун гзаф залан тир,

¹² амма Аллагьди адаз лагьана: «Я гададин, а ви къаравушдин патахъай хажалатар ийимир. Ваз Сарради лагьайвал ая, вучиз лагьайтӀа ви тухум Исакьа давамарда,

¹³ амма къаравушдин хцикайни За сагъ са халкь арадал гъида. Гьамни ви бала я эхир».

¹⁴ Пакадин йикъан экуьнахъ Ибрагьима Гьагарав фуни яд авай цел вугана, абур адан къуьнерал эцигна – ва аялни галаз экъечӀна хъфин эмир гана. Гьагар рекье гьатна ва Беэр-Шебадин кьурумда къекъвез ийир-тийир хьана.

¹⁵ Целце авай яд куьтягь хьана. Ада аял са валан кӀаник туна,

¹⁶ вични, ам гьикӀ рекьидатӀа вилериз такун патал, яргъал хьиз, чӀемерукдай ягъай хьел агакьдай мензилда, ацукьна ва рикӀ хъуткьуниз кӀевиз шехьиз гатӀунна.

¹⁷ Аллагьдиз гададин ван хьана ва Аллагьдин малаикди цаварай Гьагаравай жузуна: «Вахъ вуч хьанва, Гьагар? КичӀе жемир! Вуна тунвай гададин ван Аллагьдиз хьана.

¹⁸ Къарагъ, алад гададин патав, ам кӀеме яхъ! За адалай са чӀехи халкь арадал гъида».

¹⁹ Аллагьди адан вилер ахъайна – Гьагараз къуй акуна. Адани патав фена, цел ацӀурна ва аялдиз яд гана.

²⁰ Идалай кьулухъни Аллагьди гада вичин къайгъударвиликай хкуднач. Ам чӀехи хьана, кьурумда уьмуьр тухуз акъвазна ва хъсандиз чӀемерукдай ядайди хьана.

²¹ Ада Паран кьурумда уьмуьр тухвана, пабни дидеди адаз Мисридай гъана.

Ибрагьиманни Абумелекан икьрар

²² А чӀавуз вичин аскеррин чӀехиди тир Пихални галаз Абумелек атана акъатна ва Ибрагьимаз лагьана: «Вуна гьихьтин кӀвалах гъиле кьуртӀани, Аллагьди ваз куьмекзава.

²³ Гила Аллагьдин тӀварцӀелди вуна я зун, я зи аялар, я зи хтулар маса гудач лагьана кьин яхъ: зун вахъ галаз гьикӀ регьим аваз тиртӀа, гьакӀ вунни захъ галаз ва ваз уьмуьр тухудай чка гайи уьлкведихъ галаз регьим гваз жеда!»

²⁴ Ибрагьима кьин кьуна,

²⁵ амма Абумелекан итимри вичивай къуй къакъуднава лагьана шикаят авуна.

²⁶ «Заз ам ни авунвай кӀвалах ятӀа чидач, – жаваб гана Абумелека. – Вуна заз куьтӀни авурди туш. Заз и кардикай сифте сефер яз ван жезва».

²⁷ Ибрагьима Абумелеказ лапагарни къарамалар багъишна ва адахъ галаз икьрар кутӀунна.

²⁸ Ирид кӀел ада чара авуна.

²⁹ «Бес и ирид кӀел – вуна абур вучиз чара авунва?» – жузуна Абумелека.

³⁰ «Ибур зи патай, – лагьана Ибрагьима, – и къуй за эгъуьнин лишан яз кьабула».

³¹ Гьавиляй абуру инал кьинер кьурдалай кьулухъ а чкадиз Беэр-Шеба лугьузва.

³² Беэр-Шебада Ибрагьимахъ галаз икьрар кутӀунайдалай кьулухъ Абумелекни адан аскеррин чӀехиди тир Пихал элкъвена филиштийрин чилел хъфена.

³³ Ибрагьима Беэр-Шебада тамариск тар акӀурна ва Реббидин, Даим Аллагьдин, тӀварцӀихъ ялвар авуна.

³⁴ Идалай кьулухъ хейлин йисара Ибрагьима филиштийрин чилел уьмуьр тухванай.