Хьунухь 2 - Пак Калам

¹ Гьа икӀ цавни чил ва цавунни чилин туькӀуьрунин вири жерге халкь авунай.

² Ирид лагьай йикъалди Аллагьди арадал гъунин кӀвалахар акьалтӀарнавай. Ирид лагьай юкъуз Аллагьди ял яна: Ада арадал гъунин кӀвалахар куьтягьнай.

³ Аллагьди ирид лагьай йикъаз хийир-дуьа авуна, ва ам паквилиз акъудна, вучиз лагьайтӀа и юкъуз ада ял янай: Ада халкь авунин ва арадал гъунин кӀвалахар куьтягьнай.

Инсан женнетдин багъда

⁴ Ингье цавукайни чиликай, абур халкь авур вахтуникай ихтилат. Ребби Аллагьди чил ва цав халкь авур чӀавуз,

⁵ чилел гьич са вални, гьич са векь-кьални алачир. Ребби Аллагьди гьеле чилел марфар къурнавачир эхир, ва адахъ гелкъуьн патал инсанарни авачир.

⁶ Анжах чилин деринрай акъатзавай ци ам дигизвай.

⁷ Ребби Аллагьди чилин руквадикай инсан халкь авуна, адак нерин хилерай нефес кутуна ва инсандал чан атана.

⁸ Эдемда, рагъэкъечӀдай пата, Ребби Аллагьди багъ кутуна ва Вичи халкь авур инсан гьана уьмуьр тухун патал ацукьарна.

⁹ Ребби Аллагьди и багъда вили кьадай ва хъсан бегьер гъидай гьар жуьредин тарар чӀехи авуна, багъдин юкьвал лагьайтӀа – уьмуьрдин тарни хъсанвални писвал вуч ятӀа чир ийидай тар.

¹⁰ Эдемдай вацӀ авахьзава; ада багъ дигизва, ахпани кьуд хилез пай жезва.

¹¹ Абурукай садаз Пишун лугьузва, ам виче къизил авай Гьавила уьлкведин къвалавай элкъвез-элкъвез авахьна фива.

¹² А уьлкведа михьи къизил ава, ана гьакӀ хуш ни галай шкьакь ва шагьам лугьудай къимет авай къванни дуьшуьш жезва.

¹³ Кьвед лагьай вацӀун тӀвар Гигьан я, ва ам Куш уьлкведин къвалавай авахьзава.

¹⁴ Пуд лагьай вацӀун тӀвар Пеленг я, ам Ашурдилай рагъэкъечӀдай пата авахьзава. Кьуд лагьай вацӀ Эфрат я.

¹⁵ Инсан Эдемдин багъда ацукьарна, ам и багъдихъ гелкъуьн патал ва ам хуьн патал.

^16-17 Ребби Аллагьди адаз ихьтин тапшуругъ гана: «Вавай, анжах са хъсанвални писвал чирдай тар квачиз, и багъда авай гьар гьи тарцелай хьайитӀани атӀана майваяр нез жеда, адан майваяр немир: тӀуьртӀа, лап гьа юкъуз рекьида».

¹⁸ Ребби Аллагьди лагьана: «Инсан тек хьун хъсан туш. За адаз вичихъ галаз кьадай куьмекдар халкьда».

¹⁹ Ребби Аллагьди чиликай гьар жуьредин гьайванар ва ничхирар арадал гъана, ва ада абуруз гьихьтин тӀварар гудатӀа килигун патал, инсандин кьилив гъана. Гьа икӀ гьайванрал инсанди чпиз гайи тӀварар акьалтна.

²⁰ КӀвалин вири гьайванриз, вири ничхирриз, вири вагьшийриз инсанди тӀварар гана – амма абурун арада вичив кьур са куьмекдар жагъанач.

²¹ И чӀавуз Ребби Аллагьди инсан дерин ахвариз ракъурна ва адан пакун тӀваларикай сад акъудна, ам алай чка якӀувди кӀевна.

²² И пакун тӀвалуникай Ребби Аллагьди паб арадал гъана ва ам инсандин кьилив гъана.

²³ Инсанди гьарайна лагьана: «Килиг, и кӀараб зи кӀарабдикай я, як зи якӀукай я. ТӀвар паб жеда адан, вучиз лагьайтӀа итимдикай къачунвайди я».

²⁴ Ингье вучиз итим, бубани диде туна, папахъ галкӀана, адахъ галаз са чандиз элкъвезватӀа.

²⁵ Абур кьведни, гьам Адам, гьамни адан паб, кьецӀил тир, амма регъуьвал ийизвачир.